00:00:00 IGIHE NETWORK KN KINYARWANDA EN ENGLISH FR FRANCAIS

Ingabire Divine ari mu bahatanira ibihembo byo ku rwego rwa Afurika

Yanditswe na Mukahirwa Diane
Kuya 15 Ukwakira 2021 saa 03:35
Yasuwe :
0 0

Ingabire Divine washinze umuryango I Matter ufite intego yo gufasha abana b’abakobwa b’abanyeshuri kubona ibikoresho by’isuku mu gihe cy’imihango, ari mu bahatanira ibihembo bya AfricTivistes Civic Action Prize 2021.

Aya ni amarushanwa ahuza urubyiruko rwo mu bihugu 54 bya Afurika rutarengereje imyaka 40, hakaba hatoranywa abafite imishinga myiza ifite inyungu rusange mu bihugu bakomokamo.

Ingabire yatangiye I Matter ubwo yari arangije amashuri muri Kaminuza y’Abadiventisiti b’Umunsi wa Karindwi, AUCA, atangira kujya akusanya impapuro z’isuku akoresheje imbuga nkoranambaga n’abandi bifuza gufasha.

Ibikoresho by’isuku akusanya abifashisha abana b’abanyeshuri baturuka mu miryango ikennye itabasha kubabonera ibi bikoresho ndetse n’abagore bo mu bice by’icyaro badafite ubushobozi bwo kwigurira ibi bikoresho mu gihe cy’imihango.

Abakobwa 1 995 n’abagore batishoboye bagera kuri 470 bo hirya no hino mu gihugu nibo bahabwa ibyo bikoresho by’isuku kugeza ubu.

Ingabire yabwiye The NewTimes ko akiri muto na we yahuye n’ikibazo cyo kutabasha kubona ibikoresho by’isuku bituma yifuza gutanga ubufasha ku bafite ikibazo nk’icyo.

I Matter kandi itanga amasomo ku bana b’abahungu n’abakobwa ku bijyanye n’imihango y’abagore mu rwego rwo kubaha amakuru ahagije kuri yo ndetse no gutoza abakobwa kudaterwa ipfunwe na yo.

Muri aya marushanwa ya AfricTivistes Civic Action Prize 2021, hitabiriye abagera kuri 379 batoranyamo 10 bahiga abandi bazatoranywamo ufite umushinga mwiza.

Ingabire yavuze ko ikibazo cyo kubura ibikoresho by’isuku ku bakobwa bari mu mihango cyugarije u Rwanda na Afurika muri rusange gikwiye gukorwaho ubukangurambaga, naramuka atsinze azaba abonye ijwi ribimufashamo.

Yagize ati “Muri Afurika umwana umwe mu icumi asiba ishuri kubera kubura ibikoresho akoresha ari mu mihango no kubura amakuru kuri yo, iki si ikibazo cyo mu gihugu cyacu gusa ahubwo kiri ku mugabane wose.”

“Kubera icyo dukwiye kuzamura ubukangurambaga mu kugikemura ku mugabane wose, ninegukana AfricTivistes Civic Action Prize bizabimfashamo.”

Ingabire ahatanye n’urubyiruko icyenda ruturuka mu bihugu nka Nigeria, Kenya, Niger, Mali n’ibindi. Uzahiga abandi azahabwa ibihembo bitandukanye birimo na miliyoni 10 z’amafaranga y’u Rwanda.

I Matter itanga ibikoresho by'isuku bifasha abakobwa baturuka mu miryango ikennye, mu gihe cy'imihango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .