Abana ba Hollande ntibashaka ko yongera kwiyamamariza kuba Perezida w’u Bufaransa

Yanditswe na Ishimwe Israel
Kuya 24 Ukwakira 2016 saa 10:14
Yasuwe :
0 0

Minisitiri w’Ibidukikije, Ségolène Royal wahoze ari umugore wa Perezida w’u Bufaransa, François Hollande yatangaje ko abana babo badashaka ko uwahoze ari umugabo we yongera kwiyamamaza mu matora y’Umukuru w’Igihugu nyuma y’igitabo cyamwanditsweho mu minsi ishize.

Igitabo cyashyizwe hanze n’abanyamakuru babiri, Gérard Davet na Fabrice Lhomme, bise “Un président ne devrait pas dire ça” bivuze mu Kinyarwanda ngo “Perezida ntakwiye kuvuga ibi”, kigaragaza amagambo uyu Mukuru w’Igihugu yagiye avuga ku bandi bayobozi.

Muri icyo gitabo cy’amapaji 700, aba banyamakuru bagarutse cyane ku magambo Perezida Hollande yavuze kuri Nicolas Sarkozy yasimbuye, aho yamugaragaje nk’utarigeze agira icyo akora na kimwe.

Minisitiri Ségolène Royal, akaba umugore ufitanye abana bane na François Hollande, yatangarije ikinyamakuru JDD ko abana babo batewe impungenge cyane no kuba yirengagiza ibimuvugwaho bishobora kumutesha ikuzo, akaba yakongera kwiyamamariza indi manda nk’Umukuru w’Igihugu.

Biteganyijwe ko mu Ukuboza ari bwo Perezida, Hollande azatangaza niba aziyamamariza indi manda.

Na mbere y’uko icyo gitabo gisohoka, Ségolène Royal yabwiye Michel Sapin, Minisitiri w’Ubukungu n’Imari ko "Abana batifuza na gato ko se yajya mu bwicanyi.”

Iminsi 10 nyuma y’uko icyo gitabo gishyizwe mu masomero, Ségolène Royal agira inama Perezida Hollande ko yasuzuma ubuhangange bw’abamurwanya ngo bamuteshe ikuzo, ubundi akareka kwiyamamaza.

Ibyanditse muri icyo gitabo byatumye abo mu ishyaka ry’Aba-socialiste, François Hollande, abarizwamo bamutakariza icyizere, ndetse abandi bamuvumira ku gahera bavuga ko hari n’ibibi yakoze, ntibatinye kugaragaza ko badahamanya na we ku myato yivuga, bakanashidikanya ku cyemezo cyo kongera kwiyamamaza mu matora ataha y’Umukuru w’Igihugu.

Muri rusange, kwiyamamaza kwa Perezida François Hollande kuracyateye amakenga, mu gihe isinzi y’abantu isaba Minisitiri w’Intebe, Manuel Valls ngo yiyamamaze, aha hakanagaruka izina Ségolène Royal watsinzwe amatora y’umukuru w’igihugu mu 2007, ubwo yari ahanganye na Nicolas Sarkozy ku majwi 53.1% kuri 46,9%.

Minisitiri w’Ibidukikije, Ségolène Royal, wahoze ari umugore wa Perezida w’u Bufaransa, François Hollande yatangaje ko abana babo badashaka ko yongera kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza