Umufaransakazi Audrey Azoulay yatorewe kuyobora UNESCO

Yanditswe na IGIHE
Kuya 10 Ugushyingo 2017 saa 03:54
Yasuwe :
0 0

Audrey Azoulay wigeze kuba Minisitiri w’Umuco mu Bufaransa, yatorewe kuyobora Ishami ry’Umuryango w’Abibumbye Ryita ku Burezi, Ubumenyi n’Umuco (UNESCO), kuri uyu wa Gatanu.

Audrey Azoulay ni we mugore wa kabiri winjiye mu buyobozi bukuru bw’iri shami rya Loni nyuma ya Irina Bokova asimbuye.

Inteko itora yari igizwe n’abantu 184; Azoulay yagize amajwi 131 naho 19 ntibamutoye mu gihe habonetse impabusa 24 naho abagera ku 10 bakaba batitabiriye amatora.

Biteganyijwe ko uyu muyobozi mushya wa UNESCO, uzawuyobora mu myaka ine, azarahirira inshingano nshya ku wa 13 Ugushyingo mu muhango uzabera ku cyicaro cyayo i Paris mu Bufaransa.

Azoulay yatsinze Umunyamisiri, Moushira Khattab wari umukandida rukumbi ukomoka ku mugabane wa Afurika muri aya matora n’Umunya-Qatar, Hamad Bin Abdulaziz al-Kawari bageze mu cyiciro cya nyuma.

Mu Ukwakira uyu mwaka nibwo Leta Zunze Ubumwe za Amerika zatangaje ko zikuye mu bihugu by’ibinyamuryango bya UNESCO, zishinja uyu muryango kubangamira inyungu za Israel, umwanzuro uzashyirwa mu bikorwa mu buryo bweruye ku wa 31 Ukuboza 2018.

Amerika yavuze uyu mwanzuro utafashwe mu buryo buhutiyeho ndetse ujyanye n’ibibazo biyireba bifitanye isano na UNESCO kimwe n’amavugururwa y’ingenzi akwiye muri iri shami rya Loni.

Gusa ngo iki gihugu kizakomeza gukurikiranira hafi ibikorwa bya UNESCO nk’igihugu kitari ikinyamuryango ahubwo nk’indorerezi mu rwego rwo gutanga ibitekerezo n’ubunararibonye.

Umuyobozi Mukuru wa UNESCO, Irina Bokova, yatangaje ko bibabaje kuba Leta Zunze Ubumwe zivuye muri iri shami rya Loni.

Mu 2011, Leta Zunze Ubumwe za Amerika zari zahagaritse ingengo y’imari zageneraga UNESCO nyuma yaho iri shami rihaye ubunyamuryango busesuye Palestine.

U Rwanda ni igihugu kinyamuryango muri UNESCO kuva itariki ya 7 Ugushyingo 1962.

Audrey Azoulay ni we watorewe kuyobora UNESCO mu myaka ine iri imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza