Ibikomere bya Jenoside byatumye Gatera na Nsabimana biyemeza gufasha abafite ikibazo nk’icyo bahoranye

Yanditswe na Karirima A. Ngarambe
Kuya 20 Mata 2018 saa 02:33
Yasuwe :
0 0

Imyaka 10 irashize Gatera Emmanuel aruhutse umutima nyuma yo kwivura ibikomere yari amaranye imyaka 14 yibuka inzira y’inzitane yahuye nayo muri Jenoside yakorewe Abatutsi mu 1994.

Gatera afatanya na Nsabimana Norbert akazi ko kugira inama no gufasha abafite ibibazo (coaching) kugira ngo babashe kurenga amateka babayemo bubake ahazaza ndetse no kwigisha imyitwarire ijyanye n’inyungu zo kongera umusaruro mu guhanga imishinga. Bombi bacitse ku icumu rya Jenoside yakorewe Abatutsi.

Mu kiganiro na IGIHE, Gatera yavuze kubera ibyo yanyuzemo muri Jenoside yakorewe Abatutsi yumvaga nta wundi muntu wo kwizera mu Isi ndetse ngo ntiyabaga ashaka kwinjira mu bijyanye no kwibuka.

Ati “Kuva tariki 7 Mata 1994 kugeza muri Gicurasi imiryango yacu mu Bugesera yasaga n’iyashize. Abantu bawe, inshuti zawe, abavandimwe, ababyeyi kugira ngo ubabure mu minsi mike, ni nk’ijuru riba rikuguyeho.Nahise mvuga nti ‘mbaye impfubyi, ngiye kuba iyizimiza ikicyura, nta wundi ndeba muri iyi Si’. Kwibuka kwakozwe kuva mu 1995 kugeza 2000 ntabwo nigeze mbyinjiramo kuko sinashakaga kubyumva.”

Nyuma yo guhumurizwa no kugirwa inama, Gatera yavuze ko yaje kwiyakira.

Ati “Kuva mu 2008, sinshobora kwibuka ababyeyi banjye mbabaye. Urugero Data yakundaga kunywa urwagwa rwiza, ubu navuga ko ntarubonye haba hari Divayi, rwose nkafata icupa rya Divayi cyangwa rya Champagne nkamwibuka, nkamubwira nti ‘Data narasigaye, ndi umugabo narabyaye mfite abana, aho uri umenye ko ndiho kandi nezerewe.”

Yakomeje agira ati “Nta Mwana wanjye ugomba kumbona mpora ndira, ntabwo abanjye aricyo bansaba muri aya matariki yo kwibuka Jenoside yakorewe Abatutsi, kuva nabimenya nta gahinda nshaka mu minsi nsigaje yo kubaho.”

Nsabimana Norbert umaze imyaka irenga 20 aba mu Bubiligi yavuze ko abarokotse Jenoside yakorewe Abatutsi bakwiye gufatanya cyane cyane mu bihe nk’ibi byo kwibuka.

Yagize ati “igihe kirageze ngo dufatanye nk’abarokotse, duterana inkunga buri wese mu buryo ashoboye mu bihe nk’ibi turimo byo kwibuka abacu bazize akarengane. Niyo mpamvu mu kazi kacu twiyemeje kutabyihererana kuko amateka twaciyemo aduha ubunararibonye bwo kuba twafasha n’abandi baza batugana ari nako twivura ibikomere biturimo byinshi bitagaragara inyuma n’amaso.”

Nsabimana avuga ko bidakwiye ko abazabakomokaho babaho ubuzima bw’umubabaro nk’ubw’ababyeyi babo.

Ati “Ibyiza ni ukubihera mu miryango yacu. Ikizanshimisha ni uko abana banjye n’abawe bazabaho neza, tukabategurira inzira kuko ntitwababyariye kubaho nabi, tukabaganiriza ntitubahishe amateka ariko mu rwego rwo kubafasha kuzabaho neza bakazizihirwa mu buzima.’’

Gatera avuga ko kurokoka ari amahirwe adasanzwe akwiye kubyazwa umusaruro.

Yagize ati “Njye nsanga kurokoka ari amahirwe adasanzwe, ubuzima bwanjye ntibusanzwe, abarokotse ntidusanzwe. Ni aho rero njye na Norbet Nsabimana dusanga kubaho ari wo muti wa byose kandi tukabaho neza n’abazadukomokaho bose.”

Bombi bavuga ko ingaruka bahuye nazo no kwigunga kubera amateka aribyo byabateye imbaraga zo gufasha abandi gukira ibikomere.

Nsabimana Norbert
Gatera Emmanuel mu kiganiro n'Umunyamakuru wa IGIHE
Nsabimana Norbert na Gatera Emmanuel mu kiganiro n'umunyamakuru wa IGIHE

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza