49 bitabye Imana, 600 barakomereka mu mpanuka ya gari ya moshi

Abantu 49 bitabye Imana abandi basaga 600 bakomerekeye mu mpanuka ya gari ya moshi yabaye kuri uyu wa gatatu mu Mujyi wa Buenos Aires mu gihugu cya Argentine.

CNN dukesha iyi nkuru ivuga ko ushinzwe ubutabazi bwihuse, Alberto Crescenti yavuze ko umubare w’abakomerekeye muri iyi mpanuka ushobora kwiyongera.

Ibiro ntaramakuru by’iki gihugu, Telam byavuze ko Umunyamabanga wa Leta ushinzwe ubwikorezi muri Argentine, Juan Pablo Schiavi yavuze ko iyi mpanuka yabaye ikomeye cyane.

Abayobozi bo muri iki gihugu bavuga ko intandaro y’iyi mpanuka ikomeye yatewe n’uko yabuze feri, nk’uko byagarutsweho na Schiavi.

Ubwo iyi gari ya moshi yakoraga iyi mpanuka yari iri ku muvuduko wa kilometero 26 ku isaha.

Abatabazi na Polisi bari kuzenguruka gari ya moshi yakoze impanuka

Abagenzi barokotse iyi mpanuka bavuga ko ubwo iyi gari ya moshi yagwaga humvikanye urusaku rumeze nk’urw’igisasu gituritse cyo mu bwoko bwa bombe.

Umugore warokotse iyi mpanuka yagize ati : "Twahise twikubita hasi ku butaka. Muri make byari biteye ubwoba".