Gasabo: Impinduka mu mibereho y’abakobwa babyariye iwabo bakiri bato

Yanditswe na Tombola Felicie
Kuya 19 Nzeri 2017 saa 09:54
Yasuwe :
0 0

Abakobwa babyariye iwabo ni bamwe mu batoroherwa n’ubuzima kuko usanga akenshi imiryango yavukamo itishimiye ibyababayeho ndetse n’ababateye inda bakabigarika.

Hari ababyara bakiri bato bahura n’imbogamizi zo gucikiriza amashuri, abo mu miryango itishoboye bagahura n’ikibazo cy’imirire mibi kuko batitabwaho nk’uko bikwiriye umubyeyi utwite cyangwa wonsa.

Ababyeyi bari mu kigero cy’imyaka 19 batewe inda bakiri bato baherutse kuganira na IGIHE, bavuze urugendo ruruhije banyuzemo kugeza ubwo bamwe bari barabuze icyerekezo cy’ubuzima.

Uwitwa Muhoza Josiane wabyaye afite imyaka 19 yatangaje ko yatewe “inda n’umuntu nahonderaga amabuye kuko mama yapfuye nkahita ndeka ishuri. Maze gutwita yaramfashaga, maze kubyara aranyihakana mbaho nabi kuko data yashatse undi mugore. Nari narambyimbye amatama n’ibirenge kubera kubura icyo ndya kandi nonsa n’umwana yari ameze nabi cyane.”

Mugenzi we witwa Uwamariya Damaris wabyariye iwabo ari mu kigero cy’imyaka 23 avuga ko ubukene bwatumaga anuka, atabona isabune cyangwa amavuta.

Ati “Naranukaga niko navuga, nta sabune, nta kwisiga, nta mibereho. Nta nubwo umuntu yashobora kundeba ngo amenye.”

Ubuzima bw’aba bakobwa kimwe na bagenzi babo bwaje guhinduka umunsi ku wundi bigizwemo uruhare n’Umuryango ‘Youth and Women Driver of Peace’ ufasha urubyiruko rwabyariye iwabo n’abapfakazi bakennye cyane. Ubaha ubushobozi bwatuma bibeshaho yaba amafaranga ndetse n’inyigisho zo kubahindurira imyumvire.

Uyu muryango washinzwe na Sebahizi Jules. Asobanura ko igitekerezo cyo kuwushinga cyavuye ku gusoma raporo zitandukanye za leta n’iz’abikorera zigaragaza abantu bakeneye ubufasha, ahitamo gushaka abandi bafite umutima ufasha kugira ngo bagoboke abababaye. Gusa ngo, mbere yo kugera aha, we n’umuryango we bari bifitemo umutima wo gufasha abababaye.

Ati “Natangiye muri 2011 ari njye n’umugore wanjye. Twari dufite abagore bo muri Bugesera na Rwamagana twafashaga. Nabonye ko ikibazo gifite indi ntera nsaba bagenzi banjye bandi barindwi kunshyigikira dutangiza Umuryango Youth and Women Driver of Peace umwaka ushize muri 2016".

Avuga ko bibanda kugufasha abakobwa babyariye iwabo ndetse n’abapfakazi bakennye kuko azi neza ko bahura n’ibibazo bikomeye muri sosiyete .

Ati "Tubaha ubufasha bw’amafaranga yo kuba bagira icyo batangira kwikorera bitewe n’ubushobozi tubonana buri wese. Hari ubwo tubatangiza ibihumbi 60 Frw, 30 Frw, 20 Frw. Iyo tubonye ko ubuzima bugenda buhinduka tugenda tubazamura ku rundi rwego.”

Aba bakobwa babyariye iwabo n’abapfakazi bakennye cyane uko ari 26, batangaza ko ubuzima bwabo bwari bubi, ariko ubu bwahindutse bagaca ukubiri n’indwara z’imirire mibi, umwanda no kwiheba nyuma y’aho bahuriye na Youth and Women Drivers of Peace.

Mahoro ati “Batumye twumva ko kugera ku bukire bishoboka ndetse twigarurira icyizere. Bampaye ibihumbi 20 Frw, ndacuruza nkitunga n’umwana wanjye kandi naguze n’ihene.” Naho Uwamariya Damaris we ati “Nahawe ibihumbi 60 Frw, ntangira gucuruza imineke. Ubu maze kubitsa ibihumbi 180 Frw muri Sacco kandi umwana wanjye anywa amata.”

Umukozi ushinzwe imibereho myiza y’Abaturage mu Murenge wa Ndera, Uwamahoro Jeanne D’Arc, yashimiye abo bakobwa n’abagore ko ayo mafaranga batayapfushije ubusa.

Ati “ Ni ibyo kwishimira ko ayo mafaranga mutayaguze inyama n’akabyeri ngo birangirire aho. Kuba mwaratangiye kwizigama ni ibigaragaza ko ubukire mwifuza muzabugeraho.”

Uyu muryango utangaza ko ubushobozi buramutse bubonetse abafite umutima wo gufasha bakaba benshi, ibikorwa byabo byagera muri buri karere kuko abakobwa babyaye n’abagore bakennye bakeneye ubufasha bahari.

Abakobwa babyariye iwabo bavuga ko ubu basigaye bafite icyizere cyo kubaho neza n'abana babo
Bavuga ko mbere babaga bihebye ndetse badakaraba kubwo kubura isabune n'amavuta
Muhoza Josiane wabyaye afite imyaka 19 yatangaje ko mbere yari afite ikibazo cy'imirire mibi
Sebahizi Jules ashishikariza abantu bose kugira icyo bakora ngo bagire nibura ubuzima bw'umuntu buhinduka
Ushinzwe imibereho myiza y'abaturage mu Murenge wa Ndera, Uwamahoro Jeanne D'Arc, ndetse na Sebahizi Jules umuyobozi w'Umuryango Youth and Women Driver of Peace

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza