Imyaka 17 y’urugendo rwa François Kanimba muri Politiki y’impinduramatwara mu bukungu bw’u Rwanda

Yanditswe na Emma-Marie Umurerwa
Kuya 28 Gicurasi 2018 saa 11:23
Yasuwe :
0 0

Kanimba François ni umugabo uzwi cyane muri politiki y’u Rwanda cyane cyane ifite aho ihuriye n’amafaranga. Abakuze mu myaka ya za 2000 bamwibuka nka Guverineri wa Banki Nkuru y’Igihugu (BNR) mu ijwi rye ribyibushye asobanura Politiki y’ifaranga ry’igihugu ndetse nuko ubukungu bw’igihugu buhagaze.

Uyu mugabo w’imyaka 60 yaje no guhabwa kuyobora Minisiteri y’Ubucuruzi n’Inganda mu bihe byari bikomeye, ubwo igihugu cyarwanaga no kureshya abashoramari mvamahanga ngo bashore imari mu Rwanda nyamara ibikorwa remezo bituma inganda zikora bikiri bike.

Mu rugendo rwe rw’imyaka isaga 17 muri Politiki y’Ubukungu bw’Igihugu, François Kanimba yishimira umusanzu yatanze mu kubaka ubukungu bw’u Rwanda. Uyu mugabo uherutse gusimbuzwa muri Guverinoma, yaganiriye na TV10 mu kiganiro ‘The Interview’ asobanura byinshi ku buzima bwe muri Politiki.

Yayoboye BNR ifite ibibazo bibiri by’ingutu

Nyuma ya Jenoside yakorewe Abatutsi, nibwo François Kanimba, Inzobere mu bijyanye n’Ubukungu n’Ibarurishamibare ‘Economic Statistician’ yatangiye kumenyekana mu nzego zitandukanye. By’umwihariko guhera mu 2000 yabaye Umuyobozi wungirije wa BNR, mu 2002 agirwa Umuyobozi mukuru wayo kugeza mu 2011 ubwo yagirwaga Minisitiri w’Ubucuruzi n’Inganda.

Mu 2000 ubwo Perezida Kagame yamuhaga inshingano zo kuba Guverineri wungirije wa Banki nkuru y’Igihugu ndetse no mu mwaka wa 2002, ubwo yagirwaga Guverineri wa Banki Nkuru y’Igihugu, Kanimba avuga ko bitari byoroshye guhabwa uwo mwanya nyuma ya Jenoside.

Ati “Tuvugishije ukuri icyo gihe ntabwo byari byoroshye kuko Banki Nkuru y’Igihugu nk’izindi nzego yari ikiyubaka ubwayo, igishakisha n’abakozi kugira ngo ishobore kubona abashobora kuba bashyira mu bikorwa inshingano zayo. Akazi kari kayitegereje kari karemereye cyane.”

Yakomeje agira ati “Yari ifite ibibazo bibiri by’ingutu biyikomereye icyo gihe twahanganye nabyo. Icya mbere, amabanki y’ubucuruzi yakoreraga mu Rwanda yari akiri make cyane. Hari Banki ya Kigali, Banki y’Ubucuruzi y’u Rwanda n’indi Banki yitwaga BACAR, hari n’indi ya kane yari yaravutse yitwaga BCDI ariko nayo ntabwo yari icunzwe neza. Uretse Banki ya Kigali, ayo mabanki yari acunzwe nabi, yarahombye ndetse ubona rwose hari ikibazo gikomeye cyane. Na BNR ubwayo amategeko yagenderagaho yari ashaje.”

Yakomeje avuga ko BNR yari ifite ikindi kibazo yagombaga guhangana nacyo cy’imicungire mibi y’amadovize.

Ati “Isoko ry’amadovize mu Rwanda ryarimo ibibazo bikomeye kuko ku isoko ryacu yari make cyane ariko hakaba n’ibisigisigi by’imicungire mibi y’amadovize yakorwaga na BNR mbere ya Jenoside yakorewe Abatutsi, wabonaga atari imicungire yatuma n’abafite amadovize bayazana. Harimo ibintu byo kugenzura cyane no gutonesha ku byerekeye kubona uburenganzira bwo gukoresha amadovize y’igihugu.”

Yakomeje avuga ko nubwo hari ibyari byaratangiye guhinduka nyuma ya Jenoside, politiki, inyandiko n’amabwiriza agenderwaho mu byerekeye gucunga isoko ry’amadovize bitari bifite umurongo uhamye.

Kanimba yasobanuye ko uwashakaga wese yavunjaga amafaranga bigatuma ifaranga ry’u Rwanda agaciro karyo kagerwa ku mashyi.

Ati “Mu nzira mu mujyi wasangaga abantu b’abavunjayi birirwa mu muhanda bahamagara abantu kuza kugura amadovize, ugasanga ifaranga ry’u Rwanda buri munsi riratakaza agaciro ku mpamvu zidasobanutse.”

Kanimba François azwi muri Politiki y’u Rwanda ifite aho ihuriye n’ubukungu bw'igihugu

“Mbere ya Jenoside nta Munyarwanda wari wemerewe gufungura konti ngo ashyireho amadolari”

Kanimba yavuze ko mu bindi byagoye BNR ari uguhindura imyumvire n’amategeko ku buryo Abanyarwanda bose babasha kubona amadovize dore ko hari abayafataga nk’aya Leta gusa.

Ati “Mbere abantu bumvaga ko amadovize ari aya Leta atari ay’abaturage. Icyo kintu kugira ngo kive mu mitwe y’abantu byari biruhije. Kugira ngo kera ushobore kubona amadovize muri Banki y’Ubucuruzi ujye guhaha ibintu hanze byasabaga icyemezo cya BNR. Nta Munyarwanda wari wemerewe kujya muri Banki y’Ubucuruzi ngo afungure konti ashyireho amadolari.’’

Iki cyemezo ngo cyari cyaratumye n’Abanyarwanda bari baratahutse bafite ubushobozi bwo gutunga amadolari bayagumisha mu bihugu babagamo kuko nta cyizere bari bafite ko bazagira uburenganzira bwo kuyakoresha nibayazana.

Kanimba anishimira ko akajagari kakorwaga n’abavunjayi bigatuma amafaranga y’u Rwanda ata agaciro umunsi ku wundi kacitse.

Ati ‘‘Nigeze kubahamagara muri BNR dukorana inama, ndababwira nti ‘Abanyarwanda bazi ko muri gukora ibintu bitemewe n’amategeko, hari amategeko agenga ubucuruzi bw’amafaranga y’amadovize, muze tubahe ibyangombwa mugire aho mukorera ababakeneye bagire ahantu babasanga mureke kwitwa inyeshyamba.’’

Iturufu yafashije Kanimba kuramba mu buyobozi

Kanimba François yamaze imyaka icyenda ari Guverineri wa BNR, amara itandatu ku mwanya wa Minisitiri w’Ubucuruzi n’Inganda.

Yavuze ko kimwe mu byamufashije kurama muri iyo myanya ari ugukorana neza n’abo bafatanyaga mu kazi.

Ati ‘‘Mu mibereho yanjye ngira amahirwe kuko gukorana n’abantu biranyorohera. Ahantu hose nanyuze mba inshuti y’abo nkoresha n’abanyobora. Haba muri BNR haba muri Minicom wasangaga ari abantu banyisangaho, gukorana nabo ntabwo byari ikibazo. Kuba inshuti n’abo uyobora mu rwego rw’ubuyobozi iyo ushaka kugira impinduka uzana mu mikorere biroroha. ’’

Yishimira ko ubwo yageraga muri Minicom, yagize uruhare mu guteza imbere ibikorerwa mu Rwanda, bikagira agaciro mu ruhando rw’andi mahanga.

Gahunda ya Made in Rwanda nk’imwe mu nkingi zitajegajega zo gushakira igisubizo ibibazo byugarije ubukungu, cyane cyane ibiterwa n’icyuho kiboneka hagati y’ibyoherezwa mu mahanga n’ibitumizwayo imaze imyaka isaga ibiri n’igice ishyizweho. Mu myaka irindwi u Rwanda rurateganya kuzazigama nibura miliyoni 400 z’amadolari ku byo rwatumizaga mu mahanga.

Kanimba ahugiye kuki?

Tariki ya 30 Kanama 2017 ubwo Perezida Kagame yatangazaga abagize Guverinoma nshya, Kanimba yakuwe ku mwanya wa Minisitiri w’Ubucuruzi, Inganda n’Ibikorwa by’Umuryango wa Afurika y’Uburasirazuba (MINEACOM), asimburwa na Vincent Munyeshyaka.

Kanimba atangaza ko nyuma yo kuva muri Guverinoma, yanze kwicara, ubu akaba akora muri Sosiyete itanga Ubwishingizi mu by’Imari (Société Mutuelle de Garantie et de Financement-SMGF).

Uyu mugabo mu byo yishimira cyane mu gihe yamaze mu buyobozi, ni akazi yakoze ubwo yari Guverineri wa BNR, agashimira by’umwihariko Perezida Kagame wabafashaga mu byemezo bafataga.

Kanimba François arahirira kuba Minisitiri w'Ubucuruzi n'Inganda mu muhango witabiriwe na Perezida Kagame ku wa 10 Gicurasi 2011
Guverineri wa Banki Nkuru y’Igihugu, Rwangombwa John (ibumoso) na François Kanimba wari Minisitiri w’Ubucuruzi n’Inganda, ubwo bitabiraga Inama yiga ku bijyanye n’Ubwishingizi muri Afurika (A.I.O Conference)
François Kanimba asubiza ibibazo by’abitabiriye Inama y’Igihugu y’Umushyikirano yabereye i Kigali ku wa 15 Ukuboza 2016
Minisitiri w’Ubucuruzi n’Inganda, Vincent Munyeshyaka mu muhango w'ihererekanyabubasha na Francois Kanimba wahoze ayobora MINEACOM
Kanimba yamaze imyaka icyenda ari Guverineri wa BNR, amara itandatu ku mwanya wa Minisitiri w’Ubucuruzi n’Inganda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza