Umunyarwandakazi yabaye uwa mbere muto winjiye mu banyamuryango ba FAWE Africa

Yanditswe na Herve Ugirumukunda
Kuya 10 Ukwakira 2017 saa 07:58
Yasuwe :
0 0

Uwizihiwe Leonne Laura, niwe munyamuryango wa mbere ufite imyaka mike mu banyamuryango ba FAWE Africa, umuryango uhuza abagore bakora mu burezi bo ku mugabane wa Afurika.

Uyu mutegarugori w’imyaka 31, ni umwarimu wigisha indimi mu Ishuri ry’Abaluteri rya Rwamagana.

Yize mu ishuri rya FAWE Girls School ku Gisozi mu 1999, ubwo iryo shuri ryatangizwaga, ahava ajya kwiga muri Kaminuza y’Uburezi (yahoze yitwa KIE), ariko agakunda kuvuganira abana b’abakobwa ngo bahabwe amahirwe yo kwiga kimwe na basaza babo.

Uwizihiwe yabwiye IGIHE ko ari umwe mu bashinze ihuriro ry’abize mu ishuri rya FAWE mu Rwanda, bagatangira guhuza imbaraga bagamije kurengera abategarugori n’abakobwa bimwa uburenganzira bwabo.

Ati “Nibwo twatangiye gukora ibikorwa bitandukanye nk’ihuriro birimo gufasha abana bo mu muhanda kwita ku burere bw’umwana w’umukobwa, gusura abahuye n’ihohoterwa rishingiye ku gitsina n’ibindi.”

Ibi bikorwa Uwizihiwe yafatanyaga n’akazi k’ubwarimu, byatumye umuryango FAWE ku rwego rwa Afurika umuhamagara, umutumira mu nama rusange yawo yabereye i Lusaka muri Zambia ku wa 23 Kanama 2017.

Ahamya ko yagiyeyo ahagarariye u Rwanda agaharanira kurugaragaza neza, bituma agirwa umusemuzi mu irushanwa ry’amashuri yisumbuye yo mu bihugu 10 muri siyansi, ikoranabuhanga, ubwenjeniyeri n’imibare (STEM) ryabereye muri iyo nama.

Nk’uwize indimi kandi, yagizwe umusangiza w’amagambo mu biganiro bitandukanye byahuje abaminisitiri b’uburezi ndetse n’itangwa by’ibihembo.

Uwizihiwe na mugenzi we Teta Kayitaba, uyobora ihuriro ry’abize muri FAWE Girls School mu Rwanda banacuruje ibikorerwa mu Rwanda birimo ikawa, ibitenge, ibikapu, uduseke n’urusenda rw’Akabanga, byose byasuwe n’umufasha wa Perezida Edgar Lungu, anakunda urwo rusenda by’umwihariko.

Uyu mubyeyi w’abana batatu, ashimangira ko kuvuganira abagore n’urubyiruko n’imyitwarire ye muri iyo nama ari byo byatumye yinjizwa mu banyamuryango ba FAWE, ibintu bitari bisanzwe dore ko uwo muryango usanzwe ubamo abakomeye gusa.

Avuga ko kuba umunyamuryango wa FAWE byabanje kumutungura, kuko yiyumvishaga ko ari ibintu bimurenze nk’umwarimu; ariko ngo ntibizamubuza gukomeza umurimo w’ubwarimu, kuko umuhuza cyane n’urubyiruko rw’u Rwanda kandi ari rwo ashaka kuzavuganira mbere ya byose.

Ati “Byabanje kuntungura kuko numvaga ko ari ibintu bindenze, ariko naje gusanga uwo mwanya unkwiriye. Biransaba gukora cyane kuko ari ishema ku Rwanda, kuko rwatoranyijwe mu bihugu bisaga 30. Ndashaka gushyiramo imbaraga, nkazamura ibendera ry’igihugu nkakorana na Komisiyo y’Igihugu y’Urubyiruko na Minisiteri y’Uburinganire n’Iterambere ry’Umuryango n’iy’Urubyiruko.”

FAWE Africa ni umuryango uba mu bihugu 33 bya Afurika yo munsi y’Ubutayu bwa Sahara, ihuriramo ba minisitiri b’uburezi, abayobozi n’abarimu bo muri za kaminuza, bose b’abagore n’impirimbanyi z’uburenganzira bw’abari n’abategarugori.

Mu Rwanda uyu muryango utera inkunga abanyeshuri 1200, ukorana n’amashuri 17 arimo n’irya FAWE Girls School riherereye ku Gisozi mu karere ka Gasabo.

Uwizihiwe (hagati) yinjiye mu banyamuryango ba FAWE Africa
Umufasha wa Perezida wa Zambia, Esther Lungu yishimiye ibikorerwa mu Rwanda byamuritse n'abahagarariye FAWE
Uwizihiwe Leonne Laura yabaye uwa mbere muto winjiye mu banyamuryango ba FAWE Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza