Abarerewe i Gatagara baba i Burayi bavuze ibigwi Padiri Fraipont

Yanditswe na Twarabanye Venuste
Kuya 20 Ukwakira 2019 saa 11:44
Yasuwe :
0 0

Abarerewe mu kigo cy’abafite ubumuga cy’i Gatagara (Home de la Vierge de Pauvre: HVP Gatagara) baba ku mugabane w’i Burayi bavuze ibigwi bya Padiri Ndagijimama Fraipont wagishinze, bagaruka ku rukundo yagiraga, uko yabagize abagabo n’uburyo yakiraga uwamuganaga wese.

Padiri Joseph Julien Adrien Fraipont Ndagijimana yoherejwe i Nyanza mu Rwanda kwigisha mu ishuri ryitiriwe Kristo Umwami (Collège Christ-Roi) mu 1957.

Nyuma yaje kubihagarika asaba musenyeri w’i Liège mu Bubiligi kumufasha agashinga ikigo cyita ku bafite ubumuga, yashinze mu 1962.

Mu gihe hizihizwa Yubile y’imyaka 100 amaze avutse, bamwe mu batuye ku mugabane w’i Burayi barerewe i Gatagara babwiye Radiyo Ijwi rya Amerika ko batazibagirwa urukundo rwe ndeste kuri bamwe ngo ni umutagatifu.

Alexia Mukazi, ni umwe mu bagejejwe muri Gatagara mu cyiciro cya kabiri, akurikiye aba mbere biswe ‘Cumi na bane babanje’.

Ati "Nageze i Gatagara ndi umwana mu 1961. Naje kureba mu mpapuro bambwira ko nahageze ku itariki ya mbere y’ukwa Munani, icyiro cyacu cyakurikiraga n’abo ‘bita cumi na bane babanje’. Ndibaza ko na bo baje mu ntango ya 1961. Ndi mu bana ba mbere niko umuntu yavuga, twari bake ku buryo nk’igihe twigaga turi amashuri ane, mu cyumba kimwe tuvuge mu mwaka wa mbere wasangaga ari nk’icumi, mu wa kabiri ari nka batatu, mu wa gatatu ari nka batanu gutyo, nibuka ko dutangira nari mu mwaka wa kane ndi umwe."

Akiri umwana ngo yakiriye urukundo ry’umubyeyi nk’umwana ariko ngo ntiyari yagasobanukirwa Fraipont uwo ariwe kugeza ubwo nyuma yo kuhiga, yagiye kuhakora ashinzwe imibereho, noneho akurikije ibyo yabonaga arushaho kumusobanukirwa.

Ati "Nakoze i Gatagara kuva mu 1975 mpava mu 1985, nari umukozi mu rwego rw’imibereho myiza, ubwo urumva nari negereye n’ibibazo by’abafite ubumuga hafi, ubwo niho navuga namenye neza Padiri Fraipont, imigambi ye, uwo ari we, urukundo rwe, ukuntu yitaga ku bantu bose bafite ububabare yego yari afite inshingano yo kumenya abafite ubumuga, ariko abantu bose baramuganaga, ari abakire ari abakene abantu bose umuryango wa Padiri wahoraga ukinguye.”

Avuga ko ari isomo abantu bose bakwiye kumwigiraho, agira ati “Jye numva ari naryo somo rikomeye twamufataho, guhora ukinguye guhora wakira abakugana, cyane cyane ukazirikana abababaye, abafite ubumuga, abadafite ibibatunga, abakuze, mbese buri gihe ugahora ufite icyo kintu nubwo buri wese aba agomba kwirwanaho.”

Rwubaka Charly uherutse kumuhimbira indirimbo yise "Colline de l’espoir" bishatse kuvuga agasozi k’amizero, yavuze atazibagirwa umunsi wa mbere agera i Gatagara Padiri Fraipont akamuterura icyo gihe ngo yumvise agize umubyeyi wa kabiri.

Ati "Ikintu mwibukiraho cya mbere nahageze mfite Imyaka itanu, ababyeyi bahangejeje, ndikwibuka ko yamfashe akanterura nkumva nk’aho ari umubyeyi wa kabiri noneho ababyeyi banjye banataha ntabwo narize, numvise ko mbonye undi mubyeyi ukomeye. Ibyo bintu iyo mbyibutse, nibuka ukuntu abana bose bo muri icyo kigo n’abahakora bose bafashanya nk’urugo rumwe."

Akomoza ku ndirimo ‘colline de l’espoir’ yavuze ko yayihimbye yibutse uburyo bageraga i Gatagara bakabona urukundo, bakaba abantu ntibongere kwitwa amazina yabapfobyaga.

Ati "Iyi ndirimbo nayihimbye nibutse ukuntu nabaye i Gatagara, Ikintu cyatumye nyandika cyane ni igihe nibutse, urupfu rwe, icyo gihe nabaga i Gatagara mu 1982. Abantu bose bararize biriwe barira, bamara icyumweru barira, tukibuka ko uwo mubyeyi ari we watugejeje aho tugeze. Iyo ndirimbo ikaba isobanura ukuntu umuntu yaje i Gatagara, agendera hasi, yagera i Gatagara aho twise agasozi k’amizero agahura n’urukundo rwa Padiri Fraipont akamugira umuntu, akamuhagurutsa akamuhesha agaciro."

Padiri Joseph Julien Adrien Fraipont Ndagijimana yabonye ubwenegihugu w’u Rwanda ahagana mu 1974. Yitabye Imana tariki ya 26 Gicurasi 1982 azize uburwayi yatewe n’umunaniro mwinshi kubera inshingano ze.

Padiri Joseph Julien Adrien Fraipont Ndagijimana yabonye ubwenegihugu w’u Rwanda ahagana mu 1974

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza