Ku myaka 25 yatangije ishuri rya film rizageza sinema Nyarwanda ku rwego mpuzamahanga

Yanditswe na Tombola Felicie
Kuya 6 Werurwe 2017 saa 11:14
Yasuwe :
0 0

Rucyaha, umuhanga mu gutunganya film mu Rwanda agereranya ‘Camera’ ifata amashusho nk’isuka umuhinzi akoresha kuko byose bisaba ikirenze kuba ubifite nk’ibikoresho.

Avuga ko ufite ‘camera’ nziza udafite ubuhanga bwo kuzikoresha ntacyo byaba bimaze kimwe n’uko umuhinzi yaba atunze isuka nshya ariko atayihingisha cyangwa ngo afumbire bitamubuza kuyisonzana.

Ibyo abishingira ku kuba usanga abari muri sinema nyarwanda batarabikuramo umusaruro wabatunga bitewe n’uko hari abapfa kubijyamo gusa badafite ubumenyi bakumva ko kugira ibikoresho gusa ari cyo cy’ingenzi.

Ku myaka 25, Rucyaha Liavain usanzwe akora film yatangije ishuri ‘Mopas Film Academy’ ryigisha gutunganya film mu buryo bugezweho akaba agamije kugeza sinema nyarwanda ku rwego mpuzamahanga.

Mopas bituruka n’ubundi ku kigo asanganywe kitwa (Move Promotion and Suppy) gisanzwe gikorwa ibikorwa by’ikoranabuhanga.

Rucyaha watangije Mopas Film Academy, ntabwo ari mushya mu bijyanye na Simena kuko yabyize muri Africa Digital Media Academy , akitabira amahugurwa atandukanye hirya no hino ku Isi ndetse akaba yarakoze film yitwa Lost Dream yamujyanye muri Festival ya Film muri Amerika.

Nyuma yo kubona ko hakiri icyuho kinini cy’abahanga bashoboye gukora, gutunganya no kwandika film mu Rwanda, Rucyaha avuga Mopas Film Academy ije gutanga ubumenyi ku bifuza gukora film, kuzandika, kuzitunganya no gukoresha ibikoresho bifata amashusho (cameras).

Impamvu film zo mu Rwanda zitagurwa

Kubwe asanga impamvu film zo mu Rwanda zitabona isoko ari uko ziba zikozwe nabi, kubera abantu batabyize, zikagera ku isoko nta kintu na kimwe cyatuma uyigura cyangwa ngo ufate umwanya uyirebe.

Ati “Mopas Film Academy ni bwo buryo bwonyine bwo gukemura icyo kibazo cy’ubumenyi buke mu bakora muri sinema nyarwanda. Ndashaka gufasha ababirimo batarabyigize ngo babashe kugaruka kwiyungura ubumenyi ndetse n’abifuza kubyiga nk’indi myuga yose izababeshaho babashe kubona ubumenyi bugezweho. Nitumara gukora ibintu byiza uretse n’abanyarwanda, film zacu na zo zizagurishwa ku rwego mpuzamahanga kandi ni cyo twifuza."

Iri shuri ryatangiye muri Nzeri 2016, abanyeshuri ba mbere bamaze kugera ku isoko ry’umurimo ndetse abandi barakomeje.

Rucyaha avuga ko iri shuri rije gukosora amakosa atuma abenshi mu bakunda film bahitamo kugura iziba zakozwe n’abanyamahanga aho kureba iz’iwabo.

Mu kuzamura igitsinagore kugira ngo kibashe kwibona muri sinema nyarwanda, muri iri shuri abagore bagabanyirizwaho 20% ku mafaranga yo kwishyura amasomo ndetse n’abandi bose boroherezwa kwishyura mu byiciro.

Hifashishwa ikoranabuhanga

Muri Mopas Flm Academty abanyeshuri biga mu buryo bwa ‘Smart learning’, ni uburyo bw’ikoranabuhanga.Abanyeshuri batahana DVD iriho isomo baziga umunsi ukurikiyeho bikabirohera kumenya ibyo biga.

Rucyaha ati “Bitewe n’uko hano twigisha ubumenyingiro kurenza amagambo, abanyeshuri bize amezi atatu baba barusha ubuhanga abamaze umwaka biga ariko batabikora.”

Iri shuri rifitanye amasezerano n’andi mashuri yo muri Leta Zunze Ubumwe za Amerika ku buryo abanyeshuri baryo bazajya bajya kwimenyerezayo umwuga ndetse n’abo muri Leta Zunze Ubumwe za Amerika bakaza mu Rwanda.

Ryemewe n’Ikigo cy’Igihugu gishinzwe guteza imbere imyuga n’Ubumenyingiro, WDA, abarangijemo bemererwa kwishyira hamwe bakihangira imirimo ndetse bakabasha kubona inguzanyo babifashijwemo na BDF.

Umuntu wese warangije amasomo y’ikiciro rusange, aba yemerewe kwiyandikisha muri Mopas Film Academy. Riherereye mu murenge wa Remera, akarere ka Gasabo, munsi y’umuhanda ujya kuri Unilak.

Abanyeshuri bafashwa kugira ubumenyi buzageza sinema nyarwanda ku rwego mpuzamahanga
Aha abanyeshuri ba MFA bo mu ishami ryo gutunganya amajwi bari mu kazi
Bigisha mu buryo bugezweho aho abanyeshuri bibanda mu gukora kurusha kuvuga
Mopas Film Academy bafite ibikoresho n'abahanga mu kubikoresha
Umuyobozi Mukuru wa Mopas Film Academy, Jean Claude Niyibizi ari gukurikirana imyitwarire y'abanyeshuri mu masomo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza