Islam yiyemeje ubufasha mu guhashya ubutagondwa no mu mashuri

Yanditswe na Ferdinand Maniraguha
Kuya 2 Ukwakira 2017 saa 07:51
Yasuwe :
0 0

Ubuyobozi bw’idini ya Islam mu Rwanda bwatangaje ko bugiye gufatanya na Leta kurushaho gusobanurira abanyeshuri uburyo bwo kwirinda ubutagondwa n’ibikorwa by’iterabwoba.

Hashize imyaka ibiri ibikorwa by’iterabwoba n’ubutagondwa bitangiye kumvikana mu Rwanda ndetse bamwe mu babigizemo uruhare batawe muri yombi.

Izo nyigisho ahanini zikwirakwizwa n’abiyita abayoboke ba Islam, bakazicengeza cyane cyane mu bakiri bato.

Kuri iki Cyumweru ubwo ababwirizabutumwa bo mu idini ya Islam(Aba Imam n’Aba Sheikh) basozaga amahugurwa y’iminsi ibiri agamije kwimakaza umutekano no kurwanya imyumvire y’ubutagondwa, bamwe mu bayitabiriye basabye ko izo nyigisho zagezwa no mu mashuri kugirango abana badakunze kubona amahirwe yo guhabwa amahugurwa nk’ayo kubera ko bari ku ishuri, babashe kubisobanurirwa n’aho bari.

Banasabye kandi no guhugura abandi batari abayisilamu ngo kuko iterabwoba ridakorwa n’abiyita abayoboke ba Islam gusa.

CIP Robert Ngabonziza uyobora agashami k’iperereza mu ishami rya Polisi y’u Rwanda rishinzwe kurwanya iterabwoba yabwiye abo bayisilamu ko impamvu batangiriye izo nyigisho mu bayoboke b’idini ya Islam ari ukubera ko ibikorwa by’ubutagondwa byagiye bigaragara ababikora biyitirira iryo dini.

Ati “Nuko ikibazo cyabanje kugaragara ku biyita abayisilamu, niho twabanje kureba ko cyakemuka ariko tuzagera no ku bandi kuko ubutagondwa buri n’ahandi…ariko icyahitanaga ubuzima bw’abantu cyo cyagombaga kubanza gukemurwa mbere y’ibindi byose.”

CIP Ngabonziza yavuze ko hari amatsinda yo kurwanya iterabwoba (clubs) yatangiye gushingwa mu mashuri kandi ko bazakomeza guharanira ko yiyongera.

Umujyanama wa Mufti w’u Rwanda, Sheikh Mbarushimana Suleiman yabwiye IGIHE ko bagendeye ku nteganyanyigisho za Minisiteri y’uburezi bazajya banafata umwanya wo guhugura abarimu bigisha iby’iyobokamana bakagira imyumvire imwe ku nyigisho za Islam kugira ngo babyigishe abanyeshuri na bo babyumva.

Ati “Abana bacu baba abiga mu mashuri abanza n’ayisumbuye bakwiye guhabwa inyigisho nziza kuri Islam zikubaka indangagaciro nziza z’ubuyisilamu aho bari kugira ngo batazajya babisoma ku ikoranabuhanga rigezweho nko kuri za internet n’ahandi. Hari inyigisho Minisiteri y’uburezi yari yarateguye yigisha ku iyobokamana .Turanateganya guhugura abarimu bigisha Iyobokamana, ba Imam na ba Sheikh bakabibafashamo.”

Umunyamabanga wa leta ushinzwe amashuri abanza n’ayisumbuye Isaac Munyakazi yabwiye IGIHE ko basanzwe bakorana n’Inama Nkuru y’Abayisilamu mu Rwanda (RMC) mu gukimira inyigisho z’ubutagondwa mu mashuri cyane cyane ay’abayisilamu.

Ati “Turakorana na RMC mu gukumira iyo myumvire (y’ubutagondwa) cyane cyane mu mashuri ya kiyisilamu yigisha amasomo y’idini.”

Kugeza ubu mu Rwanda hari amadosiye 46 y’ibyaha by’iterabwoba ari mu nkiko nk’uko CIP Ngabonziza yabitangaje kandi ashimira ubuyobozi bwa Islam ko bugenda bubafasha ibyo byaha bikagabanuka.

Yavuze ko kuva muri Mutarama kugeza muri Nzeri 2017 ibikorwa by’ubutagondwa muri Afurika y’Iburasirazuba byahitanye abantu 632 na ho 535 barakomereka. Muri Afurika hapfuye abantu 2404, hakomereka abantu 1842, mu gihe ku isi hose hapfuye abantu 8167, hakomereka 8140.

Bamwe mu babwirizabutumwa bari bitabiriye amahugurwa
Basabye ko inyigisho zo kurwanya ubutagondwa zigishwa n'abarati abayisilamu
CIP Ngabonziza yijeje abayisilamu ko n'abandi banyarwanda bazigishwa kurwanya iterabwoba
Imam wa Rubavu atanga igitekerezo mu muhango wo gusoza amahugurwa
Umujyanama wa Mufti w'u Rwanda, Sheikh Mbarushimana Suleiman

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza