Mabuye wize muri APACOPE ashima Shamukiga wahaye uburezi abari barabwimwe

Yanditswe na Karirima A. Ngarambe
Kuya 8 Kamena 2016 saa 08:29
Yasuwe :
0 0

Amateka u Rwanda rwaciyemo mu bihe byashize yateye ibibazo bitandukanye birimo iby’ivangura ry’amoko kugeza no kuri Jenoside yakorewe Abatutsi.

Iryo vangura ryatumye bamwe mu abana b’ Abanyarwanda batagira uburenganzira kuri bimwe bijyanye n’imibereho myiza ya muntu harimo kwiga, kwivuza n’ubwisanzure busesuye mu gihugu.

Bamwe mu babyeyi babo bakoze uko bashoboye kose ngo abana babo bazige bibesheho kuko niyo yari intwaro ishoboka mu gukomeza kubaho kandi neza babonaga.

Bigoranye cyane, abo babyeyi bagiye bashinga ibigo by’amashuri byigenga.

Shamukiga Charles ni umwe mu babyeyi barebye kure bashinga ikigo APACOPE (Association des Parents pour la Contribution à l’Education) mu mwaka 1981, iki kigo ubu kikaba gifite abanyeshuri bagera 1400, harimo abiga mu mashuri y’inshuke, abanza ndetse n’ayisumbuye.

Iyo uganiriye n’abize muri iki kigo ubura aho uhera uvuga ibyaranze Shamukiga, washinze iki kigo n’abo bafatanyije bose, cyangwa aho uhera uvuga amateka y’inzitane baciyemo nyuma y’ishingwa ry’iki kigo kugeza muri jenoside yakorewe Abatutsi.

Janvier Mabuye umwe mu bize muri APACOPE, avuga ko byari bigoye.
Yagize ati « Ndibuka ko turangije amashuri abanza, twabuze aho twerekeza ngo dukomeze amashuri yisumbuye, atari uko twabuze amanota. Bamwe mu babyeyi bacu badushakiye umwanya mu gikari cya Saint Michel tukaba ariho twigira, biragoye kubivuga kuko wasangaga nk’iyo twajyaga mu gihe cy’akaruhuko (récréation) twikinira agapira, iyo wateraga ishoti cyane umupira washoboraga kujya mu rugo kwa Perezida Juvenal Habyarimana, cyangwa se kwa Musenyeri Vincent Nsengiyumva, utaba ugiye aho ukajya ahandi mu bigo bikomeye byari aho hafi, ibyakurikiragaho ni ukubazwa indangamuntu y’uwawuhataye bikaba birebire.

Nyuma nibwo tugiye muri APACOPE, ku Muhima hariya, tugira imana kuko hari abarimu ababyeyi bari baradushakiye bajyaga baza kutwigisha basimburana mu rwego rwo gufashanya, bikaduha ubumenyi buhagije kandi ku rwego rushimishije. »

« Bigitangira Ababyeyi benshi baritanze cyane, ndibuka nka Ibambasi Athanase, Muligande Michel, Deo wakoraga muri Benalco, se w’umunyamakuru Séraphin Byiringiro na Yves Bucyana bazaga gudufasha gusubiramo amasomo nimugoroba, barangiza bakaduherekeza bwije kugera mu rugo bitwaje amatoroshi dore ko amatara yari ataragera hose, uwavuga amateka ya Apacope bwakwira bugacya. »

Mabuye akomeza agira ati « Ndashima by’umwihariko Shamukiga Charles na bariya babyeyi bitanze ngo tutaba mayibobo nk’uko Leta y’icyo gihe yari iriho yabyifuzaga. Nubwo aba bose badufashaga benshi bishwe muri jenoside yakorewe Abatutsi, ibikorwa byabo bizatuma bahoraho igihe cyose biciye muri twe bafashije cyangwa babyaye n’abazaduturukaho, niyo mpamvu tubitangaho ubuhamya ngo bitazibagirana.»

Ngo muri Jenoside yakorewe Abatutsi iyo wafatwaga bagasanga wiga muri APACOPE ntibyari ngombwa kukubaza uwo uri we cyangwa indangamuntu yawe wagombaga kubizira byonyine kuko, APACOPE yafatwaga nk’ishuri ryigamo Inkotanyi.

Shamukiga Charles, yishwe muri Jenoside yakorewe Abatutsi, benshi bamumenye neza n’abize bose muri APACOPE yashinze, bamutangaho ubuhamya ko nta mwana wamuburanaga ishuri yamugezeho cyangwa ngo yirukanwe kuko yabuze amafaranga y’ibikoresho .

Kuri ubu APACOPE iyobowe na Christine Shamukiga, umukobwa wa Charles Shamukiga.

Mabuye Janvier
Shamukiga Charles

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza