Nyaruguru: Abagore baracyavunwa n’imirimo yo mu rugo, bakababazwa n’abagabo babatererana

Yanditswe na Prudence Kwizera
Kuya 16 Ukuboza 2017 saa 09:55
Yasuwe :
0 0

Hirya no hino mu gihugu haracyagaragara abagore bavunishwa n’abagabo babo mu mirimo itandukanye yiganjemo iyo mu rugo bigatuma urugo rwabo rudindira mu iterambere.

Mu gucukumbura uko iki kibazo giteye muri iki gihe, Umunyamakuru wa IGIHE yerekeje mu karere ka Nyaruguru mu gice cy’icyaro aganira n’abahatuye yirebera n’uko babayeho mu ngo zabo.

Bamwe mu bagore bo mu Murenge wa Ruheru bavuga ko abagabo babo badashobora kubafasha gukora imirimo yo mu rugo nko guteka, gukora isuku, gushaka inkwi, kurera abana n’iyindi, ahubwo babatererana, by’umwihariko bakababazwa n’ukuntu abagabo bataha babawira nabi ko ntacyo bamaze kuko imirimo baba biriwe bakora itinjiza amafaranga.

Umugore utuye mu Murenge wa Ruheru, yahuye n’umunyamakuru wa IGIHE yikoreye umutwaro w’ubwatsi ahetse n’umwana mu mugongo bigaragara ko ananiwe.

Yagize ati “Imirimo yose yo mu rugo ni njyewe uyikora, umugabo we akorera amafaranga gusa kuko akunze kujya gushaka ibiraka byo gihinga cyangwa ubuyede aho bari kubaka. Gukora imiromo yo mu rugo njyenyine ntacyo bintwaye, ikimbabaza ni uko umugabo aza antuka ngo ntacyo nakoze ngo nta n’icyo maze, ngo ndi uwo kurya gusa”.

Akomeza avuga ko abyuka saa kumi n’imwe za mu gitondo agatangira gukora imirimo yo mu rugo akaryama saa tanu z’ijoro.

Bamwe mu bagabo ntibakozwa ibyo gukora imirimo yo mu rugo

Bamwe mu bagabo bo mu Murenge wa Ruheru bavuga ko ibyo gukora imirimo yo mu rugo nko guteka, gushaka inkwi, kumesa imyenda, kurera abana n’iyindi batabikora kuko bigenewe abagore n’abakobwa gusa.

Emmanuel Tuyishimire ati “Umugabo ni uwo gukorera amafaranga, ibyo kurera abana se no guteka yabijyamo urugo rukabaho rute? Njyewe numva imirimo yo mu rugo igomba gukorwa n’abagore, na ho abagabo bagasha ibitunga urugo”.

Abashakanye bafatanya imirimo byabateje imbere

Muri aka Karere ka Nyaruguru hagaraga ingo zimwe na zimwe zirimo abashakanye bafatanya imirimo yose kandi bigaragarira buri wese ko byabateje imbere.

Alexis Mureramanzi n’umugore we Delevena Musabyimana bavuga ko bahisemo gufatanya imirimo yose kuko basanze ari byo bizabateza imbere, nyuma yo guhabwa inyigisho n’ubuyobozi ku bufatanye n’imiryango nterankunga nka Action Aid Rwanda na Faith Victory Association (FVA).

Mureramanzi ati “Njyewe nabonaga amafaranga ari uko mvuye kuyahingira ariko yose nkayamarira mu nzoga z’ibikwangari, umugore nkamvunisha nta kumufasha imirimo cyangwa kumuhahira, ariko nyuma yo guhabwa inyigisho n’abayobozi nasanze ngomba gufatanya n’umugore wanjye tukiyubakira urugo tukiteza imbere. Ubu nk’iyo umugore ari guteka ngomba kumushakira inkwi, nkashaka ubwatsi bw’amatungo kandi n’umwana ndamufata nkamukarabya nkamwambika, no kumurera ndabikora kuko ni uwanjye”.

Abagore bo mu Murenge wa Ruheru bavuga ko kudafashwa n'abagabo babo imirimo bibadindiza mu iterambere

Delevena Musabyimana na we avuga ko mbere mu gihe umugabo atamufashaga imirimo bari babayeho nabi mu bukene n’intonganya, ariko kuri ubu bari kugera ku iterambere kandi mu rugo rwabo hari amahoro kuko bajya inama muri byose.

Umuyobozi uhagarariye Inama y’Igihugu y’Abagore mu Karere ka Nyaruguru, Agnes Mukamabano, asaba abashakanye gufatanya imirimo yose kuko ari byo bizabateza imbere, kandi akavuga ko ku bufatanye n’abafatanyabikorwa ndetse n’inzego z’umutekano bakomeza kwigisha abaturage ibyiza byo gufatanya no kujya inama.

Ubushakashatsi bwakozwe na Action Aid mu 2015, bwagaragaje ko abagore 91% bo mu Rwanda bakora imirimo idahabwa agaciro, itanahemberwa nk’akazi ka buri munsi.

Umuhuzabikorwa w’umushinga wa Action Aid witwa Flow II ufasha abagore kwivana mu bukene, Anathole Uwiragiye, avuga ko batangiye ibikorwa birimo guha abagore amatungo, ibigega bifata amazi, amarerero y’abana, amahugurwa, kubahuza n’inzego zifata ibyemezo n’ibindi kugira ngo bareke guhugira gusa mu mirimo yo mu rugo ibavunisha kandi itabaha amafaranga.

Ibi ngo bizafasha umugore kuva mu bukene, ariko agasaba inzego zifata ibyemezo ko zakomeza gushyiraho uburyo n’amategeko birengera umugore, binamuha amahirwe yo kwiteza imbere.

Umwe mu bagore bo mu Murenge wa Ruheru wikoreye umutwaro w'imigozi y'ibijumba ahetse n'umwana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza