Impuguke y’Umunya-Afurika y’Epfo yagaragarije u Rwanda akamaro ko kwigisha abana mu Kinyarwanda

Yanditswe na Evariste Nsengimana
Kuya 8 Nzeri 2017 saa 09:12
Yasuwe :
0 0

Impuguke mu burezi, zigaragaza ko kumenya ururimi kavukire, ariryo shingiro mu burezi, ryo gutegura no gutoza abana kumenya gusoma no kwandika no kugira ubundi bumenyi bahabwa mu ishuri, cyane cyane abiga mu myaka itatu y’amashuri abanza.

Raporo yakozwe n’umuryango urengera abana, Save the Children mu 2011, igaragaza ko abanyeshuri bo mu mwaka wa Kane no mu wa Gatandatu w’abanza badafite ubuhanga mu gusoma neza no kwandika Ikinyarwanda.

Kuri uyu wa Gatanu, ubwo hizihizwaga umunsi mpuzamahanga wo gusoma no Kwandika, wari wahuje abantu batandukanye, impuguke mu burezi yo muri Afurika y’Epfo, akaba n’umuyobozi w’umushinga ugamije guteza imbere uburezi muri icyo gihugu, Dr. Carole Bloch, yatangaje ko kwigisha abana gusoma no kwandika bigomba kunyuzwa mu bintu abana basanzwe bakunda nk’imikino, indirimbo, udukuru n’ibindi kandi ko abarezi bagomba kubigisha nabo babikora kugira ngo babikunde.

Dr. Carole yatangaje ko ari amahirwe ku Rwanda kuba hari ururimi rumwe gakondo, ndetse ko kugira ngo abana babashe kumva neza no gusobanukirwa gusoma no kwandika ari uko bigomba gukorwa mu rurimi bumva neza.

Ygize ati “U Rwanda mufite amahirwe ko mufite Ikinyarwanda cyonyine nk’ururimi gakondo, twe muri Afurika y’Epfo tugira izirenga 11, ni ikibazo gikomeye cyane[…] Kwigisha mu rurimi kavukire ni ingenzi, kuko kugira ngo bumve neza ibyo biga babashe no kuvugana neza, ni ngombwa ko bakoresha ururimi bumva neza. Iyo ubahaye amahirwe yo gukoresha ururimi rumwe, izindi baba bazaziga ariko ntugomba guhagarika ururimi kavukire kuko ni rwo rugufasha kumenya izindi. Ntimukwiriye gukinisha ururimi kavukire murugeranya n’Icyongereza cyangwa Igifaransa.”

Yakomeje asobanura ko umwana atangira kwiga kuvuga, gusoma neza guhera akiri mu nda ya nyina binyuze mu ndirimbo aririmbirwa cyangwa yumva ziririmbwa.

Umunyamabanga wa Leta ushinzwe amashuri abanza n’ayisumbuye, Isaac Munyakazi, yatangaje ko u Rwanda rufite intego ko mu 2024, abanyarwanda basaga 90% bazaba bazi gusoma no kwandika Ikinyarwanda, kandi ko byatangiye gushyirwa mu bikorwa, binyuze mu gutegura ibitabo byanditse mu Kinyarwanda n’amasomero.

Yagize ati “Abanyarwanda mu bijyanye no gusoma no kwandika bageze kuri 70% kuko twari twahize ko nibura mu 2024, tuzaba tugeze kuri 90%. Ntiturageza amasomero ahakenewe hose, ariko dukorana n’abihayimana amasomero akagenda agaragara mu mashuri atandukanye. Dufatanyije n’imiryango y’abafatanyabikorwa batwubakiye agera ku 120 mu gihugu hose kandi hari na gahunda zo kuyongera kugira ngo umuco wo gusoma usohoke mu mashuri, ugere no mu baturage, aho umwana mu mpera z’icyumweru no mu biruhuko abone aho atira igitabo cyo gusoma cyangwa akahahurira n’ababyeyi.”

Ambasaderi wa Leta Zunze Ubumwe za Amerika mu Rwanda, Erica J. Barks-Ruggles, wanatangije amarushanwa y’abiga mu mashuri abanza n’ayisumbuye yo kwandika inkuru z’Ikinyarwanda, ryari risanzwe rikorwa no mu Cyongereza (Andika Rwanda 2017), yatangaje ko ari byiza ko abana bamenya neza ururimi gakondo kandi ko USA izakomeza gufasha u Rwanda mu burezi, binyuze mu guha abanyeshuri ibitabo byanditse mu Kinyarwanda byo gusoma, amahugurwa n’ibindi.

Bamwe mu bitabiriye ibirori by'umunsi mpuzamahanga wo gusoma no Kwandika
Minisitiri w'umuco na Siporo, Uwacu Julienne n'umunyamabanga wa Leta ushinzwe abamshuri abanza n'ayisubuye, Isaac Munyakazi
, Impuguke mu burezi yo muri Afurika y'Epfo, akaba n'umuyobozi w'umushinga ugamije guteza imbere uburezi muri icyo gihugu, Dr. Carole Bloch
Umunyamabanga wa Leta ushinzwe amashuri abanza n’ayisumbuye, Isaac Munyakazi, yatangaje ko u Rwanda rufite intego ko mu 2024, abanyarwanda basaga 90% bazaba bazi gusoma no kwandika Ikinyarwanda
Ambasaderi wa Leta Zunze Ubumwe za Amerika mu Rwanda, Erica J. Barks-Ruggles

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza