Gasabo: REG yakemuye ikibazo cy’umuriro muke ku ngo zisaga 4600 mu mezi atatu

Yanditswe na Mugabo Jean d’Amour
Kuya 14 Gashyantare 2018 saa 07:08
Yasuwe :
0 0

Iterambere ry’igihugu ndetse n’Umujyi wa Kigali ryagiye rituma inyubako nshya nyinshi zizamurwa kandi zose zikenera amashanyarazi, biremerera imiyoboro yubatswe kera, bigatuma akenshi umuriro ugenda uba muke cyangwa ugacikagurika.

Sosiyete Ishinzwe Ingufu (REG), yaratangiye kuvugutira umuti iki kibazo aho cyagiye kigaragara. Mu Karere ka Gasabo, ubu ingo zigera ku 4,610 zari zigifite ikibazo cy’umuriro udahagije ziracana neza.

Umuyobozi w’ishami rya REG rya Kacyiru, rikorera mu Mirenge ya Kinyinya, Gisozi, Kacyiru na Kimihurura, Emmanuel Bimenyimana, yatangaje ko kugira ngo bakemure iki kibazo, bashyizeho ibyuma biringaniza amashanyarazi bikayashyira ku gipimo cyifuzwa (transfomers) bigera kuri 11 ndetse bubaka imiyoboro mishya yunganira iyari isanzwe mu mezi atatu ashize.

Yatanze urugero rwo mu Murenge wa Kinyinya, Akagali ka Murama ahakunze kwitwa mu Mudugudu wo kwa Dubai. Mu masaha y’ijoro, ingo zaho ngo ntizabashaga gucana ndetse n’aho byashobokaga wasangaga urumuri ari ruke cyane, ibikoresho bikenera ingufu nyinshi ntibibashe gukora.

Yagize ati “Twahubatse umuyoboro munini ndetse tuhashyira na Transformer ifite ingufu zihagije zingana na 200KVA tunahindura uko imiyoboro mito ihura, kugira ngo twongere ingufu, kuko transformer yari isanzwe ibaha umuriro yari kure, bigatuma umuriro uhagera wabaye muke. Ubu ngubu ingo zigera kuri 330 zo muri uyu mudugudu n’izihegereye zibona umuriro uhagije”.

Uretse mu mudugudu wo kwa Dubai, akandi gace kakemuriwe ibibazo ni Umudugudu wa Kabuhunde ya mbere na Kadobogo iherereye mu Murenge wa Kinyinya. Aha naho, ngo ingo zirenga 500 zaho ntizabonaga amashanyarazi ahagije mu masaha ya nijoro n’imiyoboro yaho yari ishaje ndetse yaratangiye kuba mito.

Yagize ati “Muri iyi midugudu na ho twasimbuye transformers ebyiri zari zihasanzwe imwe ifite ingufu za 160KVA n’indi ya 100KVA dushyiraho iza 315KVA na 250KVA, kugira ngo twongere ingufu ndetse duhindura uko imiyoboro mito yahuraga tunasimbura amapoto n’insinga byari bishaje dushyiraho ibishya bifite ubushobozi bwo gutwara ingufu z’amashanyarazi zikenewe ubu no mu gihe kiri imbere”.

Uretse Kinyinya kandi n’abari batuye Umurenge wa Gisozi mu Mudugudu wa Ruhango nabo bagiraga ikibazo cy’umuriro muke nabo ubu iki kibazo cyarakemuwe kuko REG yahashyize Transformer ifite ubushobozi bwa KVA 400 isimbuye iya 250KVA.

Uduce twose bongereye ingufu mu mezi atatu ashize tugera kuri 11 ariko bakaba bagikomeza gukemura ibyo bibazo n’ibindi bitandukanye bigenda biboneka mu Mirenge igize Ishami rya Kacyiru.

Yashimye imikoranire myiza ikomeje kuranga abafatabuguzi ba REG anabasaba gukomeza gukoresha neza amashanyarazi hirindwa impanuka no gufata neza ibikorwaremezo by’amashanyarazi kuko iyo byangijwe bitera ibura ry’umuriro rya hato na hato bikanatera igihombo.

Yagize ati “Muri rusange turashima cyane imikoranire myiza dufitanye n’abafatabuguzi bacu, tubibutsa gukomeza gukoresha neza amashanyarazi hirindwa impanuka izo ari zo zose, tukongera ariko kubasaba gukomeza gufata neza ibikorwaremezo by’amashanyarazi. Turasaba umuntu wese uzabona abangiza ibikorwaremezo by’amashanyarazi kubitumenyesha cyangwa bakabimenyesha inzego z’ibanze zibegereye na Polisi y’Igihugu”.

Ubu hakaba hakiri utundi duce tukirimo kongererwa ingufu muri Gasabo turimo imidugudu y’Akaruvusha muri Gacuriro, Muhororo-Dusenyi muri Kagugu ndetse na Binunga na Ngaruyinka muri Murama. Si muri utu duce gusa kandi, iki kibazo cy’umuriro muke cyarahagurukiwe mu gihugu hose.

Sosiyete y’u Rwanda ishinzwe ingufu itangaza ko bitarenze mu myaka ibiri nta rugo na rumwe mu Mujyi wa Kigali ruzaba rutagira amashanyarazi. Ubu imibare igaragaza ko mu Rwanda ingo zigera kuri 42% ari zo zifite amashanyarazi.

Tranformer nshya yashyizwe ahazwi nk’umudugudu wo kwa Dubai i Kinyinya, yakemuye ikibazo cy’amashanyarazi atari ahagije muri kariya gace

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza