Mineduc igiye gukurikirana iby’abanyeshuri ba ES Ruganda batewe inda ari benshi

Yanditswe na Kanamugire Emmanuel
Kuya 8 Nzeri 2017 saa 03:04
Yasuwe :
0 0

Minisiteri y’Uburezi yatangaje ko igiye gukurikirana amakuru y’abanyeshuri batwaye inda ari benshi avugwa mu Ishuri Ryisumbuye rya Ruganda ryo mu Karere ka Karongi.

Amakuru atangazwa na bamwe mu baturiye iri shuri ryubatse mu Murenge wa Ruganda, Akagari ka Rubona, avuga ko abagera ku 10 batwite harimo umwe wabyaye muri iki cyumweru.

Mu mpamvu zivugwa harimo kuba abakobwa bicumbikira mu nzu ziherereye mu isantere y’ubucuruzi yegereye ishuri aho batagira gikurikiranwa.

Ubuyobozi bw’ishuri n’ubw’inzego z’ibanze ntibuvuga rumwe ku mibare y’abatwaye inda.

Umunyamabanga Nshingwabikorwa w’Akagari ka Rubona ishuri riherereyemo, Mujyambere Lambert, yavuze abo azi batwite ari bane barimo umwe wayitewe n’umuhungu bigana.

Ati “Abo nzi bagera kuri bane, babiri barabyaye abandi bagiye iwabo. Hari uwavuye mu ishuri ajya gushaka akazi agaruka atwite. Hari abashobora kuziterwa n’abo bigana, cyangwa bakazikura iwabo, keretse uganiriwe na nyirubwite.”

Kuba abanyeshuri biga bataha badafite ubakurikirana igihe cyose n’abacumbitse bakaba hanze y’ikigo avuga ko ari imwe mu mpamvu ishobora kubagusha mu bishuko.

Yongeyeho ko ubukene n’ubushobozi buke bwo kubona ifunguro rya saa sita na bwo bushobora kuba intandaro yagusha mu bishuko bamwe, kuko ishuri risaba buri munyeshuri gutanga umusanzu wo kugaburirwa hakaba hashobora kugira abayabura.

Umunyamabanga Nshingwabikorwa w’Umurenge wa Ruganda, Jean Nepomuscène Mwumvaneza, we yavuze ko abo azi ari batatu babyaye bakaba baranatashye icyakora ngo kugeza ubu abari mu kigo batwite ni babiri bonyine.

Ati “Bambwiye ko abakobwa batatu babyaye ubu baranatashye, ubu abatwite ni babiri. Abavuga ko ari 10 sinzi aho babivanye; negereye umunyeshuri wiga muri iki kigo ni we wampaye amakuru, urumva ko abayobozi b’ishuri bo bashobora kubeshya.”

Mwumvaneza yakomoje ku kibazo cy’amacumbi aherereye mu isantere abakobwa babamo aho bashobora kwihisha abayobozi bagahura n’abasore bakabatera inda ariko ahamya ko ahanini baziterwa mu gihe cy’ibirukuko bari mu miryango yabo.

Umuyobozi w’iri shuri, Higiro Joseph we yemeje ko umunyeshuri utwite ari umwe na ho undi akaba aherutse kubyara. Ati “Kugeza ubu utwite ni umwe undi yarabyaye. Umwe muri abo yayitewe n’umunyeshuri mugenzi we abandi ni abaturage.”

Higiro yavuze ko abakobwa bacumbitse hafi y’isantere bagera ku 100 muri 405 biga muri iki kigo. Nubwo amacumbi bararamo atari ay’ikigo, uyu muyobozi yavuze ko bayakurikirana umunsi ku wundi.

Ikibazo cy’abangavu baterwa inda kigenda cyumvikana hirya no hino mu gihugu aho mu 2016 abagera ku bihumbi 17 bahuye na cyo.

Minisiteri y’Uburezi yatangaje ko igiye gukurikirana ibivugwa mu ishuri ryisumbuye Ruganda ndetse no mu gihugu muri rusange.

Minisitiri w’Uburezi Dr Musafiri Papias Malimba yabwiye IGIHE ati “Turi bubikurikirane hamenyekane ukuri ndetse n’ingamba zifatwe atari kuri iri shuri gusa ahubwo mu gihugu hose.”

Ishuri rya Ruganda ni ity’uburezi bw’ibanze bw’imyaka 12. Abaryigamo barataha ariko hakaba bake bacumbika kuko baturuka kure.

Ishuri Ryisumbuye rya Ruganda rifite abanyeshuri 731, abakobwa ni 405 na ho abahungu ni 326. Rifite icyiciro rusange n’amashami arimo MPG(Mathematics, Physics and Geography na HEG(History, Economics and Geography).

Minisitiri w'Uburezi Dr Musafiri Papias Malimba yatangaje ko ikibazo cy'abanyeshuri baterwa inda kigiye gukurikiranwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza