Abakuru b’ibihugu bya EAC bagiye kuganira ku mishinga y’ibikorwa remezo n’ubuzima

Yanditswe na IGIHE
Kuya 17 Gashyantare 2018 saa 08:42
Yasuwe :
2 0

Abakuru b’ibihugu bigize Umuryango wa Afurika y’Iburasirazuba (EAC), mu cyumweru gitaha bazahurira mu mwiherero i Kampala, biga ku ngingo zirimo ibikorwa remezo, gutera inkunga urwego rw’ubuzima n’iterambere.

Uyu mwiherero ugamije kurebera hamwe uko hakongerwa imbaraga mu kugera ku ntego z’iterambere ry’umuryango, icyerekezo 2063 n’intego z’iterambere rirambye (SDGs) mu nzego z’ubuzima n’ibikorwaremezo.

Uzabanzirizwa n’inama zihariye ku bikorwaremezo n’izahuza abashoramari n’abaterankunga mu rwego rw’ubuvuzi, ziteganyijwe ku wa 21 Gashyantare 2018.

Umunyamabanga wa Leta muri Minisiteri y’ububanyi n’amahanga, ubutwererane n’ibikorwa by’Umuryango wa Afurika y’Iburasirazuba, Olivier Nduhungirehe, yabwiye The New Times, ko nyuma y’uyu mwiherero w’iminsi ibiri hazakurikiraho inama isanzwe y’abakuru b’ibihugu bya EAC, na wo uzabera i Kampala.

Yagize ati “Tugiye gusuzuma aho gahunda za EAC zigeze, twige ku bibazo umuryango uhura na wo, n’ibijyanye no gutera inkunga imishinga y’ibikorwaremezo mu muryango.”

Yemeje kandi ko Abakuru b’Ibihugu bazanaganira kuri gahunda ihuza Leta Zunze Ubumwe za Amerika n’ibindi bya Afurika yo munsi y’ubutayu bwa Sahara,“African Growth and Opportunity Act (AGOA). Iyi gahunda yajemo agatotsi bitewe n’icyemezo cya EAC cyo guca Caguwa.

Iyi nama izaba ifite insanganyamatsiko yo “Gushimangira no kwagura ukwihuza kw’ibihugu binyuze mu bikorwaremezo no guteza imbere urwego rw’ubuvuzi”, iziga uburyo bwo kugera ku ntego z’umuryango, icyerekezo cya Afurika 2063 n’Intego zigamije Iterambere rirambye.

Umunyamabanga Mukuru wa EAC, Liberat Mfumukeko, ubwo yatangazaga aho imyiteguro y’uyu mwiherero igeze, yavuze ko witezweho ugushyira hamwe kw’ibihugu mu mishinga y’akarere, kuyitera inkunga ndetse no kwiga ku ruhare rw’abikorera muri iyo mishinga.

Yavuze ko EAC yahisemo guteza imbere ibikorwa remezo n’urwego rw’ubuzima kuko ari inzego zikwiriye gushorwamo imari nyinshi hagamijwe kugera ku iterambere ry’ubukungu n’uburumbuke bw’akarere ka Afurika y’Iburasirazuba.

Yagize ati “Reka mbizeze ko ishoramari mu bikorwaremezo n’iterambere ry’urwego rw’ubuzima bizakomeza kwitabwaho cyane mbere na mbere n’Abakuru b’Ibihugu bya EAC.”

Uyu ni umwiherero wa kane w’abakuru b’ibihugu bya EAC ku gutera inkunga imishinga y’ibikorwa remezo n’iterambere. Uheruka kuba mu 2008, 2012 na 2014. Muri icyo gihe imishinga myinshi mu bwikorezi, ingufu n’ubwikorezi bw’indege yagiye itoranywa ngo ihabwe ingufu, ndetse hashakwa uburyo ibonerwa ubushobozi ngo ishyirwe mu bikorwa.

Ni ubwa mbere ariko habaye umwiherero uhuje abakuru b’ibihugu abashoramari n’abaterankunga mu rwego rw’ubuzima. Ubaye mu gihe hari kuba impinduka nyinshi mu bijyanye n’ubuvuzi, aho usanga akarere kagikomerewe n’indwara zirimo malaria, Igituntu, Virusi Itera Sida, ibibazo bishingiye ku buzima bw’ababyeyi n’abana, umuvuduko w’amaraso, diyabete na za kanseri n’izindi z’ibyorezo n’izishingiye ku mihindagurikire y’ibihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza