Gasabo: Mutiganda wigishirizaga iwe mu ruganiriro afite ikigo cy’ishuri ry’incuke

Yanditswe na Emma-Marie Umurerwa
Kuya 20 Ugushyingo 2017 saa 01:32
Yasuwe :
0 0

Nyuma yo kubona ko bamwe mu bana bo mu gace atuyemo bagejeje igihe cyo kujya ku ishuri nyamara ntibajyeyo, Mutiganda Jean de la Croix yagize igitekerezo cyo kujya abigishiriza iwe mu rugo, kuri ubu akaba afite ishuri ry’incuke.

Iri shuri riherereye mu Mudugudu wa Kiriza,Akagari ka Nyabikenke mu Murenge wa Bumbogo, agace k’icyaro ariko kari kugenda gatera imbere.

Muri aka gace niho Mutiganda Jean De la Croix, ukora akazi k’ubufundi atuye.

Aganira na IGIHE, Mutiganda yavuze ko kuva kera yari afite inzozi zo kuzagera ku gikorwa gifitiye rubanda akamaro.

Yagize ati «Byanteraga agahinda kubona abana bagejeje igihe cyo kujya ku ishuri ariko bakirirwa bandagaye kubera ko amashuri ari kure. Mu mwaka wa 2012 nibwo natangiye nkajya mfata abana bake nkabigishiriza mu ruganiriro iwanjye. Nabaga mfashijwe n’umwana wabaga mu rugo wari wararangije amashuri yisumbuye ariko umwaka wagiye gushira abana bamaze kurenga 80. »

«Ku munsi wa mbere dutangira haje abanyeshuri umunani, ariko ubu tuvugana mu myaka ine ishize hamaze kunyura abarenga 400. Ubu mfite ikigo cy’ishuri kitwa ‘Kiriza Right School’aho twasabye inzego z’ibanze ko batwoherereza n’abakuze batazi kwandika, gusoma no kubara na bo tukabigisha.»

Ababyeyi bavuga ko mbere ya 2012 abana babo batigaga amashuri y’incuke

Nyiraminani Vestine afite umwana wiga kuri iki kigo. Yagize ati «Abana bacu ntibajyaga mu mashuri y’incuke kubera ko ari kure cyane, uvuye hano kugira ngo ugere aho ishuri riri ni urugendo rw’ibirometero birenga bine kandi ni inzira zitari nziza kuko unyura mu ishyamba, ahandi ni mu muhanda unyuramo amagare na moto ku buryo umwana atabasha kuhagenda. Twarishimye cyane aho iki kigo kiziye. »

Hanyurwumutima Ruben na we avuga ko iri shuri ritaraza abana birirwaga mu rugo, ababyeyi bagahangayika.

Ati «Tutarabona iri shuri twari dufite ikibazo cyo gusiga abana mu rugo, wasangaga bazerera bafite uburere bubi. Ubu rero ni ibyishimo kuri twebwe. »

Umunyamabanga Nshingwabikorwa w’Akagari ka Nyabikenke, Uwizeye Eric avuga ko Mutiganda yakoze igikorwa cy’indashyikirwa.

Yagize ati «Aka ni agace kari kugenda gaturwa cyane ariko mbere hari hatuye umuntu umwe umwe. Nta mashuri yandi ari muri aka gace. Igikorwa Mutiganda yakoze ni cyiza cyane, ubuyobozi buramushyigikiye. »

Uyu muyobozi asaba ababyeyi bafite abana bagejeje igihe cyo kujya ku ishuri kutabarekera mu rugo, ahubwo bakwiye kubajyana mu mashuri.

Mutiganda watangiye yigishiriza iwe mu rugo amaza kugira Ishuri ry'Incuke
Ishuri ry'incuke ryashinzwe na Mutiganda nyuma yo gutangira akorera iwe mu rugo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza