Umunyarwandakazi Kaneza Elisabeth uba mu gihugu cy’u Budage yashinze ihuriro rihuza urubyiruko rw’ Abanyarwanda baba mu Budage, Ruanda Connection, aho kugeza ubu hari ibikorwa byinshi we na bagenzi be bamaze gukora byo guhuriza hamwe urubyiruko.
Mu Kiganiro kirambuye Kaneza Elisabeth w’imyaka 25 y’amavuko, yasobanuriye IGIHE aho igitekerezo cyo gushinga iryo huriro cyaturutse, ndetse n’uko yabashije gushyira mu bikorwa icyo gitekerezo cye.
IGIHE : Turagushimiye kuba uduhaye umwanya wo kuganira nawe, ese watwibwira kugirango abatakuzi babashe kukumenya ?
Kaneza : Nitwa Kaneza Elisabeth mba mu Budage hashize imyaka 18 ariko navukiye mu Rwanda, mfite imyaka 25, ndakora kandi ndimo ndaniga ikiciro cya gatatu cya kaminuza.
IGIHE : Uwakumva imyaka umaze mu Budage ntabwo yatekereza ko uvuga Ikinyarwanda kimeze gutya, ni irihe banga wakoresheje kugirango ukomeze uvuge Ikinyarwanda kandi neza ?
Kaneza : Ikinyarwanda navuye mu Rwanda mvuga gikeya ariko ngeze hanze nibwo nakimenye cyane kuko ababyeyi banjye bakomeje kukivuga, ariko tuniga n’Ikidage kandi dutozwa kuvuga Ikinyarwanda mu rugo.
IGIHE : Kugirango se muve mu Rwanda mujya kuba mu Budage byagenze gute ?
Kaneza : Twavuye mu Rwanda mu gihe cya Jenoside ubwo twari duhunze, ni uko twaje dutangira amashuri n’ababyeyi babona akazi, duhitamo kuba mu Budage.
IGIHE : Ubu se ujya ukurikira amakuru yo mu Rwanda ?
Kaneza : Amakuru yo mu Rwanda ndayakurikira, n’ukuntu ibihe byagiye biba byiza n’ababyeyi bagasubira mu Rwanda bakahasura natwe tukahasura. N’ubwo byamfashe igihe kinini kugirango ntinyuke gusubira mu Rwanda ariko ubu njyayo nibura rimwe mu mwaka, kandi mbona harabaye heza cyane. Njyayo bwa mbere naratunguwe kuko usanga abantu baba hanze baza mu Rwanda aribo baba bafite ikibazo kugirango baze mu gihugu, abantu mu gihugu ubona barateye imbere kandi bafungutse mu mutwe.
IGIHE : Ese nkawe nk’umuntu w’urubyiruko utekereza iki ku gihugu cyawe ? Utekereza kuba uzagaruka se, cyangwa wafashe ubwenegihugu bw’u Budage ?
Kaneza : Ntabwo nafashe ubwenegihugu, gusa numva ndi Umunyarwanda kandi ushobora kuzasubira mu Rwanda kubayo. Gusa numvaga ko igihugu cyakora uburyo bwo gutanga amahirwe ku rubyiruko kandi bakabona icyo bakoresha ubumenyi bafite ariko ibi biragenda bigerwaho kuburyo mbona hari ikizere cy’ahazaza igihugu gifite.
Uko yashinze ihuriro
IGIHE : Ni iki se uteganya mu gufasha urundi rubyiruko rutarabasha kugera mu Rwanda kumenya amakuru yarwo ?
Kaneza : Mvuye mu Rwanda natangiye kuganira n’urundi rubyiruko bambaza uko nagiye yo, kuko bari bafite ibibazo byinshi bibaza, urubyiruko rubura amakuru kubera kuba hanze igihe kinini, ibi rero byo kutabona amakuru ahagije bituma abana bato batinya kugaruka gusura igihugu cyabo.
Aho rero niho nakuye igitekerezo cyo kuba nashinga ihuriro, maze nkabasha kugeza ya makuru meza yo mu Rwanda ku bandi baba mu mahanga nkanababwira ko hari urubyiruko rurimo kubaka igihugu kandi ubu dufite igihugu kimwe, gitandukanye n’icy’ababyeyi bacu, kuko ubu hari ikindi gihugu y’abakiri bato, gikomeye, gikora, kandi cyinihuta mu iterambere kandi dufite inyungu zimwe kuko dukunda ikoranabuhanga, iterambere ndetse n’ibindi. Aho rero niho mu mutwe wanjye hajemo ijambo Connection (Umuyoboro) ntekereza guhuza urubyiruko rw’Abanyarwanda baba hanze mfata icyemezo cyo gutangira gutyo.
IGIHE : Ese iri huriro ryatangiye ryari, kuva ryatangira mumaze kugera kuki ?
Kaneza : Iri huriro ryatangiye mu mwaka wa 2011, dutangira duhuza Abanyarwanda bari i Berlin n’inshuti z’u Rwanda dukora ibirori byo kwizihiza Noheli, byabaye byiza kuko aribwo bwa mbere byari bibaye, kandi byari byiza bitangaje kuba ari urubyiruko rutangiye guhuza Abanyarwanda, ibi byaturutse mu rubyiruko rw’Abanyarwanda badaheruka mu Rwanda cyangwa se n’abandi batari bagerayo. Kugeza ubu turi batanu mu buyobozi, ariko tumaze guhuza urubyiruko rwinshi aho dukoresha cyane cyane imbuga nkoranyambaga.
Twakoze kandi n’irindi huriro ry’i Kigali kugirango n’urubyiruko ruri mu Rwanda ruduhe amakuru, dore ko hari ababaye mu mahanga bagasubira mu Rwanda, ibi byose tubikora kugirango habe amakuru atandukanye urubyiruko ruhanahana.
IGIHE : Hanyuma ubu mukora iki muri iri huriro ?
Kaneza : Tuzi ko hari urubyiruko ruri hanze rufite amatsiko yo kumenya ibiri mu Rwanda, bakibaza ngo amahirwe dufite mu Rwanda ni ayahe ? Hari Urubyiruko ruba hanze ariko rutabona icyo rwaza gukorera mu Randa dore ko n’imiryango yabo iba hanze cyangwa se batagifite abavandimwe mu gihugu. Ibyo rero nibyo bituma dukora kugirango dusobanurire urwo rubyiruko amahirwe babona n’ibyiza biri mu gihugu cyabo.
Icya mbere ariko twakoze ni ugushaka uburyo Urubyiruko rwabanza guhura kandi tukanakomera ku muco wacu, kuko dufite ababyeyi bawuzi, ndetse bakanatwigisha amateka tukagarura umuco Nyarwanda mu buzima bwacu hanze. Kuko urubyiruko usanga barakuriye hanze bakagerageza gufata umuco w’ahandi ariko sosiyeti ubamo bahora bakubwira ko utari uwaho n’iyo waba ufite ubwenegihugu bakubaza inkomoko yawe byanga bikunze.
IGIHE : Ese ubona urubyiruko rw’Abanyarwanda rukeneye iki ?
Kaneza : Kuri ubu urubyiruko icyo rukeneye ni ukurubaha amahirwe bakabona icyo bagomba gukora kandi bakabona ubushobozi, bakabona akazi, atari akazi gusa ariko ndetse bakabona n’aho babonera aho bagararariza impano zabo bakabona aho bashyirira mu ngiro ubumenyi bafite, kandi icyi mbona ibi ari iby’ingenzi cyane, gufasha urubyiruko kwifasha. Ibi biragenda bigerwaho,twafata nk’urugero rw’urubyiruko rwinshi rwarangije amashuri bagatangira guhanga imirimo cyangwa se bakaba abahanzi. Iri ni iterambere ryiza.
IGIHE : Ni iki wabwira ababyeyi barerera mu mahanga
Kaneza : Ababyeyi ni ingirakamaro nibo bafite urufunguzo rwo gutuma abana basubira mu Rwanda cyangwa se bagira ubushake bwo kuhagaruka, gusa icyo nababwira ni uko ibyo ababyeyi banyuzemo byaba byiza cyangwa bibi badakwiye kugusha abana mu mateka, niba ibyiza cyangwa ibibi dufatanyirize hamwe kubikosora ariko byegutuma abana banga iwabo kuko ibyabaye mu Rwanda byose byabaye hagati y’abantu, gusa twemere ko abana batagomba kugwa muri ayo mateka. Kuko n’iyo wakurira mu mahanga uba byanga bikunze ushaka kumenya aho ukomoka, kandi n’ababyeyi nabo bagerageza bashake amakuru y’ibibera mu gihugu cyabo.
IGIHE : Turagushimiye kuba wemeye kuganira natwe, kandi mukomeze mugire ibihe byiza.
Kaneza : Turabashimiye namwe murakoze.
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
