Urugendo rwa Jesse, umwe mu nkingi zazamuye abanyamakuru bakomeye mu Rwanda (Video)

Yanditswe na Philbert Girinema
Kuya 28 Gashyantare 2018 saa 12:32
Yasuwe :
2 0

Jesse Maxella Kiyingi, wamenyekanye nka ‘Da’ African Son’ ku maradiyo atandukanye mu gihugu uhereye kuri Radio Flash FM, Contact FM, KFM, Royal FM na Kiss FM; ni umwe mu bafatwa nk’inkingi ya mwamba mu itangazamakuru ryo mu Rwanda bitewe n’uruhare rwe mu kugaragaza impano nshya.

Yamenyekanye cyane mu biganiro byo mu rurimi rw’icyongereza, abenshi bamwibukira ku cyitwa ‘Breakfast in the city’ na ‘Easy Sunday’ kuri Radio Flash akaba muri kamere ye umuntu ucisha make udakunda kugaragara mu ruhame ahubwo ‘wihugiraho’.

Yavukiye muri Uganda, akura arota kuba umunyamategeko kurusha uko yakwiga ibijyanye na siyansi. Gusa, yaje kwisanga muri Makerere University yiga ibijyanye n’ubukungu kuko yatekerezaga ko nabyo byazamuhesha kuba umuntu wiyubashye.

Uko yinjiye mu itangazamakuru…

Jesse asobanura ko ubwo yigaga ibijyanye n’ubukungu, mu kiruhuko yaje gusoma mu kinyamakuru ko hari amahirwe ku bashaka kwiga ibijyanye na radiyo na televiziyo; abyinjiramo gutyo.

Ati “Nyuma yaho, umuntu yaje kumbwira ngo ufite ijwi ryiza, wakora kuri radiyo. Ntangira gukora kuri radiyo mu biruhuko n’ikindi gihe nabaga ndi ku ishuri. Kuva ubwo sindarivamo. Nari nkiri muto, umunsi umwe umuntu yakunze ijwi ryanjye, aza kundeba kuri radiyo turaganira gusa yahise ajya mu Bwongereza, turakomeza turavugana. Ni we wambwiye ngo nzaze gusura umuryango we mu Rwanda.”

Mu 2005 ubwo yazaga gusura umuryango w’umuntu wakunze ijwi rye amwumvise kuri radiyo, yari akiri umunyeshuri, gusa akundwa n’uwo muryango umusaba kuba yaguma mu Rwanda ariko anakomeza amasomo ye muri Uganda.

Ni umwe mu batangiye kuri radiyo bahembwa agatubutse

Mu gihe itangazamakuru ryari rigicumbagira bihambaye, Jesse yatangiye akora kuri Radio Flash mu 2005, ahembwa amafaranga ibihumbi 250. Ni mu gihe ahandi hari higanje abakorerabushake n’abahembwa ay’intica ntikize nk’ibihumbi 30 Frw cyangwa 50.

Ati “Mu 2005, guhembwa ibihumbi 250 Frw kuri radiyo, ndakeka nari umwe muri ba bantu bahembwa neza. Ndibuka bagenzi banjye bahembwaga 20, 30 abandi bakorera ubuntu. Icyo gihe naje hano, Radio Flash FM irambwira ngo irampemba ibihumbi 250 Frw, ndavuga nti ni amafaranga meza nanjye yamfasha kwibeshaho nsubiye muri Uganda.”

Aha ni mu mpera za 2017 ubwo yashyikirizwaga igihembo cyagenewe Radio Kiss FM nk'iya kabiri ikunzwe mu gihugu

Ikinyarwanda cyabaye imbogamizi

Mu myaka ya mbere mu Rwanda, asobanura ko yari acumbitse mu Mujyi wa Kigali ku Gisozi. Ngo umunsi umwe, yageze ku Kinamba ahasanga icyapa cya MTN cyanditseho ijambo ‘Bite?’

Ibyo byatumye yibaza icyo bisobanuye, abisanisha n’icyongereza ku ijambo ‘bite’ [kuruma ukoresheje amenyo]. Ati “Byansabye nk’imyaka itatu kugira ngo ntangire nibone mu Kinyarwanda, ngikunde. Numvaga nakomeza kuvuga icyongereza, kuko sinatekereza ko nzamara imyaka myinshi mu Rwanda.”

Nk’umwe mu bantu bamaze igihe kinini mu itangazamakuru ryo mu Rwanda, asobanura ko irijyanye na radiyo ryahindutse cyane uhereye ku buryo amajwi asigaye asohoka, ndetse bigahurirana n’uko hari ihangana ku murimo.

Ibikwiye kuranga umunyamakuru mwiza w’ibiganiro

Jesse asobanura ko mu myaka yo hambere, wasangaga abantu bumva ko umunyamakuru mwiza w’ibiganiro kuri radiyo ari ufite ijwi ryiza gusa ngo muri iki gihe byarahindutse.

Ati “Bisaba ko uhuza ubushobozi bwawe karemano ni ukuvuga ijwi ryawe, uburyo witsa mu mivugire; ukanashyiramo imbaraga. Niba ushaka kuba umunyamakuru mwiza, bigusaba gusoma, ukora ubushakashatsi; ugomba kumenya ibigezweho, ugomba kumva amaradiyo atari ukumva amakuru ahubwo ugamije kumva uko abandi bakora. Icy’ingenzi kurusha byose ni uko kumenya kubara inkuru bikugira umunyamakuru w’igitangaza.”

Ibi nibyo Jesse aheraho avuga ko umwe mu banyamakuru beza u Rwanda rufite muri iki gihe ari Sandrine Isheja Butera. Uyu mugore yamamaye kuri Radio Isango Star avuye kuri Salus FM akomereza no ku yandi nka KFM mbere yo kujya gukora kuri Kiss FM.

Ati “Buri gitondo aba ari kubara inkuru yaba inkuru z’urukundo, cyangwa se iz’ihumure kandi aba afite abantu benshi bamukurikiye kuko aba ari kubara inkuru. Habazaho undi munyamakuru wa radiyo mwiza nka Sandrine, yego. Ariko umunyamakuru mwiza ubara inkuru ni Sandrine.”

Ni umwe mu bazamuye impano z’abanyamakuru bazwi mu gihugu

Benshi mu banyamakuru yaba abamenyekanye mu biganiro bisanzwe cyangwa mu mikino, bazamuwe na Jesse wagiye ubatinyura, akababwira ko bashoboye. Niwe wahaye Nkusi Arthur igitekerezo cyo kuba yakwiyita ‘Rutura’ ku buryo biba izina abantu bamumenyeraho byoroshye.

Uwera Maurice ukora mu ishami ry’amakuru n’ibiganiro kuri Televiziyo y’u Rwanda asobanura ko bahuriye muri hoteli yakoragamo mu Kinigi i Musanze hanyuma Jesse yumvise ijwi rye amusaba ko yazajya kumureba kuri Radio Flash.

Aganira na IGIHE, Uwera yagize ati “Njye navuga ko ubumenyi yampaye nta kaminuza n’imwe ibwigisha. Twahuye mvuye gukora muri hoteli, nari maze imyaka irindwi muri hoteli ariko nakundaga kunenga abanyamakuru batandukanye. Ubwo twahuraga rero, yarambwiye ngo ngwino uvugane na nyiri radiyo, ntangira ntyo.”

“Ni wa muntu iyo yakubonyemo impano, aragufasha, yakundaga kumbwira ngo ‘ndabizi ibi wabishobora’. Natangiye ntashobora kuvuga ikintu icyo aricyo cyose cya politiki, mbese niwe wagejeje benshi muri twe aho turi ubu.”

Jesse kandi yagize uruhare mu kuzamura impano z’abandi barimo Theogene Rugimbana ukora mu ishami ry’urubuga rw’imikino kuri Radio One na mugenzi we Rutamu Elie Joe.

Ati “Hari umugore twahuriye muri restaurant i Kampala, ndamubwira nti ufite ijwi nk’irya Juliana Kanyomozi [icyo gihe yari umwe mu bagezweho mu gihugu] nti ariko ubashije kurikoresha; byakugeza aheza. Uyu munsi ni umwe mu banyamakuru bakomeye muri Uganda. Naramutwaye mujyana mu kiganiro cyanjye, mumenyereza ibyumweru bike ubundi ndamureka. Kubona abanyempano rimwe na rimwe ni amahirwe.”

Uyu mugabo kandi niwe wagize uruhare mu iterambere ry’abanyamakuru nka Peter Muyombano wahembwe nk’umunyamakuru w’umwaka mu 2017; Vital Karangwa uyobora Ishami ry’amakuru kuri Radio Flash Fm n’abandi benshi.

Yishimira ko yatanze umusanzu mu kuzamura Radio mu Rwanda

Jesse akomeza agira ati “Ndatekereza ko naba naragize uruhare mu iterambere ryo kubyaza amafaranga radiyo mu Rwanda. Ubwo nari kuri Contact FM, hatangijwe ikiganiro cyitwaga Cross Fire. Cyakorwaga na Charles Haba na Arthur Asiimwe [uyobora RBA] ninjye watunganyaga ikiganiro cyabo. Twatangije urugendo rwo kuvuga ngo mu Rwanda, hashobora kubaho ibiganiro mpaka kuri radiyo? Icyo gihe hari ubwoba bw’ibyo umuntu yavuga cyangwa adakwiye kuvuga.”

Nyuma yaje kugira uruhare mu gutangiza ikiganiro cyitwa Good Morning Rwanda kuri Flass FM, kigira uruhare mu guhindura imyumvire y’Abanyarwanda no gukemura ibibazo bitandukanye byaba byagitambukijwemo.

Ikindi yishimira ni uko hari uburyo ibigo byagiye bihindura imyumvire, bigakangukira kwamamaza ibikorwa byabyo ku buryo byinjiriza amafaranga amaradiyo kandi nabyo bikamenyakana.

Urugendo rw’itangazamakuru mu Rwanda ruracyari rurerure

Jesse asobanura ko itangazamakuru mu Rwanda rigifite urugendo rurerure kugira ngo rigere ku rwego rwo mu bindi bihugu uhereye ku kuba abanyamakuru badashyira imbaraga mu gukora inkuru zigaruka cyane ku buzima bw’igihugu n’abaturage.

Yaguze ati “Nk’umunyamakuru, nkwiye kugaragaza ibibura nkasaba ko hari igikorwa. Rimwe na rimwe ku ruhande rwacu ntidukora ibyo twagakwiriye niyo mpamvu uzasanga ubwiganze bw’inkuru za siporo ubure biriya bindi by’ingenzi. Umunyamakuru wo mu Rwanda akwiye kurebana ubushishozi inkingi zigize u Rwanda zose ziri muri Vision 2020; buri munsi dukwiye kuba twibaza ngo turi he?”

“Uyu munsi ni 2018, twari dukwiye kuba twibaza ibibazo by’ingenzi tuti ni he twananiwe. Ese turi kugera ku cyerekezo 2020, iyo wumvise inkuru dufite kuri radiyo ntabwo zigaruka ku cyerekezo 2020 ahubwo ibyo dufite ni shampiyona y’u Bwongereza, indirimbo nshya ya Jay Polly. Dukeneye inkuru zigaragaza uko iki gihugu kiri gutera imbere, dukeneye kureba ese iri shoramari riri gukorwa, inyungu zizaza ryari ku buryo bitazaba umutwaro ku gihugu. Abakoze amakosa bakabiryozwa.”

Jesse yemeza ko Sandrine Isheja ari we munyamakuru wa mbere mu Rwanda
Jesse amaze kwandika izina rikomeye mu itangazamakuru ryo kuri radiyo mu Rwanda biturutse ku ijwi rye rikundwa na benshi
Peter Muyombano uherutse guhembwa nk'umunyamakuru w'umwaka mu Rwanda ni umwe mu bazamuwe na Jesse
Isheja Sandrine yamamaye mu biganiro byo kuri Radio Isango Star na KFM yanyuzeho na Kiss FM abarizwaho
Rutamu Elie Joe wa Radio 1 (ubanza iburyo) yafashijwe na Jesse kuzamura impano ye mu itangazamakuru ubwo yari akiri umunyeshuri i Nyagatare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza