Ukwiyubaka kwa koperative y’abahinzi b’umuceri, yafunguye ibikorwa by’ishoramari bya miliyoni 295 Frw

Yanditswe na Kanamugire Emmanuel
Kuya 15 Gashyantare 2018 saa 10:28
Yasuwe :
0 0

Coproriz-Ntende ni imwe muri koperative z’abahinzi b’umuceri imaze gushinga imizi, ikaba yaraguriye ibikorwa byayo mu ishoramari hagamijwe ko idatega amakiriro ku buhinzi gusa kuko rimwe na rimwe bukorwa mu nkokora n’ibiza.

Coproriz Ntende ikorera mu Murenge wa Rugarama mu Karere ka Gatsibo, ikaba ifite icyicaro n’ibikorwa bitandukanye mu gace gaherereye hagati y’imisozi ya Kanyangese na Bujumo.

Yashinzwe mu 2003 ifite abanyamuryango 500. Icyo gihe yakoreraga ubuhinzi bw’umuceri kuri hegitari 50 zaje kwiyongera mu 2009 ziba 900 nubwo izihingwa mu buryo buhoraho ari 600. Ubu ifite abanyamuryango 3702 barimo abahinga umuceri n’abahinga ibishyimbo n’ibigori ahatagira amazi.

Iyo ibihe byagenze neza isarura toni eshanu kuri hegitari, ku gihembwe ikabona umusaruro ugera kuri toni 3500 nk’uko byatangajwe n’Umuyobozi ukuriye ishami ry’ubuhinzi muri Coproriz-Ntende, Isabane Etienne.

Ihinga ubwoko butandukanye bw’umuceri mugufi n’umuremure urimo wahawe izina rya ‘Buryohe’ kubera uburyo unurira.

Uko umusaruro ubonetse ngo buri muhinzi ahabwa 10% by’umuceri yejeje, koperative ikamufasha kuwutonora akabona uwo kurya, usigaye ukagurishwa ku ruganda rwa Gatsibo Rice Company ruwutonora, ku giciro cyumvikanyweho n’abahagarariye abahinzi, ubuyobozi bwa koperative n’ubw’uruganda.

Kimwe mu bice bigize igishanga Coproriz Ntende ihingamo umuceri
Urugomero rwifashishwa mu kuhira imirima y'umuceri ya Coproriz Ntende
Umuceri urimo gutunganywa ngo ujyanywe mu ruganda
Umuceri ubanza guhurwa, ukanikwa neza mbere yo kujyanwa mu ruganda aho utonorerwa

Agatambaro gatukura kagize uruhare mu kongera umusaruro

Ubuyobozi bw’iyi koperative buvuga ko kugira ngo umusaruro w’umuceri ugume ku isonga hari udushya twinjijwe mu buhinzi hagamijwe guhashya udukoko twonona imyaka no kwirinda ko wangirikaga kubera gutinda kubagara.

Nyuma y’aho bigaragaye ko umuceri wangirikaga kubera gutinda kubagara kwa bamwe, hatekerejwe uko iki kibazo cyakemuka hifashishijwe agatambaro gatukura.

Iyo umujyanama w’ubuhinzi ageze ku murima utabagaye amanikamo agatambaro gatukura, nyirawo yakabona akihutira kubagara, hashira iminsi ine hagatangira kubarwa amande y’amafaranga 500 ku munsi.

Ikindi cyatubyaga umusaruro ni ukudaterera umuti igihe kimwe byatumaga udukoko twangiza umuceri twimukira mu mirima itaraterwa bityo indwara zigahoraho ndetse bamwe mu bahinzi bakaba abarakoreshaga uburyo bwa gakondo mu gutera umuti ndetse bikabahenda.

Umuceri uhingwa na Coproriz Ntende utonorerwa mu ruganda rwa Gatsibo Rice Company
Umuceri utegereje gutonorwa mu ruganda

Ubu hashyizweho gahunda yo gutera umuti mu buryo bwa rusange koperative yaguriye ibikoresho nkenerwa abantu 75 bashinzwe gutera umuti bishyurwa amafaranga 300 ku murima (umuto ufite are 20) mu gihe mbere byasabaga umuhinzi amafaranga 1000.

Koperative kandi igeze ku rwego rwo kwituburira imbuto zigahabwa abahinzi ikagira n’imirimashuri aho ivana imbuto muri RAB ikazigeregeza harebwa iziberanye n’igishanga cyabo.

Coproriz Ntende yinjiye ite mu bikorwa by’ishoramari?

Mu mategeko agenga koperative mu Rwanda bivugwa ko koperative ishobora gukora ibyo yasabye ariko yemerewe no kwinjira mu bikorwa by’ishoramari mu gihe imaze gukura.

Nk’uko Umuyobozi wa Coproriz-Ntende, Sinzamuhara Jean de Dieu, yabitangarije IGIHE, ishoramari ryatekerejwe hagamijwe gushaka uko yakomeza kubaho no mu gihe umusaruro w’umuceri wabaye muke biturutse ku biza n’ihindagurika ry’ibihe.

Ibi bikorwa byahereye ku gutunda umusaruro kuva ku bahinzi kugera ku ruganda aho kugeza ubu ifite amakamyo atanu ikoresha, mu gishoro cyavuye mu musaruro w’umuceri cyaje kunganirwa n’abaterankunga.

Hamwe n’uko ibyatangijwe mbere byagiye bibyara inyungu, ishoramari ryakomereje mu bijyanye no kwakira abantu hubakwa ibyumba by’inama, iby’amahugurwa n’ibirori, restaurant, bar n’amacumbi byuzuye bitwaye miliyoni zisaga 295 z’amafaranga y’u Rwanda nk’uko byasobanuwe na Karangwa James, ushinzwe ishoramari muri iyi koperative.

Yagize ati “Twatangiriye kuri ‘salle’ hagamijwe ko abanyamuryango babona aho bakorera inama n’abaturiye hano bayikenera bakayihabwa bikinjiriza koperative. Umushinga wagiye uzamuka hiyongeraho restaurant na bar kugira ngo abahakoreye amahugurwa, inama cyangwa ubukwe babone n’aho biyakirira. Haje kwiyongeraho n’amacumbi kuko mbere abahakoreraga amahugurwa bajyaga kurara i Kayonza cyangwa i Nyagatare."

Karangwa yavuze ko baganwa n’abaturutse imihanda yose ndetse kugeza ubu inyungu iva mu bikorwa byo gucumbikira abantu iri hagati ya miliyoni esheshatu n’umunani yinjira buri kwezi.

Igice kigizwe n'amacumbi yo ku rwego rwa mbere

Iduka ry’umuhinzi ni ikindi gice cy’ishoramari gisigira koperative amafaranga atari make kikanafasha abaturage by’umwihariko abanyamuryango bayo mu mibereho myiza.

Niba haguzwe nk’ibigori ku mwero bigura amafaranga 150 ku kilo birabikwa byagera igihe bigura nka 400Frw abanyamuryango bo bakabihabwa kuri 300 Frw n’umuceri ukaba ucuruzwa muri ubwo buryo.

Coproriz Ntende ifite ikigega gitanga inguzanyo ku banyamuryango

Abanyamuryango bavuga ko mu buhinzi bakora koperative ibunganira ikabagezaho imbuto, ifumbire n’imiti ndetse ikanabakurikirana kugira ngo umusaruro wiyongere ariko hashyizweho n’uburyo bashobora kubona inguzanyo zibafasha mu bindi bikorwa.

Nk’uko Sinzamuhara yabisobanuye hashinzwe ikigega bashobora gufatamo inguzanyo z’amashuri y’abana, izo kwishyura mituweli n’ibindi bakeneye ndetse bakishingirwa mu bigo by’imari bakabona inguzanyo y’ishoramari ry’umunyamuryango ku giti cye.

Igice kigizwe n'amacumbi yo ku rwego rwa kabiri

Kuri ubu umunyamuryango ufite umushinga ubyara inyungu koperative yishingira ibihumbi 500 by’amafaranga y’u Rwanda, ukeneye arenze akongeraho ingwate ye.

Koperative kandi yubatse uburyo bwo kugoboka abagize ibyago no gushyigikira abanyamuryango babyo bagize ibirori. Uwapfushije umuntu we agenerwa 50Frw yo kumufasha gushyingura, naho iyo umunyamuryango nyirizina ari we witabye Imana umuryango we uhabwa ibihumbi 100 Frw mu gihe uwashyingiye ahabwa ibihumbi 50 Frw, bikaba biri muri gahunda yo gukuba kabiri iyo nkunga.

Nyirabagande Alivera, umuhinzi w’umuceri ukorera muri zone ya Kiriba akaba ahagarariye itsinda ry’abunzubumwe, yavuze ko kuba muri koperative bimaze kumugeza ku bintu bifatika.

Ati “ Njyewe ndi umupfakazi ariko koperative yishyuriye umwana wanjye amashuri yisumbuye arayarangiza, ubu ategereje kujya muri kaminuza. Narahingaga ikanguriza amafaranga nkamujyana ku ishuri nta zindi ngorane zibonetsemo kandi no kwihaza mu biribwa biremera. Iyo duhinze umuceri baradutonoreza tukaryaho bityo mu rugo ntiduhure n’inzara."

Impinduka Coproriz Ntende yagejeje mu gace ikoreramo

Perezida wa Coproriz Ntende, Rugwizangoga Elysée, yavuze ko imaze kugira abakozi bahoraho 63 na ba nyakabyizi basaga 10 ndetse ko yazanye impinduka mu nzego zitandukanye kuko ibikorwa byayo bifasha abanyamuryango n’abaturanyi babo.

Yagize ati “Nk’ubu mbere yo gutangira ibikorwa byari ikibazo ko umuntu yabona ‘salle’ yo gukoreramo ubukwe. Ubu nk’iyo umunyamuryango wacu yagize ubukwe cyangwa ubw’umwana we, yishyura ½ cy’ayo utari muri koperative yishyura.”

Perezida wa Coproriz Ntende, Rugwizangoga Elysée

Intumbero bafite ngo ni ugukomeza kongera ishoramari no kunoza ubuhinzi nubwo bagihura n’imbogamizi zitubya umusaruro zirimo nk’amapfa ashobora gutuma ingomero zifashishwa mu kuhira imirima y’umuseri zikama.

Iki kibazo cyiyongeraho icy’imvubu zona imyaka yegereye pariki nk’aho mu minsi ishize zonnye hegitari zigera kuri enye ariko ngo cyagaragarijwe ubuyobozi ku buryo hari icyizere ko kizakemuka vuba.

Umunyamuryango wa mbere winjiye muri Coporiz Ntende yatangaga umugabane ungana na 3730 Frw, ubu ugeze ku bihumbi 116 by’amafaranga y’u Rwanda.

Iyo umwaka urangiye inama rusange ifata umwanzuro w’uko urwunguko rukoreshwa hakaba ubwo rugabanywa abanyamuryango cyangwa rukongerwa ku migabane yabo nk’uko Nshimiyimana Jean Baptiste,ushinzwe Ibaruramari yabivuze.

Amacumbi rusange
Inyubako yagenewe amahugurwa n'inama by'abantu baringaniye
Salle yakira abantu benshi icyarimwe
Mu byo Coproriz Ntende yashoyemo imari harimo n'akabari kagezweho mu gace ikoreramo
Coproriz Ntende yanashinze restaurant isukuye
Agace Coproriz Ntende ikoreramo kamaze gutera imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza