Amerika : Perezida Obama yarahiriye kuyobora manda ye ya nyuma

Amerika : Perezida Obama yarahiriye kuyobora manda ye ya nyuma


Yanditswe kuya 22-01-2013 - Saa 09:52' na Emmanuel Kanamugire

Mu gihe hizihizwa umunsi wahariwe Martin Luther King, waharaniye uburenganzira bw’abirabura muri Amerika, ku wa 21 Mutarama nibwo muri Amerika habaye umuhango w’irahira rya Perezida wa Leta Zunze Ubumwe za Amerika Barack Obama, arahirira kuyobora manda ya kabiri y’imyaka ine, iyanyuma yemererwa n’Itegeko Nshinga.

Irahira rya Obama wari umuhango w’irahira rya Perezida ku nshuro ya 57 ; witabiriwe n’Abanyamerika baturutse impande zose bakabakaba miliyoni, bahuriye I Washington, irahira rya Perezida bakaba barifata nk’ikintu kisanzwe mu mateka.

Wakurikiwe n’igitaramo cyatumiwemo abahanzi nka Jennifer Hudson, aho Obama n’umugore we bagaragayemo babyina.

Perezida Obama arahira
Perezida Obama mu gitaramo

Nk’uko tubikesha Radio Ijwi rya Amerika, mu irahira rye, Obama yifashishije Bibiliya ebyiri harimo iyakoreshejwe na Abraham Lincoln mu mwaka wa 1861 wabaye Perezida n’iya Martin Luther King waharaniye uburenganzira bw’abirabura.

Mu ijambo yavugiye muri uwo muhango, Barack Obama yatangaje ko mu byo ashyize imbere ari ubwumvikane no gushyira hamwe kw’Abademokarate n’Abarepubulika kugira ngo ibibazo bihari bibashe gukemuka.

Icyo yongeye kugarukaho ni uko azashyigikira demokarasi kuva muri Aziya kugeza muri Afurika, kuva muri Amerika kugera mu Burasirazuba bwo hagati.

Nk’uko uyu muhango uba ukurikiranywe n’abantu benshi ni na ko hari abagize icyo bawuvugaho.

Njejimana Gregoire, umwe mu bize muri za Kaminuza zo muri Amerika, akaba afite inkomoko mu Burundi yatangaje ko kuba hashize imyaka itari mike ubutegetsi buhererekanywa nta ntambara, amatora yaho akaba nta buriganya buyarangwamo ngo ni intambwe ikomeye yatewe mu bya demokarasi.

Gukorera hamwe nk’ikintu Obama yagaragaje ko azashyira imbere byari byasabwe n’Abarepubulike mug ihe cy’amatora.

Obama na Visi Perezida Joe Biden babanje kurahirira mu biro ku cyumweru, ariko mu ruhame imbere y’abaturage umuhango ubera mu Nteko n’abaturage bawukurikirana.

Perezida Obama na Michelle Obama basuhuza abaturage bari ku muhanda wa "Pennsylvania Avenue"
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO