00:00:00 IGIHE NETWORK KN KINYARWANDA EN ENGLISH FR FRANCAIS

Kuva ku 1.400 Frw ukagera kuri miliyoni 1,5 Frw: Uko abibumbiye mu mushinga iHuzo bafashijwe n’ikoranabuhanga

Yanditswe na Dufitumukiza Salathiel
Kuya 15 Ukwakira 2021 saa 01:57
Yasuwe :
0 0

Benimana Marie Jeanne ni umu-agent wa Sosiyete ya Kasha, imwe mu zikorera ubucuruzi bwo kuri internet mu Rwanda. Ni akazi amaze imyaka itanu akora ariko uyu munsi arabara inkuru iryoheye ugutwi, buri wese yakwifuza kumva.

Abenshi mu rubyiruko bazwiho kunenga imwe mu mirimo n’aho yaba ibyara inyungu, bavuga ko iciriritse cyangwa itajyanye n’igihe. We si ko abyumva kandi n’ubyumva atyo yamusabye guhindura imyumvire kuko na we aho ari uyu umunsi iyo atekereza atyo ntaba ahari. Yabanje kuba umudozi, yinjiza make ariko ubu ntiwatinya kumwita “boss”.

Ibyo abikesha kwimakaza ikoranabuhanga. Mu myaka itanu ishize, Benimana yatangiye gukorana na Kasha isanzwe icuruza ibikoresho by’isuku. Yavuze ko yinjizaga 1.400 Frw ku kwezi ariko uyu munsi yinjiza 1.500.000 Frw.

Yagize ati “Urwego ngezeho rurashimishije cyane. Hamwe nkoresha telefoni ngashishikariza umukiliya ku giti cye agahaha, bakamuzanira ibikoresho iwe nanjye ndi iwanjye ntiriwe mva mu rugo.”

Ubu yaguze inzu mu Mujyi wa Kigali, akaba afite intumbero yo kurushaho kuzamura ayo yinjiza akagira n’indi mitungo yisumbuye nk’imodoka ye bwite abikomoye ku kwifashisha ikoranabuhanga mu bucuruzi.

Ubuhamya bwa Benimana yabusangije bagenzi be bakoresha ikoranabuhanga mu mishinga itandukanye yiganjemo iy’ubucuruzi, kuri uyu wa 14 Ukwakira 2021.

Ni mu biganiro byabereye muri Kigali Convention Centre, byahurije hamwe abo mu nzego za Leta n’iz’abikorera bafite aho bahuriye n’ikoranabuhanga mu bucuruzi.

Byateguwe na Access to Finance Rwanda (AFR) ifasha ibigo by’imari kugeza serivisi ku bafite ubushobozi buke ku bufatanye n’Ishami rishinzwe Ikoranabuhanga (ICT Chamber) mu Rugaga Nyarwanda rw’Abikorera mu Rwanda (PSF).

Ni ibiganiro biri mu Mushinga “iHuzo” watangijwe na Access to Finance Rwanda (AFR) ifatanyije na PSF, ukaba ushyirwa mu bikorwa n’urwego rushinzwe ikoranabuhanga (ICT Chamber), hagamijwe gufasha imishinga mito n’iciriritse kwigobotora ingaruka yagizweho na COVID-19 binyuze mu kwimakaza ikoranabuhanga.

Umuyobozi Mukuru wa AFR, Iyacu Jean Bosco, yavuze ko uwo mushinga waje gufasha ibigo bitandukanye gucuruza hifashishijwe ikoranabuhanga cyane ko rikenewe muri ibi bihe.

Ati “Abantu benshi barawakiriye n’imbuga z’ikoranabuhanga (e-commerce platforms) zarawishimiye kuko tubafasha kongera ubumenyi no kubaha abantu babafasha kugera ku bafite ibicuruzwa bashobora gushyira ku mbuga zabo bakabasha kugurisha.”

“Haba abacuruzi bahashyira ibicuruzwa, na ba nyir’imbuga bakabona ababagana. iHuzo twashyizeho rero kugira ngo ibahurize hamwe, haba ufite urubuga, ufite ibicuruzwa ndetse n’ukeneye abafite ubumenyi ariko batarabona aho babukoresha bakabona akazi.”

Iyacu yavuze ko muri uyu mushinga harimo ubufatanye na Leta binyuze muri Minisiteri y’Ikoranabuhanga na Inovasiyo kugira ngo hahangwe imirimo ku rubyiruko rwinshi ariko hanatezwa imbere ubucuruzi bukoresheje ikoranabuhanga.

Minisitiri w’Ikoranabuhanga na Inovasiyo, Ingabire Paula, wari watumiwe muri ibyo biganiro yavuze ko umusanzu w’ubucuruzi bwo kuri internet wigaragaje cyane mu bihe by’icyorezo cya COVID-19, bityo ko hakenewe imishinga myinshi ikora nka iHuzo.

Ati “Dukeneye ibiganiro nk’ibi byinshi cyane kuko bivamo ibitekerezo byuje udushya twinshi.”

Yagaragaje ko abahinzi n’aborozi bakeneye uburyo bubafasha kugeza umusaruro wabo ku isoko by’umwihariko ubw’ikoranabuhanga.

Umuyobozi wa ICT Chamber, Ntale Alex, yavuze ko intego z’Umushinga iHuzo zirimo kwinjiza abantu mu ikoranabuhanga, kuryihutisha no kuritangaho ubumenyi rikabasha gutanga impinduka.

Yakomeje ati “Ikindi ni ugukurura abafatanyabikorwa barimo sosiyete zicururiza kuri internet, izifasha kwishyura n’ikoranabuhanga, n’ibigo by’imari [bigahurizwa hamwe].”

Ibyo biganiro byanitabiriwe na Minisiteri y’Ubucuruzi n’Inganda, Urwego rw’Igihugu Rushinzwe Iterambere (RDB), Equity Bank Rwanda, MasterCard Foundation, MTN Rwanda, Kasha Rwanda, sosiyete n’ibigo bitandukanye by’ubucuruzi n’ibitanga serivisi zikoresha ikoranabuhanga.

Abayobozi b'ibigo by'ishoramari n'abo mu nzego za Leta batanze ibiganiro bigaruka ku bucuruzi bwifashisha ikoranabuhanga
Abitabiriye ibiganiro bagaragaje inzitizi bafite zikomozwaho harebwa uko zakemurwa
Abafite imishinga y'ikoranabuhanga bari bitabiriye ibi biganiro
Ibiganiro byateguwe muri gahunda y'Umushinga wishwe iHuzo ugamije gufasha imishinga mito n'iciriritse kwigobotora ingaruka nza Covid-19
Minisitiri w'Ikoranabuhanga na Inovasiyo,Ingabire Paula, yari yatumiwe muri ibyo biganiro
Minisitiri w'Ikoranabuhanga na Inovasiyo, Ingabire Paula yakurikiye ibi biganiro
Umuyobozi ushinzwe Ubucuruzi muri Equity Bank Rwanda, Jean Claude Gaga ari mu bitabiriye ibiganiro
Umuyobozi wa Access to Finance Rwanda,Iyacu Jean Bosco, yavuze ko uwo IHuzo yaje gufasha ibigo bitandukanye gucuruza hifashishijwe ikoranabuhanga
Umuyobozi wa ICT Chamber, Ntale Alex, ubwo yagezaga ikigan iro ku bitabiriye ibiganiro
Umwe mu bakangurambaga mu by'ikoranabuhanga (digital ambassador) witabiriye ibiganiro

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .