Kwamamaza

Abamagana Trump bashingiye no ku bikorwa umuryango wa Clinton wakoze mu Rwanda

Yanditswe kuya 11-11-2016 saa 06:55' na Ntakirutimana Deus


Abanyamerika bashyigikiye Hillary Clinton biraye mu mihanda mu myigaragambyo yamagana itorwa rya Donald Trump, basaba ko hakongera gukorwa ibarura ry’amajwi, kuko batumva uburyo umukandida bari bashyigikiye yatsinzwe bakurikije abamutoye n’ibikorwa by’ubumuntu akora mu bihugu bitandukanye ku isi, harimo n’u Rwanda.

Donald Trump, wari uhagarariye ishyaka ry’aba-Républicains yatorewe kuyobora Leta Zunze Ubumwe za Amerika ku wa Gatatu tariki ya 9 Ugushyingo 2016, atsinze Hillary Clinton wari uhagarariye aba-Démocrates.

Amatora akimara kurangira hatangajwe ko Trump yayatsinze, hari bamwe mu bashyigikiye Hillary biraye mu mihanda, bakora ibikorwa bitandukanye byo gutwika ibintu basaba ko amajwi yakongera kubarurwa.

Umwe muri bo waganiriye na CNN yavuze ko bifuza ko ibarura ry’amajwi ryasubirwamo. Ahereye ku bikorwa bitandukanye umuryango wa Clinton wagiye ukora hirya no hino ku Isi bigaragza ubumuntu bwe , ngo asanga nta kuntu Hillary yari gutsindwa.

Yagize ati “Ndakwizera Hillary, nabaye mu Rwanda, nabaye mu bitaro byawe, nahabonye ibikorwa byose byiza wahakoze. Ndakwizera, abagore baragushaka, abaciye bugufi baragushaka, ndagushaka. Chicago iragushaka, twese turagushaka, iki gihugu kiragushaka, haguruka ujyane ikirego mu rukiko rw’ikirenga.”

Akomeza avuga ko abantu bafite umutima wa kimuntu batoye Hillary, ngo niyo mpamvu akwiriye kwiyambaza ubutabera, amajwi akongera kubarurwa.

Ku bijyanye no kwiyamamaza, agaragaza ko ngo Trump atigeze agaragaza imigabo n’imigambi ye, ahubwo avuga ibidafite akamaro.

Umuryango wa Hillary Clinton uhagarariwe na Bill Clinton, wigeze kuyobora Leta Zunze Ubumwe za Amerika washinze Umuryango Clinton Foundation ukora ibikorwa bitandukanye by’ubugiraneza ku Isi.

Ibyo bikorwa byagejejwe no mu Rwanda kuva ubwo Bill Clinton yatuye akavuga ko iyo Leta Zunze Ubumwe za Amerika ziba zarohereje ingabo zo gutabara u Rwanda, Jenoside yakorewe Abatutsi igitangira mu mwaka wa 1994, nibura abantu barenga “300,000” muri miliyoni irenga bishwe bari kubasha kurokorwa.

Mu kiganiro yagiranye n’umunyamakuru Tania Bryer, wa CNBC, Bill Clinton yasobanuye ko kunanirwa gutabara u Rwanda mu gihe cya Jenoside igahitana abarenga miliyoni, ari imwe mu mpamvu yatumye atekereza ishingwa rya Clinton Foundation.

Bimwe mu bikorwa uyu muryango uteramo inkunga mu Rwanda, birimo ibitaro bya Butaro bisuzuma bikanavura kanseri.

Ibyo bitaro byafunguwe ku mugaragaro na Perezida Kagame ari kumwe na Clinton tariki ya 18 Nyakanga 2012, ni ikigo cyubatswe ku nkunga y’umuryango uterwa inkunga na Bill Clinton (Clinton Foundation), Jeff Gordon Children’s Foundation ndetse na Leta y’u Rwanda. Iki kigo gifasha abatuye mu Rwanda ndetse no mu karere k’u Burasirazuba bw’Afurika.

Uyu muryango kandi watangije mu Rwanda ubufatanye n’abahinzi bo mu Rwanda bubafasha kwishyurana hakoreshejwe ikoranabuhanga.

Iyo gahunda yagezweho binyuze mu mushinga ushinzwe iterambere, Clinton Development Initiative (CDI) n’Ikigo cyo muri Amerika gitanga serivisi z’imari, Visa Inc. Amasezerano y’ubwo bufatanye yashyizweho umukono tariki 15 Ukuboza 2015.
Ihuza abahinzi n’amabanki, ibigo bikorana n’abo, abacuruzi, abagura umusaruro w’ubuhinzi n’abandi, binyuze mu gushyiraho uburyo bahuriraho mu kwishyurana.

Umwe mu bari bashyigikiye Hillary Clinton yamusabye ko yatanga ikirego amajwi akongera akabarurwa

Video y’umwe mu bashyigikiye Hillary Clinton yigaragambya akanavuga ku bikorwa uyu muryango wakoze mu Rwanda


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved