Ikiganiro na Kapompole, Senateri wa mbere w’Umwirabura mu Bubiligi ufite inkomoko ku Munyarwanda

Yanditswe na Karirima A. Ngarambe
Kuya 12 Kamena 2019 saa 01:31
Yasuwe :
0 0

Izina Joëlle Kapompole rimaze imyaka 20 ryinjiye muri politiki y’u Burayi aho ryamamaye rikanavugwa cyane mu Bubiligi. Ni we mwari ukomoka muri Afurika wicaye bwa mbere mu Nteko Ishinga Amategeko muri Sena y’u Bubiligi.

Kapompole ni umunyapolitiki w’Umubiligi uvuka ku Munyarwanda Bisengimana na we uzwi cyane muri politiki ya Repubulika Iharanira Demokarasi ya Congo. Uyu mugabo yamenyekanye cyane mu gihe cya Mobutu Sese Seko Kuku Ngbendu Wa Za Banga wayoboye icyahoze ari Zaïre (1965 -1997).

Kapompole yavukiye mu Mujyi wa Kolwezi muri RDC ku wa 23 Ukuboza 1971. Yageze mu Bubiligi afite imyaka ibiri. Yarezwe na nyina mu gace ka Borinage muri Komini ya Quaregnon. Yabyirutse yisanga mu ruhurirane rw’imico ariko aza kuyibonamo byihuse.

Amashuri yisumbuye yayatangiriye muri Lycée Jeanne Dufrasne, ahava nyuma y’imyaka ibiri ajya muri Athénée Royal Marguerite Bervoets aho yize ibijyanye n’Ubukungu.

Kapompole yize kaminuza muri Mons-Hainaut [ubu ni UMons], aho yakurikiye Ishami rya Warocqué mu by’Ubukungu n’Imicungire y’Imari, aza kuhakura Impamyabushobozi y’Icyiciro cya Mbere cya Kaminuza mu by’Ubukungu.

Nyuma y’imirimo itandukanye yakoze, Ugushyingo kwa 1990 kwabaye intangiriro y’urugendo rwe muri politiki.

Elio Di Rupo wari Perezida mushya wa PS (Parti Socialiste) icyo gihe, yamugiriye icyizere cyo kuyobora imwe muri komisiyo 20 z’iryo shyaka.

Kapompole wari ushinzwe ubukungu rusange, yahawe intego yo gutegura Inteko rusange y’Ishyaka rya PS, abereye umuyoboke mu 2000. Mu Ukwakira k’uwo mwaka, yatorewe kuba umujyanama w’Ubuyobozi bw’Umujyi wa Mons.

Umwaka wa 2004 niho izina rye ryamenyekanye cyane kuko nibwo yatorewe mu Mujyi wa Namur mu matora y’akarere, aba umugore wa mbere w’Umwirabura ukomoka muri Afurika wicaye mu Nteko Ishinga Amategeko mu gice kivuga Igifaransa cya Wallonie.

Muri Nyakanga ishyaka rye ryamwemeje nka senateri uhagarariye Umuryango w’abavuga Igifaransa; yaje no kuba na Visi Perezida w’Ishyirahamwe ryo mu Mujyi wa Mons mu Ishyaka rya PS mu Ukwakira 2007.

Muri Gashyantare 2009, yinjijwe muri Komisiyo ya Sena ishinzwe kwiga ku ngamba zafatirwa ibibazo by’ubukungu bwa za banki n’igihugu muri rusange.

Kapompole ubu ni Depite uhagarariye agace ka Wallonie mu Nteko Ishinga Amategeko. Ni Umujyanama mu buyobozi bw’Umujyi wa Komini ya Mons kuva mu 2000, anayobora Solidaris Mons-Wallonie picarde [ikigo gitanga serivisi z’ubuzima cyashinzwe mu 1910.]

Uyu munyapolitiki w’imyaka 47 ahamya ko yitangiye imishinga y’ubuzima, umuco n’imibereho myiza y’abaturage; akunda siporo by’umwihariko umukino wa yoga, akanakunda gufata umwanya wo kwitekerezaho bihagije.

Mu kiganiro cyihariye yagiranye na IGIHE nyuma y’umuhango wo kwibuka ku nshuro ya 25 Jenoside yakorewe Abatutsi mu 1994 wabereye muri Mons, Kapompole, yakomoje ku rugendo rwe rwa politiki n’urwibutso kuri se utuma azirikana inkomoko ye.

IGIHE: Uzwi cyane muri politiki y’u Bubiligi, wadusangiza isano ufitanye n’u Rwanda?

Kapompole: Mfite inkomoko mu Rwanda kuko data, witwaga Bisengimana ariho akomoka. Nitwa Kapompole, izina rya mama ariko sinibagirwa data uwo ari we. Ni iby’ingenzi kubivuga mu gihe cyo kwibuka Jenoside yakorewe Abatutsi kuko ari ingenzi mu buzima kwibuka aho dukomoka.

IGIHE:Wiyumva ute nk’Umunyarwandakazi?

Kapompole: Yego ndi Umunyarwanda, Umunye-Congo n’Umubiligi. Ni ingenzi kuri njye ko nemera nka nabihagararaho muri jye aho nkomoka n’urugendo rw’ubuzima bwanjye hano mu Bubiligi. Ntekereza neza ko iyo ufite amahirwe yo kugira amasano atandukanye, bifasha kuyakuramo inyungu hamwe muri serivisi z’imishinga ifitiye igihugu akamaro.

Ibi bivuze ko ntirengagije abanyamahanga benshi batisanzura kubera ivangura bakorerwa. Haba mu kubona icumbi, akazi kandi sinshaka kuba igiti gihisha ishyamba.

Ni ingenzi kuri njye guteza imbere imishinga igamije kurwanya ivangura no gufasha urubyiruko kubona amahirwe hatitawe aho ruturuka, ubuzima n’imibereho yarwo.

Mva mu mujyi utuwe cyane n’urubyiruko ndabizi kandi rukunze kuba mu mijyi, ntibiba birworoheye guteganyiriza ahazaza heza. Urubyiruko rugomba guhabwa amahirwe arufasha kwihangira imirimo no kugira ubuzima bwiza.

Joëlle Kapompole amaze imyaka 20 yinjiye muri politiki y’u Burayi. Yamamaye cyane mu Bubiligi ubwo yabaga senateri wa mbere ukomoka muri Afurika wicaye mu Nteko Ishinga Amategeko

IGIHE: Amahitamo yawe yo gukora politiki yaba afitanye isano no kuba umubyeyi wawe yarabaye umunyapolitiki wakoranye na Maréchal Mobutu? Ese waba ubikura kuri so wanyu Bwimba wari mu nyeshyamba za Murera wishwe amanitswe ku giti i Kinshasa?

Kapompole: Aho nakuye gukunda politiki ndemeza ko bishingiye kuri data byanze bikunze. Ntekereza ko urugendo rwe rwabigizemo uruhare nubwo ntagize amahirwe yo gukurira iruhande rwe.

Ikindi ni uko bigaragara ko nakuriye mu mujyi uha ubushobozi abana nkanjye kugera mu nshingano zisumbuyeho. Bivuze ko batezwa imbere haba mu mutekano rusange no kubona uburezi budaheza kuri bose.

Iri terambere rimaze gushinga imizi mu Bubiligi ryamfashije by’umwihariko kubona uburenganzira ndetse rimwe na rimwe ntekereza ko ngomba kwitura iki gihugu ibyo cyampaye byose.

Ibi byajyanye no gufata inshingano za politiki no kwita ku mujyi ngerageza gufasha abaturage. Ishingiro ryanjye ryo gukora politiki ni ugufasha abandi, ibyo ni byo nashakaga gukora.

IGIHE: Mwigeze mugera mu Rwanda? Ese mwaba muteganya kurusura?

Kapompole: Yego nigeze kujya mu Rwanda, ubu hashize igihe kirekire kirenga imyaka 10. Mu by’ukuri ndashaka kuhasubira ndetse kuva ubu ndashaka kubikora mu buryo buhoraho.

Ikintu cyankozeho ndi mu Rwanda ni uko hari hashize imyaka 10 igihugu kiri kwiyubaka, mu iterambere ryisumbuye; nagize n’amahirwe yo kwitabira inama ku ruhare rw’abagore mu gihe cy’amakimbirane na nyuma yayo.

Nasanze byari ingenzi ko nitabira iyo nama muri icyo gihe nari senateri, wa mbere w’umugore w’umwirabura ndetse nagize amahirwe yo gusubira mu gihugu cyanjye ngisanze mu bihe byiza.

Ndashaka kugisubiramo kuko ntekereza ko imishinga yanjye y’ahazaza izaba ifitanye isano n’u Rwanda, ibyo ndabyizeye ndanabihamya.

IGIHE: Senateri wa mbere w’umwirabura?

Kapompole: Yego, Senateri wa mbere w’umwirabura, nanabaye umudepite wa mbere w’umwirabura uhagarariye Wallonie. Ubu urebye igihe gishize hari n’abandi bashobora kwiyongeraho.

Icy’ingenzi kuri njye uburambe butuma ugirirwa icyizere hari abakwibonamo, ukabona abo dukorana urwo rugendo rugana ku mishinga ifitiye benshi akamaro.

Ntekereza ko dukwiye gukorera abaturage, twita ku bibafasha kugira uburenganzira mu mishinga ibakorerwa bakagiramo ijambo n’ibikorwa, nta gusiga n’umwe mu nzira ndetse icyo ni cyo cyanshishikaje gukora politiki mazemo imyaka 20.

IGIHE: Uri umukandida wabonye amajwi menshi mu matora y’Akarere mu batowe cyane n’abishimirwa bihambaye, ubivugaho iki?

Kapompole: Mu by’ukuri nabonye amajwi menshi mu bandi bakandida bari bahataniye guhagararira agace ka Mons mu Nteko ariko igishimishije cyane ni uko ndi mu banyapolitiki 10 ba mbere batorewe guhagararira agace ka Wallonie.

Iyo ubona abantu bankikije barimo abaminisitiri, ba burugumesitiri bakomeye, ibyo ntekereza ko ari ikimenyetso gikomeye kandi cyiza, kiri mu buryo buboneye bwo gukorera abaturage.

Mu gihe cyose hari abantu benshi bagaragaje inyungu ku myitwarire n’izina ryanjye bifasha kugira ububasha n’ubushake bwo gukorana n’umushinga duhuriyeho njye n’ikipe yanjye y’Abasosiyalisiti mu gace ka Mons-Borinage ngo gatere imbere kurushaho, kanagire umwanya ukwiye.

Mons-Borinage ni icyambu cya gatatu kiri muri Wallonie, ibyo bivuze ko tugomba kubona ubushobozi bwo kugera ku byo twifuza ngo dukore imishinga iteza imbere abaturage bacu.

IGIHE: Musobanura mute ikibazo cy’abimukira cyazamuye urujijo mu Bubiligi, mu gihe hari abatorwa mu nzego za Politiki nkawe mu myanya ikomeye?

Kapompole: Ni ukuri biragoye, ariko wagiye ubona mu gace nka Mons-Borinage, dutora tukanagirira icyizere umugore w’umwirabura nk’uyoboye abandi ndetse akanatorwa cyane.

Ntekereza ko dukwiye kongera gusuzuma uburyo bwo kubana. Njye nizera ko bikwiye kunyuzwa mu mishinga igaragaza ko abantu buzuzanya, binyuze mu bikorwa byiza bigirwamo uruhare n’abanyamahanga.

Mu kugaragaza ibi byose bizanira umuryango w’Ababiligi byinshi, kuko mu Bimukira usangamo abahanga mu mirimo itandukanye, abakozi ba leta, abakora mu bigo by’igenga, abarimu.

Ibi byagaragaje ko urujya n’uruza rw’abimukira twabonye ku bava mu Butaliyani, Pologne, Maroc n’abo muri Afurika yo Munsi y’Ubutayu bwa Sahara, buri gihe bateje imbere u Bubiligi. Nizera ko uko turushaho kubigaragaza tuzubaka ibiraro bihuza abantu.

IGIHE: Mu mwaka ushize Umunyarwanda, Mushikiwabo Louise yatorewe kuyobora Umuryango w’Ibihugu bikoresha Igifaransa (OIF), mwabyakiriye mute?

Kapompole: Ni iby’ingenzi kugira umuntu uduhagarariye muri Francophonie. Njye nkorera mu Nteko Ishinga Amategeko iri Wallonie-Bruxelles, kandi ni ahantu h’ingenzi cyane mu Muryango wa OIF kuko harenga guhuza u Burayi, hakagera ku Isi yose.

Mushikiwabo ni intumwa nziza yavuye mu Rwanda, akaba afite inshingano zikomeye zo kuyobora OIF ihuriyemo ibihugu 88 ku Isi yose. Guhabwa amahirwe yo gukora ku rwego rw’Inteko ya Wallonie-Bruxelles ku bibazo birebana na Francophonie, navuga ko uruhare azagira mu myaka iri imbere ruzarenga imbibe zayo.

Ni umugore ufite umwanya wo hejuru, ndetse navuga ko afite byinshi yafasha mu bijyanye na dipolomasi ndetse ndahamya ko byagaragaye ko abagore bayikora neza cyane.

Dufite ingero nziza kuko nka Mushikiwabo yagaragaje ubuhanga n’ubumenyi ukurikije igihe yari amaze ku mwanya wa Minisitiri w’Ububanyi n’Amahanga w’u Rwanda.

IGIHE: Ni iki mwavuga kuri Perezida Kagame nk’umunyapolitiki?

Kapompole: Nk’umunyapolitiki wo mu Bubiligi, icyo mbona mu kazi ka Perezida Kagame ni uko yashyize imbaraga mu guhuza no gukorana n’Abanyarwanda bo muri za Diaspora, kandi bigaragarira mu iterambere n’uruhare zigira ku Isi yose.

Ntekereza ko ari ingenzi ku bakomoka mu Rwanda aho turi hose ku Isi kugira uruhare mu gukorana n’igihugu cyacu no guteza imbere aho dutuye. Kuri njye byatumye mpura n’abantu bo muri Diaspora.

IGIHE: Ubona ute amateka u Rwanda rwaciyemo ya Jenoside yakorewe Abatutsi?

Kapompole: Kuri Jenoside yakorewe Abatutsi mu 1994, ikintu cya mbere kinza mu mutwe ni uko tutakongera guhura na biriya bihe by’akaga.

Ntekereza ko dukwiye ndetse ndashima igikorwa cyo kwibuka kuko gifasha ab’ibinyejana bizaza kumenya amateka. Ni byiza cyane ko abacitse ku icumu, imiryango ibakomokaho bakiri bato, usanga bose bahura bakibuka, bagatanga ubuhamya kandi bifite akamaro gakomeye.

Ni iby’ingenzi kuko bigaragaza ubushobozi bwo kwihangana muri bo, ubwo kongera guhaguruka no gutanga isomo ku Isi ry’uburyo ikwiye kwitwara.

Buri mwaka mu gihe cyo kwibuka Jenoside yakorewe Abatutsi, turababona mu Bubiligi aho bahurira mu mijyi itandukanye, aha muri Mons ubwitabire buriyongera. Navuga ko uko igihe gitambuka niko kwibuka bigira imbaraga, ndetse ubutumwa butangirwamo ni ingenzi.

Nzakomeza kubigiramo uruhare nk’umunyapolitiki, sinakwemera ko hakomeza kuba kutita ku bintu bjyanye n’uburenganzira bw’abarokotse kandi ndi umuntu ufitanye isano n’ayo mateka. Twe twagize Imana Jenoside yabaye turi hanze y’u Rwanda ariko akababaro ni kenshi, uko byagenda kose byatugizeho ingaruka.

Kapompole ni umunyapolitiki w’Umubiligi uvuka ku Munyarwanda Bisengimana wamenyekanye cyane ku butegetsi bwa Mobutu wayoboye icyahoze ari Zaïre (1965 -1997)
Joëlle Kapompole mu kiganiro n'Umunyamakuru wa IGIHE ukorera ku Mugabane w'u Burayi, Karirima Aimable Ngarambe
Joëlle Kapompole ukomoka ku mubyeyi w'Umunyarwanda n'Umunye-Congo ni we mwirabura wa mbere wabaye Senateri mu Bubiligi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza