Yahereye ku migozi itanu ya Internet, ageze ku iduka rinini ry’ikoranabuhanga

Yanditswe na Kanamugire Emmanuel
Kuya 29 Ukwakira 2016 saa 12:32
Yasuwe :
0 0

Uko ikoranabuhanga rigenda ritera imbere mu Rwanda, niko hagenda hakorwa byinshi kugira ngo abantu barusheho kuribyaza umusaruro ari nako uburyo bwo gukoresha Internet kuri za mudasobwa na telefoni zigendanwa burushaho koroshywa.

Mu myaka itanu ishize ariko siko byari bimeze kuko kubona Internet kuri mudasobwa akenshi wasangaga bisaba gukoresha umugozi ndetse ahenshi nko muri za kaminuza ikaba itari ihagije ugereranyije n’umubare w’ababaga bayikeneye.

Ibi byatumye Ndukulikirabakuru Jean Leonard wigaga i Butare mu yahoze ari Kaminuza y’u Rwanda yiyemeza gutangira kuyicuruza muri bagenzi be b‘abanyeshuri, icyo gihe ahera ku migozi itanu.

Mu kiganiro yagiranye na IGIHE, Ndukulikirabakuru yagize ati” Natangiriye ku migozi itanu, nyuma nzana imigozi 10 ya metero ebyiri. Nyuma ariko byaje kuba ngombwa ko bazana Internet idakoresha umugozi(wireless). Ibi ntibyanciye intege ahubwo natewe imbaraga n’inyungu nari narakuye mu gucuruza imigozi, mpita ntangira gucuruza ibindi bikoresho byoroheje bikenerwa kuri mudasobwa.”

Mu Kiganiro yahaye IGIHE, Ndukurikirabakuru yavuze ko nyuma y’amezi umunani acuruza ibikoresho bitandukanye birimo imigozi yinjiza umuriro mu mashini (adaptateur), yaje kugura mudasobwa ebyiri(laptop) zivuye mu mafaranga yari yaragiye yunguka maze na zo arazicuruza.

Ni nabwo kandi yahise agira igitekerezo cyo gukomeza kwagura ibikorwa bye binyuze mu mafaranga yagendaga yunguka maze mu 2011 ashinga sosiyete yitwa IHAHA Technologies kuri ubu imaze kwaguka mu buryo bugaragara.

Yagize ati” IHAHA Technologies imaze imyaka itanu icuruza ibikoresho bitandukanye by’ikoranabuhanga. Tugenda twongeramo ibindi bintu abantu bakenera cyane nk’amasaha na za televiziyo. Uko ubucuruzi bwaguka niko tugenda twongeramo ibindi. Dufite amashami abiri, i Kigali n’i Huye.”

Ndukulikirabakuru avuga ko kuri ubu icyo ashyizemo imbaraga ari ugukora ubucuruzi bwo kuri Internet (Online shop) ku buryo igikoresho cyose bafite mu maduka, umuntu ashobora kukigura anyuze kuri website ya IHAHA Technologies (www.ihahaonline.com) ubundi bakakimugereza aho ari hose mu gihugu.

Ati”Umwihariko wacu ni umuvuduko dukoreraho. Uramutse uguze ikintu ukibona mu gihe gishoboka kandi ukishyura tukikugejejeho. Ikindi kandi icyo ubonye ku rubuga rwacu, kiba kimeze neza nk’iki mu iduka. Ntabwo twerekana ibintu tudafite mu iduka ryacu.”

Uretse ibikoresho bitandukanye birimo za laptop, desktop, printer, camera, scanner, banatanga izindi serivisi zirimo gufasha abantu kubona internet(Networking) ndetse n’ibigo by’amashuri bigafashwa kugira za laboratwari hakoreshejwe mudasobwa imwe(CPU) na screen nyinshi, ibyo bita N-Computing.

Aho Ihaha Technologies bakorera mu nyubako ya 2000 mu mujyi wa Kigali
Bimwe mu bikoresho usanga mu Ihaha Technologies
Igikoresho uguze mu Ihaha Technologies iyo kigize ikibazo bagufasha kugikora
Imwe muri Mudasobwa ushobora gusanga mu Ihaha Technologies

Amafoto:Luqman Mahoro
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244