USA: Minisitiri Busingye yasabye ibihugu gushyikiriza ubutabera abakoze Jenoside n’abakomeje kuyihakana

Yanditswe na IGIHE
Kuya 3 Gicurasi 2019 saa 03:19
Yasuwe :
0 0

Minisitiri w’Ubutabera Johnston Busingye, yasabye ibihugu gufata bigashyikiriza ubutabera abakekwaho uruhare muri Jenoside yakorewe Abatutsi babyihishemo, kimwe n’abakomeje guhembera ingengabitekerezo yayo.

Yabigarutseho ku wa Gatatu mu muhango wo Kwibuka ku nshuro ya 25 Jenoside yakorewe Abatutsi mu 1994, wabereye muri Dirksen Senate Building i Washington DC.

Ni igikorwa cyitabiriwe n’abasenateri ba Amerika bamaze kugaragaza ko ari inshuti z’u Rwanda barimo James Inhofe uhagarariye Leta ya Oklahoma, Christopher Andrew Coons uhagarariye Delaware na Thom Tillis uhagarariye Carolina ya Ruguru, abahagarariye Ingoro Ndangamateka ya Jenoside yakorewe Abayahudi, abahagarariye ibihugu byabo muri Amerika n’abandi.

Busingye yagaragaje ko Jenoside yakorewe Abatutsi yahemberewe n’umuco wo kudahana, bikarangira miliyoni y’abanyarwanda ihatikiriye mu gihe mbere abanyarwanda bari umwe, bahuje umuco, ururimi n’igihugu.

Yavuze ko yageragejwe inshuro nyinshi mbere ya 1994, ibihumbi by’Abatutsi bagahunga igihugu kuva mu 1959, hagenda hashyirwaho n’amategeko yehemberaga amacakubiri yagiye anigishwa kugeza mu 1994.

Ati “Jenoside yakorewe Abatutsi yagize ingaruka ku buzima bw’igihugu, yangiza inzego zacyo, isenya ubumwe bw’abanyarwanda n’imibereho yabo.”

“Mu gushaka igisubizo, Guverinoma y’ubumwe yasanze ubutabera bwunga ari bwo byafasha mu guhangana n’umuco wo kudahana, nk’uburyo bwo gusubiza mu buzima busanzwe abahamwe n’ibyaha no kugira uruhare mu kubaka ubumwe n’ubwiyunge. Cyari ikintu kigoye ariko cy’ingirakamaro.”

Minisitiri Busingye yavuze ko bitewe n’uko abantu benshi bijanditse muri Jenoside, kubacira imanza bitari koroha, bityo hitabazwa Inkiko Gacaca kuko imibare yerekanaga ko kubaburanisha hifashishijwe inkiko zisanzwe byashoboraga gufata imyaka 100.

Yakomeje ati “Ibyo byari bivuze ko abakoze Jenoside, abarokotse n’undi wese bari gupfa mbere cyane y’uko ubutabera butangwa. Inkiko Gacaca zaciye imanza 1, 958,634 mu myaka icumi, zigaragaza ubushake bw’abanyarwanda n’ubushobozi bwabo mu kurenga ibibazo igihugu cyabo cyanyuzemo bagaharanira kwiteza imbere.”

Guhera mu 2005 Amerika imaze kohereza mu Rwanda abantu bane abakekwaho uruhare muri jenoside aribo Enos Kagaba, Jean Marie Vianney Mudahinyuka alias Zuzu, Marie Claire Mukeshimana na Dr. Leopold Munyakazi.

Minisitiri Busingye yagize ati “U Rwanda rushimira Leta zikomeje gufata, kuburanisha cyangwa kohereza abakekwaho uruhare muri Jenoside iyo bafatiwe ku butaka bwabyo. Leta Zunze Ubumwe za Amerika ni imwe muri uwo mubare.”

Yavuze ko abakekwaho Jenoside bacyihishahisha muri Amerika n’ahandi ari bo bagihembera ingengabitekerezo ya Jenoside no bakanayihakana, bagamije kuyobya ababumva.

Ati “Ikibazo cy’abahakana Jenoside gikeneye ko amahanga akirebaho. Jenoside no kuyihakana ni ibintu bigendana, ntabwo dushobora kuvuga ko twatsinze kimwe kandi ikindi kigihari.”

Minisitiri Busingye yanashimye uruhare rwa Amerika mu gukurikirana abafatwa nk’abacurabwenge ba Jenoside ndetse banashyiriweho igihembo cya miliyoni $5 ku muntu uzatanga amakuru yatuma bafatwa, hagamijwe gutanga ubutabera.

Yakomeje ati "Jenoside ni icyaha kidasaza. Abahunze ubutabera bazagenda bafatwa bashyikirizwe ubutabera umwe umwe. Bazirukanka ariko ntibazabasha kwihisha.”

Senateri Jim Inhofe we yagarutse ku kongera kwiyubaka k’u Rwanda nyuma ya Jenoside, avuga ko “uwifuza kureba uko Afurika ikwiriye kumera, yajya kureba ibyo abanyarwanda bayobowe na Perezida Paul Kagame bamaze kugeraho.”

Senateri Chris Coons we yavuze ko buri wese afite uruhare agomba kugira kugira ngo ibyabaye bitazongera, bagafatira n’amasomo ku Rwanda ku kwivana mu bibazo.

Ambasaderi w’u Rwanda muri Amerika, Mathilde Mukantabana, yagaragaje ko amasomo ku kongera kwiyubaka k’u Rwanda ashobora gufasha benshi bakubaka umuryango uzira ivangura, kandi kurwanya Jenoside bikwiye gukomeza kwigishwa.

Iki gikorwa cyahurije hamwe Abanyarwanda n'inshuti z'u Rwanda
Minisitiri Busingye yavuze ko u Rwanda rushimira Leta zikomeje gufata, kuburanisha cyangwa kohereza abakekwaho uruhare muri Jenoside
Ambasaderi Mukantabana yagaragaje ko amasomo ku kongera kwiyubaka k’u Rwanda ashobora gufasha benshi kubaka umuryango uzira ivangura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza