U Bubiligi: Abanyarwanda batatu bahaswe ibibazo ku ruhare bashinjwa muri Jenoside

Yanditswe na IGIHE
Kuya 8 Nzeri 2017 saa 07:04
Yasuwe :
0 0

Ubugenzacyaha bwo mu mujyi wa Bruxelles mu Bubiligi bwatangiye kubaza abanyarwanda batatu bakekwaho uruhare muri Jenoside yakorewe Abatutsi muri Mata 1994.

Abatangiye kubazwa ni Ernest Gakwaya uzwi nka Camarade na Emmanuel Nkunzuwimye bahoze mu mutwe w’Interahamwe ndetse na Fabien Neretse ushinjwa urupfu rw’Umubiligikazi wabaga mu Rwanda, Claire Beckers, n’umuryango we.

Ibazwa ry’abo bagabo ryari rigamije kureba niba ibyaha bashinjwa bizaburanishirizwa mu nkiko zisanzwe cyangwa inkiko z’umwihariko zagenewe kuburanisha ibyaha bikomeye.

Ikinyamakuru La Libre Belgique cyatangaje ko harebwaga niba amadosiye y’abo bagabo uko ari batatu yahurizwa mu rubanza rumwe nkuko Ubushinjacyaha bwabisabye cyangwa niba yatandukanywa.

Umunyamategeko wunganira Ernest Gakwaya, Me Gilles Venderbeck , yamaganye ibyo guhuza ayo madosiye, avuga ko ntaho ibyaha bose bashinjwa bihuriye.

Indi ngingo yaganiriweho ni ukureba niba ikirego cyatanzwe gifite agaciro hagendewe ku mategeko y’u Bubiligi.U Bushinjacyaha buvuga ko baregwa ibyaha bya Jenoside naho abunganira abaregwa bo bakavuga ko Itegeko rihana Jenoside mu mategeko y’u Bubiligi ryagiyeho mu 1999 kandi ibyaha abaregwa bashinjwa byarakozwe mbere.

Hanagarutswe ku zindi manza zigendanye na Jenoside yakorewe Abatutsi mu Rwanda zabereye mu Bubiligi, aho abunganira abaregwa bavuze ko abaregwga muri izo manza bataburanye ibyaha bya Jenoside ahubwo baburanye ibyaha byibasiye inyokomuntu kuko aribyo byari mu mategeko y’u Bubiligi mu 1994.

Hahise havuka ikibazo cyo kumenya aho urubanza ruzaburanishirizwa, dore ko ubushinjacyaha bwifuza ko abo bagabo baburanishirizwa mu rukiko rusanzwe naho abaregwa bakifuza ko baburanishirizwa mu rukiko rushinzwe kuburanisha ubwicanyi n’ibyaha byibasiye inyokomuntu.

Abunganira abaregwa bavuze ko impamvu bifuza urukiko ruburanisha ibyaha bikomeye ngo ni uko arirwo rufite ububasha bwo gucukumbura ukuri kuri dosiye z’abaregwa.

Fabien Neretese yari umukozi wa Leta ubwo hakorwaga Jenoside yakorewe Abatutsi mu 1994.

Yari aturanye n’umuryango w’Umubiligikazi Claire Beckers n’umugabo we Isaïe Bucyana ndetse n’umwana wabo Katia.

Nyuma yo kwibasirwa, Beckers n’umuryango we bashatse uko bahunga bakava aho bari batuye bakareba ahandi bagana.Ngo ubwo bahungaga urugo rwabo tariki 9 Mata 1994 bahungiye ku ngabo za Loni zari mu Rwanda, bahagarikiwe kuri bariyeri bararaswa.Bikekwa ko Neretse ari we wagize uruhare mu ihagarikwa rya Beckers n’umuryango we ndetse akaba yaranagize uruhare mu rupfu rw’abandi bantu icumi bari baturanye .

Murumuna wa Becker, Marine Beckers, yavuze ko nubwo urubanza rw’ababo bishwe rwatinze, ngo ntabwo bigomba kuvanaho uburemere bw’icyaha cyakozwe no kuba kigomba guhanwa.

Biteganyijwe ko umwanzuro kuri iri bazwa ry’ubugenzacyaha uzamenyekana hagati mu Ukwakira uyu mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza