Impuguke zisaga 200 zahuriye mu Rwanda ziga ku guteza imbere ingufu zisubira

Yanditswe na Herve Ugirumukunda
Kuya 20 Ukwakira 2017 saa 05:21
Yasuwe :
0 0

Impuguke zo mu rwego rw’ingufu zisaga 200 ziri mu Rwanda mu nama yiga ku buryo zateza imbere ingufu zisubira ngo buri muturage azabe yagezweho n’amashanyarazi mu mwaka wa 2024.

Ingufu zisubira zirimo izikomoka ku mirasire y’izuba, izikomoka ku bimera, ubushyuhe, amazi, umuyaga n’ibindi bitangiza ikirere.

Inama igamije guteza imbere ku buryo burambye urwego rw’ingufu iri kubera i Kigali kuva ku ya 19 Ukwakira 2017, yateguwe n’Ihuriro ry’Abikorera mu rwego rw’ingufu, Ikigo cy’Igihugu cy’Iterambere, RDB n’ibindi bigo bifite aho bihuriye n’urwego rw’ingufu mu Rwanda.

Umuyobozi wa RDB, Clare Akamanzi yavuze ko urwego rw’abikorera rufatiye runini Leta y’u Rwanda mu kongera ingufu z’amashanyarazi kandi ko hari amahirwe igihugu cyashyiriyeho abashora imari muri urwo rwego.

Ati “Iyi nama ifite akamaro kanini mu kureshya abashoramari bafasha Leta y’u Rwanda kugeza umuriro uhendutse kandi uhoraho ku banyarwanda muri iyi myaka irindwi iri imbere.”

Yasobanuye ko RDB imaze kugirana n’ibigo 40 amasezerano mu rwego rw’ingufu kandi ko yorohereza buri wese ushaka gushora imari mu gihugu.

Minisitiri w’Ibikorwaremezo, James Musoni yagarutse ku kamaro ko gukoresha ingufu z’amashanyarazi zisubira mu cyaro, asobanura ko zihendukira abatifashije.

Yakomeje avuga ko Guverinoma y’u Rwanda isanga ingufu zisubira zirambye, bityo ahamagarira urwego rw’abikorera kugira uruhare mu kuzishoramo imari.

Ati “ Guverinoma y’u Rwanda yiyemeje gukorana n’urwego rw’abikorera ngo yongere amashanyarazi ku buryo buhoraho bityo buri wese ukeneye amashanyarazi ayabone.”

“Ubu twibanze ku guteza imbere imiyoboro y’ingufu zivugururwa mu gihugu kubera ko zishobora kwigonderwa na buri wese kandi zikaba zishobora kwifashishwa by’igihe kirekire.”

Kuri ubu u Rwanda rufite ingufu z’amashanyarazi zingana na megawati 210.9, muri zo 48% zitwangwa n’ingomero z’amazi, 32% zikomoka ku bushyuhe, imirasire y’izuba 5.7%, gaz methane yo mu Kivu igatanga 14.3%.

Ikigo cy’Igihugu cy’Ingufu, REG, kivuga ko kuri ubu Abanyarwanda bafite amashyanyarazi ari 40% mu gihe muri 2024 u Rwanda rushaka ko abaturage bose bazaba bayafite kandi ahoraho.

Mu Rwanda ibigo bisaranganya amashanyarazi avugururwa birimo ibitanga akomoka ku mirasire y’izuba n’uruganda rutanga megawati 8.5 z’amashanyarazi yo muri ubwo bwoko, ruherereye mu karere ka Rwamagana rukaba urwa mbere rutanga ingufu nyinshi muri Afurika y’Uburasirazuba.

Bamwe mu bitabiriye inama ku guteza imbere ingufu zisubira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza