IGIHE.com > Amakuru
Scotland : Umuhanzi Samputu yatanze ikiganiro kuri Jenoside yakorewe Abatutsi

Scotland : Umuhanzi Samputu yatanze ikiganiro kuri Jenoside yakorewe Abatutsi


Yanditswe kuya 28-01-2013 - Saa 17:20' na Richard Irakoze

Umuhanzi Jean Paul Samputu, uri mu ngendo mu bihugu by’u Burayi nk’intumwa y’amahoro, yagiranye ibiganiro n’abanyeshuri barenga 150 bo mu mashuri yisumbuye y’i Glasgow muri Scotland (kimwe mu bihugu bigize ubwami bw’u Bwongereza (UK), yabaganirije kuri Jenoside yakorewe Abatutsi mu 1994, anababwira n’uko we yageze k’ubumwe n’ubwiyunge.

Mu iri byo biganiro byabaye mu cyumweru gishize muri Glasgow Film Theatre, Samputu yibanze ku buhamya bwe mu mihango ngaruka mwaka yo gutangiza ibyumweru bibiri byo kwibuka Jenoside yakorewe Abayahudi.

Mu nkuru yanditswe n’igitangazamakuru cyo muri Scotland, bagaragaza ko abo banyeshuri bari bafite amatsiko menshi yo kumenya ibya Jenoside yakorewe Abatutsi mu Rwanda.

Samputu yahawe umwanya wo kuganira n’abo banyeshuri, banamubaza kuri amwe mu magambo yabatangaje agaragaza ubumwe n’ubwiyungge bw’Abanyarwanda aho Samputu mu buhamya bwe yagize ati “Umuryango wanjye wose wishwe n’umuturanyi w’inshuti muri Jenoside, ariko kuko nabohoye umutima wanjye ndamubabarira, ndacyamwita inshuti.”

Aba banyeshuri bagize umwanya wo kumubaza ibibazo bitandukanye byiganzamo ibyo kubasobanurira uko Jenoside yagenze mu Rwanda.
Ibindi bibazo ni ugusobanura ibijyanye n’uko yabashije kubabarira abamwiciye akanashinga umuryango witwa Mizero ukora imishinga irimo uwitwa ‘Rwanda Forgiveness Project’ ugamije guharanira no gusakaza amahoro, ubumwe n’ubwiyunge.

Ibitangazamakuru byanditse ku bahamya bwa Samputu

Muri ibi biganiro hagarutswe no ku mateka ababaje y’ubwicanyi yabereye muri Jenoside yakorewe Abayahudi, Jenoside ya Cambodia, Bosnia na Darfur.

Mu 2007 nibwo Federasiyo mpuzamahanga y’Amahoro ku Isi yagize Samputu intumwa y’amahoro. Mu 2009, Samputu yatowe igihembo mpuzamahanga cy’amahoro gitangwa na World Vision.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO