Kwamamaza

Gatete Claver yatowe nka Minisitiri w’Imari w’umwaka muri Afurika yo munsi ya Sahara

Yanditswe kuya 9-10-2016 saa 11:13' na Rabbi Malo Umucunguzi


Minisitiri w’Imari n’Igenamigambi w’u Rwanda, Amb. Gatete Claver, niwe watowe nka Minisitiri w’Imari w’umwaka wa 2016, mu bihugu byose bigize Afurika yo munsi y’Ubutayu bwa Sahara.

Ni igihembo yaherewe muri Leta Zunze Ubumwe za Amerika n’ikigo gitanga amakuru ya serivi z’imari, Global Capital, kuri uyu wa Gatandatu tariki 08 Ukwakira 2016, biturutse ku ruhare akomeza kugira mu gutuma ubukungu bw’u Rwanda buhagarara neza.

Banki Nkuru ya Kenya nayo yatowe nka Banki yaganje izindi muri iki gice cya Afurika, igihembo cyashyikirijwe Guverineri wayo, Patrick Njoroge.

Ubwo Global Capital yatangazaga abatsindiye ibihembo kuwa 04 Ukwakira, yavuze ko ubukungu bw’u Rwanda bwahuye n’ibibazo bitandukanye mu mezi 18 ashize, aho nk’ubucukuzi bw’amabuye nka rumwe mu nzego ziba zitezweho kwinjiza amadevize menshi mu gihugu bwahungabanye mu mwaka ushize.

Ibyo ngo byaturutse ku mpamvu ebyiri zirimo ibiciro ku isoko mpuzamahanga n’umusaruro wabaye muke, byose bigira ingaruka ku bucuruzi bw’u Rwanda aho ikinyuranyo cy’ibyo rwohereza mu mahanga n’ibyo rutumizayo cyageze kuri 16.5%.

Global Capital kandi yatangaje ko byashoboraga kugira ingaruka zikomeye ku gihugu kitohereza ibintu byinshi mu mahanga, ariko inzego zifata ibyemezo zafashe imyanzuro nk’aho Guverinoma y’u Rwanda yitabaje Ikigega Mpuzamahanga cy’Imari, IMF, kugira ngo ihabwe inguzanyo yafasha Banki Nkuru y’Igihugu kugoboka abatumiza ibintu mu mahanga.

Icyo gihe IMF, kuwa Gatatu tariki 8 Kamena, yemeye guha u Rwanda inguzanyo y’ingoboka ingana na miliyoni 204 z’amadolari, ni ukuvuga hafi miliyari 160 z’amafaranga y’u Rwanda.

Mu zindi gahunda zashyizweho kandi zirimo izijyanye no gufasha igihugu kwishakamo ingengo y’imari, binyuze mu kugenzura ikoreshwa ry’imari no kuzamura ingano y’amafaranga yinjizwa imbere mu gihugu.

Global Capital iti ‘‘Minisitiri w’Imari n’Igenamigambi ry’ubukungu w’u Rwanda yagize uruhare rukomeye muri ibyo bikorwa.’’

Gatete Claver yinjiye muri politiki mu 2001, anakora indi mirimo nk’aho yabaye Ambasaderi w’u Rwanda mu Bwongereza, Ireland na Iceland, mbere yo kujya muri Banki Nkuru y’u Rwanda mu 2009 nka Visi Guverineri. Yaje kugirwa Guverineri nyuma y’imyaka ibiri, muri Gashyantare 2013 agirwa Minisitiri w’Imari.

Global Capital ikomeza igira iti “Mu nshingano ze, Gatete yagaragaje ubushake mu micungire y’ingengo y’imari n’impano yo kunoza amasezerano n’izindi nzego mpuzamahanga. Uretse amasezerano na IMF, ibifatika byagezweho uyu mwaka birimo kubona inkunga ya miliyoni $162 yatanzwe na Banki Nyafurika Itsura Amajyambere n’Ikigo cy’Abayapani Gishinzwe Ubufatanye Mpuzamahanga, azubaka imihanda ibiri minini n’izindi nguzanyo nto z’imishinga y’amazi n’isukura.”

Gatete kandi ngo muri Gicurasi yatangaje umushinga w’umuhanda wa gari ya moshi uzahuza u Rwanda, Tanzania n’Inyanja y’Abahinde, nk’inkingi izafasha mu guhangana n’ubuke bw’ibyo rwohereza mu mahanga.

Ubushobozi yagaragaje muri ibyo bikorwa ngo bitanga icyizere ku izamuka ry’ubukungu bw’u Rwanda, ku buryo nubwo hitezwe ko buzazamuka kuri 6.3% uyu mwaka, IMF iteganya ko Umusaruro mbumbe w’igihugu uzakomeza kuzamuka kugeza kuri 7.5% bitarenze 2020.

Minisitiri Gatete n'itsinda rya Minisiteri y'Imari nyuma yo guhabwa igihembo
Minisitiri Gatete hamwe na Patrick Njoroge uyobora Banki Nkuru ya Kenya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved