Umunyarwandakazi Iribagiza yashyizwe mu kanama ka AfDB kazafasha Afurika guhanga imirimo miliyoni 25

Yanditswe na Rabbi Malo Umucunguzi
Kuya 29 Ugushyingo 2017 saa 04:16
Yasuwe :
0 0

Banki Nyafurika Itsura Amajyambere, AfDB yashyize umunyarwandakazi Clarisse Iribagiza mu kanama ngishwanama mu guhanga imirimo miliyoni 25 izafasha urubyiruko rugera kuri miliyoni 50 mu myaka 10 iri imbere, binyuze mu kubona ubumenyi bukenewe ku isoko ry’umurimo.

Ako kanama kiswe PYAG (Presidential Youth Advisory Group) kashyizweho na Perezida wa AfDB, Dr Akinwumi Adesina, kuwa Mbere w’iki Cyumweru, mu nama ya Gatandatu ihuje Umuryango w’Ubumwe bw’u Burayi na Afurika, i Abidjan muri Côte d’Ivoire.

Ako kanama ka PYAG karimo abantu icyenda bose bafite munsi y’imyaka 40 ariko babashije gutera intambwe no kugira uruhare rugaragara mu guhangira imirimo urubyiruko rwa Afurika.

Kayobowe na Ashish Thakkar umwe mu bashinze Mara Group ifite Banki y’Abaturage y’u Rwanda; kakabamo Uzodinma Iweala wo muri Nigeria; Mamadou Touré wo muri Cameroon washinze Africa 2.0 / Ubuntu Capital na Vanessa Moungar wo muri Tchad usanzwe akora muri AfDB akaba no mu kanama Ngishwanama na Perezida w’u Bufaransa, Emmanuel Mcron, kuri Afurika.

Harimo kandi Francine Muyumba wo muri RDC uyobora Ihuriro Nyafurika ry’Urubyiruko; Umunyamerika Jeremy Johnson, umwe mu bashinze ikigo Andela, Umunyarwandakazi Clarisse Iribagiza washinze Hehe Ltd ikora ibijyanye na porogaramu za mudasobwa na telefoni; Umunyanigeria Ada Osakwe washinze Agrolay Ventures n’Umunya-Zambia, Monica Musonda washinze Java Foods.

Ako kanama kazakorana na AfDB, kazagenda gatanga ibitekerezo n’ibisubizo byo guhanga ibishya bishobora gufasha mu guhanga imirimo igenewe urubyiruko rwa Afurika, muri gahunda iyo banki yihaye yo kongera imirimo igenewe urubyiruko rw’uyu mugabane.

Mu kiganiro yagiranye n’itangazamakuru, Dr Adesina yagize ati “Nitubasha gukemura ikibazo cy’ubushomeri mu rubyiruko, Afurika izabasha kuzamura ubukungu hagati ya 10 na 20% buri mwaka.”

“Bisobanuye ko umusaruro mbumbe wa Afurika uzajya wiyongeraho miliyari $500 buri mwaka, mu myaka 30 iri imbere. Amafaranga yinjizwa ku muturage nayo aziyongeraho 50% kugeza mu 2050.”

Dr Adesina yavuze ko urubyiruko ari ubukungu bukomeye uyu mugabane ufite, ariko muri miliyoni 13 z’urubyiruko rwinjira ku isoko ry’umurimo, miliyoni eshatu bonyine nibo babona imirimo ibaha umushahara ugaragara.

Ibyo ngo byerekana ko mu gihe nta gikozwe, miliyoni umunani buri mwaka zizajya mu bibazo, mu gihe byitezwe ko urubyiruko rwa Afurika ruzikuba kabiri rukarenga miliyoni 800 mu kinyacumi kiri imbere.

Nyamara ngo urubyiruko rwa Afurika rufite ubushobozi n’umuhate usanga ruri gushaka kwambuka inyanja ya Méditerranée ngo rujye i Burayi kuko rwabuze imirimo muri Afurika, ugasanga binahemberea iterabwoba.

Dr Adesina yakomeje agira ati “40% by’urubyiruko rwa Afurika ruhitamo gufata intwaro, rukajya muri iyo mitwe y’abagizi ba nabi cyangwa y’iterabwoba ku mpamvu z’amahirwe make rufite mu bihugu byarwo.”

“Miliyoni 66 z’urubyiruko rwa Afurika ruhembwa munsi y’amadolari abiri ku munsi, amafaranga adashobora no kugura Hamburger. Miliyoni 66 ni inshuro umunani z’abatuye u Busuwisi, inshuro esheshatu z’abatuye u Bubiligi, kimwe n’u Bwongereza, u Bufaransa cyangwa u Butaliyani, cyangwa se 88% by’abatuye u Budage.”

Aka kanama kandi kazajya gakorana n’abafatanyabikorwa, inzego z’abikorera, abakuru b’ibihugu, imiryango itegamiye kuri leta, abaterankunga n’izindi nzego, mu ruhurirane rw’ibikorwa bigamije guhangira imirimo urubyiruko rwa Afurika.

Ashish Thakkar wahawe kuyobora ako kanama yavuze ko ari amahirwe akomeye yo gukorera umugabane, ariko avuga ko hari akazi gakomeye kabategereje ko kubakira amahirwe urubyiruko rw’uyu mugabane.

Yavuze ko biteguye inshingano nshya, anatanga urugero uburyo yabashije kwiyubaka, nyuma y’uko umuryango we wari watakaje ibintu byose muri jenoside yakorewe abatutsi mu 1994 kuko yatangiye baba mu Rwanda.

Yagize ati “Nagujije $5000 kugira ngo mbashe gutangiza ubucuruzi bwanjye nta bufasha bw’undi muntu uwo ariwe wese. Uyu munsi Mara Group ifite abakozi 14000 ku Isi. Nari ndi umwe, noneho mutekereze ibyo dushobora gukora dushyigikiwe n’ikigo na Banki Nyafurika Itsura Amajyambere,”

“Hamwe n’iri tsinda rikomeye ry’urubyiruko ruturuka hirya no hino, twizera ko dushobora no kurenza intego za Banki Nyafurika Itsura Amajyambere zo guhanga imirimo miliyoni 25 no gufasha urubyiruko miliyoni 50 kubona ubushobozi bufatika. Igihe kirageze ngo duhindure imvugo ku rubyiruko rwa Afurika!”

Hagamijwe ngo AfDB igire ubuhinzi urego rubyara inyungu, iyi banki iheruka gushora miliyoni $800 mu gufasha imishinga y’urubyiruko mu bihugu umunani, bigomba kugera kuri 15 bitarenze impera z’uyu mwaka.

AfDB iteganya gushora miliyari $1.5 buri mwaka mu gihe cy’imyaka icumi iri imbere, mu gufasha imishinga y’urubyiruko rukora mu bijyanye n’ubuhinzi kuri uyu mugabane.

Muri Mutarama 2014, Clarisse Iribagiza yashyizwe n’ikinyamakuru ‘Lo Spazio della Politica’ cyo mu Butaliyani, ku rutonde rw’abantu 100 bahanze udushya ku Isi.

Muri Kamena 2015 , yashyizwe ku rutonde rwa ba Rwiyemezamirimo bakiri bato bo muri Afurika batanga icyizere, rwakozwe n’Ikinyamakuru Forbes nyuma yo gutoranywa mu bandi benshi.

Clarisse Iribagiza mu 2010 akiri umunyeshuri yashinze ikompanyi ikora Porogaramu z’ikoranabuhanga yaba iza telefoni n’iza mudasobwa yitwa ‘HeHe Labs’.

Mu 2011 yatangije ihuriro nyarwanda ry’ibigo by’abahanga udushya mu ikoranabuhanga rizwi nka ‘iHills’. Mu 2015, ikompanyi ya Iribagiza yinjizaga ibihumbi 200 by’amadorali ku mwaka, itanga amahugurwa ku banyeshuri bakiri bato kugira ngo bagire ubunararibonye mu gushakira ibisubizo ibibazo byugarije Isi binyuze mu ikoranabuhanga.

Iribagiza Clarisse yashyizwe mu kanama ka AfDB kazafasha Afurika guhanga imirimo miliyoni 25

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza