Kwamamaza

Uwiringiyimana yigobotoye ingoyi y’ubukene ahereye ku mafaranga 200

Yanditswe kuya 27-08-2016 saa 11:15' na Kwizera Prudence


Drocelle Uwiringiyimana avuga ko yabayeho igihe kirekire we n’umugabo bakennye cyane, ariko nyuma y’imyaka itandatu ayobotse itsinda ryo kuzigama no kugurizanya yabashije kwikura mu bukene, kuri ubu bakaba bafite umutungo ubarirwa muri miliyoni zirenga 10.

Uyu mubyeyi w’imyaka 31 y’amavuko atuye mu mudugudu wa Nyarwumba, akagali ka Muyogoro, umurenge wa Huye, mu karere ka Huye, mu buhamya bwe agaragaza uburyo umuryango we wabayeho igihe kirekire ukennye, n’uburyo yabashije kwiteza imbere ahereye ku mafaranga 200 y’u Rwanda yonyine.

Uwiringiyimana kuri ubu we n’umuryango babayeho mu buzima bwiza, aho babasha kwibonera ibyangombwa byose by’ibanze, kwigurira umusanzu w’ubwisungane mu kwivuza ku buryo bworoshye n’ibindi.

Kuri ubu avuga ko asigaye afite konti muri banki kandi yitabira kuyizigamaho, ndetse n’umutungo we n’umugabo we ukaba ubarirwa muri miliyoni zirenga 10.

Uwiringiyimana yashatse umugabo mu mwaka wa 2006 batangira kubaho batunzwe no guhinga ibijumba no guca incuro kuko bari bafite isambu nto itabasha kuvamo umusaruro uhagije.

Muri icyo gihe bari batuye muri Nyakatsi, barara hasi ku musambi ushashe hejuru y’ibyatsi (Nyakatsi yo ku buriri), byatumaga kwigobotora ubukene bibabera ihurizo rikomeye.

Mu mwaka wa 2011, Uwiringiyimana yagannye ishuri ryigisha abakuze gusoma, kubara no kwandika, abigiriwemo inama n’umuturanyi we ndetse kuva icyo gihe yahise yishyira hamwe na bagenzi be mu itsinda ryo kuzigama no kugurizanya.

Uwiringiyimana asobanura ko muri iri tsinda yajyaga yizigama amafaranga 200 buri cyumweru yasaguraga kuyo yabaga yakuye mu bijumba avuye kugurisha ku isoko.

Ati “Kubera ko twahingaga ibijumba gusa, nafataga nk’igitebo kimwe nkakijyana ku isoko kugira ngo mbashe kugura imboga zo kubirisha. Ubwo natangiye kujya mfataho amafaranga 200 nkayazigama mu itsinda”.

Bitewe n’amahugurwa yahawe mu itsinda uyu mubyeyi w’abana babiri yafashe umwanzuro wo kwaka inguzanyo y’amafaranga ibihumbi 20 mu itsinda atangira gucuruza avoka.

Ati “Maze kugurizwa ibyo bihumbi 20 naragiye mpita ndangura avoka z’ibihumbi 2 500, ndazicuruza nkuramo ibihumbi 5 200. Mu gihe gito ntangira kubona inyungu ifatika ndetse n’inguzanyo nari nafashe ndayishyura”.

Uwiringiyimana avuga ko yakomeje gucuruza avoka maze nyuma y’imyaka itatu, agura amasambu abiri, ahita atangira guhinga inyanya n’ibindi bihingwa mu buryo bwa kijyambere. Nyuma y’igihe gito yatangiye kugemurira amasoko, ibyo yabaga yasaruye.

Bimwe mu bikorwa bifatika avuga ko we n’umugabo we bamaze kwigezaho, harimo inzu nziza bubatse bava muri nyakatsi, ndetse n’amatungo baguze arimo inka y’ibihumbi 80, ingurube y’ibihumbi 40, n’andi matungo magufi.

Ati “Ubu dufite inzu nziza iteye sima inyuma kandi vuba aha turateganye no kuyishyiramo imbere natwe tukajya dukoropa. Dufite ibikoresho byo mu nzu bigezweho kandi ntitukiryama hasi ku byatsi, kuko twiguriye matela. Ikindi twabashije kwigezaho ni inka y’ibihumbi 80 n’ingurube y’ibihumbi 40 kandi ubu twarayibangurije yenda kubwagura”.

Uyu mubyeyi watowe muri komite y’umudugudu wa Nyarwumba nk’ushinzwe amajyambere avuga ko yakomeje kwizigama mu itsinda kandi n’umugabane wazamutse kuko ubu buri wese yizigama amafaranga 500 buri cyumweru.

Uwiringiyimana wifitiye icyizere cy’ubuzima bw’ahazaza avuga ko akiri mu bukene bukabije yahoraga acecetse kandi yigunze.

Mu kiganiro yagiranye na IGIHE, Uwiringiyimana yatangaje ko akomeje inzira yo kwiteza imbere, aho muri uyu mwaka afite intego yo kugura moto akayiha umumotari akajya amwungukira.

Avuga ko kuri ubu asigaye azi gusoma, kubara no kwandika, kandi ubumenyi bujyanye no kwiteza imbere ndetse no gucunga umutungo yakuye mu itsinda agenda abusangiza umugabo we kuri ubu nawe akaba yaramwemereye ko agiye gutangira kwizigama mu itsinda.

Uwiringiyimana agira inama abantu bari mu bukene by’umwihariko abagore, abatazi gusoma kuyoboka isomero ry’abiga bakuze, kuko ari amahirwe Leta y’u Rwanda yashyizeho akwiye kubyazwa umusaruro.

Yashimangiye ko hari icyizere cy’uko kujijuka, kwibumbira mu matsinda yo kuzigama no kugurizanya ndetse no kwitabira umurimo ari umusingi w’iterambere.

Icyo ashyize imbere ni ugukomeza ibikorwa bizamura ubukungu bw’umuryango we kandi abana be akabaha uburere, agakomeza no kubatoza kugana ishuri no kwiga bashyizeho umwete, kuko ngo adashaka ko hazagira ubaho nabi mu buzima bumeze nk’ubwo we n’umugabo we banyuzemo.

Drocelle Uwiringiyimana, asangiza imbaga y'abaturage inzira yanyuzemo yigobotora ingoyi y'ubukene
Bamwe mu babyeyi bakurikirana ubuhamya bwa Uwiringiyimana
Ababyeyi batandukanye bumvise ubutwari bwa Uwiringiyimana bakoma mu mashyi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved