Abasenateri bafite impungenge ko ibiciro bishya by’ubwishingizi bw’ibinyabiziga bizatuma hari abaziparika

Yanditswe na Ferdinand Maniraguha
Kuya 6 Gashyantare 2018 saa 06:52
Yasuwe :
0 0

Abasenateri bagaragaje impungenge zitandukanye ku mwanzuro uherutse gufatwa wo kongera ibiciro by’ubwishingizi bw’ibinyabiziga.

Ihuriro ry’Ibigo by’Ubwishingizi mu Rwanda (ASSAR) riherutse gutangaza ko guhera tariki ya 1 Mutarama 2018, igiciro cy’ubwishingizi ku by’abandi byakwangirika, cyongerewe kuva kuri 40% kugeza kuri 73%; ubwishingizi ku by’abandi wakwangiza n’ibyawe byakwangirika bwongerwa kuva kuri 3.5% by’igiciro cy’imodoka kugeza kuri 4.5%.

Ibi biciro ntibyavuzweho rumwe cyane cyane ku ruhande rw’abafite ibinyabiziga ari na bo bishyura ubwishingizi bwabyo.

Mu kiganiro abasenateri bagiranye na Minisitiri w’Imari n’Igenamigambi, Amb. Claver Gatete, bagaragaje ko batewe impungenge n’uburyo ibyo biciro byazamuwe bitunguranye ndetse bikanagaragara ko hatitawe ku bukungu bw’abaturage.

Visi Perezida wa Sena, Harelimana Fatou, yavuze ko abona kongera igiciro cy’ubwishingizi bizungura sosiyete z’ubwishingizi cyane kurusha abakiliya bazo.

Fatou yavuze ko atumva uburyo abatunze imodoka biyongera umunsi ku wundi ariko sosiyete z’ubwishingizi zo zigahomba.

Yagaragaje ko hongerewe igiciro cy’ubwishingizi hatitawe ku izamuka ry’ubukungu bw’abaturage.

Yagize ati “Umuturage afite agahinda niba yari afite imodoka ahembwa ibihumbi 200 cyangwa 300, amafaranga y’ubwishingizi akaba yikubye kabiri kandi umushahara we utariyongera, ni ikibazo. Ntabwo tugomba kwigereranya n’ibihugu byateye imbere.”

Yongeyeho ati “Turimo kuzamura ubwishingizi ariko ubukungu bw’umuturage butazamutse. Harimo ikibazo. Na ba bandi bake bakoreshaga imodoka baraziparika cyangwa se bazigendemo nta bwishingizi.”

Senateri Ntawukuriryayo Jean Damascène, na we yavuze ko atumva uburyo ibiciro by’ubwishingizi byazamutse nyamara hatarebwe niba ubukungu bw’abaturage cyangwa imishahara yabo yariyongereye.

Yavuze ko niba sosiyete z’ubwishingizi zizajya zizamura ibiciro uko zishatse bishobora kuzabangamira bamwe bakaba banahitamo kugenda nta bwishingizi.

Ati “Ubundi ubukungu bwacu bugendera ku ihame ry’ubwumvikane hagati y’umuguzi n’ugura. Amabwiriza azanwa na BNR igaha abo mu bwishingizi gushyiraho ibiciro sinibwira ko bareba uko ubukungu bw’umuturage ufite imodoka bwazamutse.”

Yongeyeho ati “Numva ari ikosa kuko ntabwo uzamura igiciro cy’ubwishingizi ho 40 %, njye ufite imodoka amafaranga nijiza atazamutseho 40 %.Bizagera ahantu tuzajya tugenda mu modoka zitagira ubwishingizi .”

Minisitiri Gatete yavuze ko hajya kuzamurwa ibiciro hagendewe ku nyigo yakozwe n’ikigo cyigenga Acsterv ibisabwe na BNR, ko atari sosiyete z’ubwishingizi zabikoze.
Yavuze ko iyo nyigo yakozwe nyuma y’uko sosiyete z’ubwishingizi zigaragaje ko kugendera ku mategeko agenga ubwishingizi yari asanzweho biri kuzigusha mu gihombo.

Agaragaza zimwe mu mbogamizi zari ziriho yagize ati “Abandi nk’iyo habaye impanuka, ntabwo bishyura yose bagira aho bagarukira. Niba bavuze bati ‘ntibirenga miliyoni 50, ni aho bigarukira uko bakubarira kose ntibirenga aho. Twe ntaho bigarukira. Ni byiza ku bakorewe impanuka ariko kuri sosiyete z’ubwishingizi bituma bijya hejuru ndetse akenshi bituma n’igiciro cy’ubwishingizi kijya hejuru.”

Gatete yavuze ko hazamuwe ibiciro hakurikijwe iyo nyigo icyakora anasezeranya ko hari irindi tegeko rishya ry’ubwishingizi rigeze kure ritegurwa.

Yavuze ko ku bijyanye n’ubushobozi bw’abaturage ngo hari itegeko rigena umushahara fatizo rigiye kugezwa mu nama y’abaminisitiri, rizakemura icyo kibazo kuko ubu hifashishwaga umushahara fatizo washyizweho mu myaka igera kuri 40 ishize.

Yavuze ko impungenge abaturage bagaragaje z’uko ibiciro byabituye hejuru zumviswe, ibyo biciro bikaba bigiye kuzamurwa mu byiciro bibiri aho kubishyiriraho rimwe.
Hari ikindi cyifuzo cyatanzwe n’abasenateri cy’uko umuntu ukunda gukora impanuka ari we wajya ucibwa amafaranga menshi y’ubwishingizi, naho ugaragara ko atajya akora impanuka akagabanyirizwa.

Gatete yavuze ko ibyo bisanzwe bikorwa na sosiyete z’ubwishingizi, ko icyo Leta ikora ari ugushyiraho igiciro fatizo.

Yavuze ko bazakomeza kuganira n’inzego zitandukanye mu kunoza itegeko rigenga urwego rw’ubwishingizi.

Muri uyu mwaka ibiciro bizongerwa ku kigero cya 60 % noneho umwaka utaha byongerweho 40 % yari isigaye.

Mu Rwanda hari sosiyete z’ubwishingizi 14 zirimo 10 zitanga ubwishingizi rusange naho 4 zitanga ubwishingizi bw’ubuzima.

Uruhare rw’urwego rw’ubwishingizi ku musaruro mbumbe w’igihugu ruri kuri 1.7 %.

Senateri Gakuba Jeanne d'Arc; Perezida wa Sena, Bernard Makuza na Visi Perezida wa Sena, Harelimana Fatou
Senateri Mukasine Marie Claire
Minisitiri w'Imari n'Igenamigambi, Amb. Gatete Claver, yavuze ko hajya kuzamurwa ibiciro hagendewe ku nyigo yakozwe n’ikigo cyigenga Acsterv, nyuma y’uko sosiyete z’ubwishingizi zigaragaje ko kugendera ku mategeko agenga ubwishingizi yari asanzweho biri kuzigusha mu gihombo

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza