Urunturuntu mu bavuzi gakondo bibumbiye mu Ihuriro AGA Rwanda

Yanditswe na Emma-Marie Umurerwa
Kuya 10 Nyakanga 2018 saa 07:33
Yasuwe :
0 0

Bamwe mu bavuzi bibumbiye mu Ihuriro ry’abavuzi gakondo mu Rwanda (AGA Rwanda Network), barataka ibibazo birimo gutanga ibyangombwa mu izina rya Minisiteri y’Ubuzima, gusabwa amafaranga ya hato na hato, kutagaragarizwa uburyo umutungo w’abanyamuryango ukoreshwa no gucikamo ibice kw’abagize komite Nyobozi y’ihuriro.

Nk’uko bamwe mu bavuzi gakondo baganiriye na IGIHE babitangaje, ngo uko imyaka ishira indi igataha muri AGA Rwanda hagenda hagaragara imikorere idahwitse ishingiye ku buyobozi, ibi bigatuma abavura mu buryo bwa gakondo batakarizwa icyizere.

Umwe muri bo yavuze ko mu mwaka wa 2012 ari bwo Minisiteri y’Ubuzima yahaye AGA Rwanda icyemezo cy’agateganyo nk’ihuriro. Gusa ngo Umuyobozi w’iri huriro Gafaranga Daniel, asigaye agisinyaho akagitanga nk’icyemezo cyo gukora ndetse ku kiguzi.

Yagize ati “Igitangaje nuko ubungubu Gafaranga asigaye agisinyaho agateraho na kashi akagiha abavuzi gakondo ngo ni icyangombwa kibemerera gukora bakakigura amafaranga ibihumbi 20 kandi mu by’ukuri ibyo bintu ntibyemewe.”

Mugenzi we yakomeje agira ati “Ikarita y’umunyamuryango tuyigura 13 000 by’amafaranga y’u Rwanda, badusaba ibihumbi 20 yo kugura icyemezo cy’uko twahuguwe kandi tutarahuguwe. Ugiye ukababaza igihe baherukira guhugura abavuzi gakondo wasanga ari nko mu myaka 8 ishize, ariko igitangaje nuko batwaka ayo mafaranga wakwanga kuyatanga bakagufungira.”

Umuyobozi wa AGA Rwanda, Gafaranga kandi ashinjwa kuba yarashyizeho komite y’abantu be itaratowe n’abagize ihuriro, abatowe bahagarariye abavuzi mu turere akabakuraho. Ibi byatumye mu ihuriro hacikamo ibice.

Nk’uko bakomeza babivuga ngo kuva mu mwaka wa 2013 hajyaho amabwiriza ya Minisiteri y’Ubuzima agaragaza uwemerewe kuba umuvuzi gakondo n’utemerewe kuba we, abayobozi ba AGA Rwanda bagiye basaba amafaranga abavuzi bababwira ko nibatayatanga babafungira amavuriro.

Umuyobozi w’Ihuriro, Gafaranga Daniel, yatangarije IGIHE ko atazi icyo abavuga ko mu ihuriro harimo ibibazo bashingiraho.

Ati “Nta shyirahamwe na rimwe ridatanga ibyangombwa, ibyo nibyo dutanga ibyo bindi bavuga barambeshyera. Abanyamuryango nta yindi misanzu batanga n’uwakubwira ngo yatanze umusanzu wamubaza uwo yayahaye uwo ari we. Amafaranga ibihumbi 20 ni ay’icyemezo cy’uko umuntu ari umuvuzi gakondo wahuguwe, uretse ko hari n’abashaka icyo cyemezo mu buryo bw’amanyanga.”

Yongeyeho ko abavuga ko basabwa amafaranga ya hato na hato ari abatazi uko ibintu bikorwa, kandi ngo kuri konti y’ihuriro magingo aya harimo amafaranga y’u Rwanda ibihumbi 70 gusa.

Ati “Ibibazo biri muri komite rero […] aho abantu bari ntihabura urunturuntu, mu bantu habamo utuntu n’utundi, ariko abo bose turacyagerageza gukorana […] mbona biterwa nuko abantu tuticara hamwe ngo tujye inama […] umuntu ni umuntu buntu akubwira iki afite ikindi agukinze”.

Nta muvuzi gakondo ufite icyangobwa kimwemerera gukora

Umuvugizi wa Minisiteri y’Ubuzima, Malick Kayumba, yavuze ko nta muvuzi gakondo wo mu Rwanda ufite icyangombwa kimwemerera kuvura.

Yagize ati “Abacuruza ibijyanye n’inyongeramirire nibo bahawe ibyangombwa kandi nabo twabanje kugenzura ibyo bakora niba barize ibijyanye n’imirire, aho bakorera uko hameze n’ibindi. Naho abavuzi gakondo nta n’umwe ufite icyangombwa cya Minisante kimwemerera kuvura.”

Yakomeje avuga ko abafite ibyangombwa bahawe mu izina rya Minisante bakwiye kumenya ko ibyo byangombwa nta gaciro bifite.

AGA Rwanda Network igizwe n’abavuzi gakondo ibihumbi 3000, abavuzi gakondo muri rusange bakaba basaga ibihumbi 14.

Umuyobozi wa AGA Rwanda, Gafaranga Daniel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza