Abo mu muryango wa Ban Ki-moon barashinjwa ibyaha bya ruswa

Yanditswe na Philbert Girinema
Kuya 11 Mutarama 2017 saa 08:44
43 29

Umuvandimwe n’umwishywa wa Ban Ki-moon wahoze ari Umunyabanga Mukuru w’Umuryango w’Abibumbye bagejejwe imbere y’ubutabera muri Leta Zunze Ubumwe za Amerika aho bakekwaho gucura umugambi wo guha ruswa abayobozi mu nzego za leta.

Inyandiko z’ubushinjacyaha zashyizwe ahagaragara n’Urukiko rwa Manhattan muri Leta Zunze Ubumwe za Amerika ku wa Kabiri zigaragaza ko aba bombi bagerageje gutanga ruswa ngo hakoreshwa amafaranga ya leta mu kugura ikigo cyabo cyari gifite amadeni menshi.

Ubushinjacyaha buvuga ko mu 2013 aribwo Ikigo cy’ubwubatsi cyo muri Koreya y’Epfo kizwi nka Keangnam, murumuna wa Ki-moon, Ban Ki-sang yari abereye umuyobozi cyagize amadeni menshi, kigashaka kugurisha inyubako yacyo yitwa Landmark 72 yubatswe muri Vietnam.

Ki-sang n’umuhungu we Joo Hyan “Denis” Bahn, ukora ubushabitsi mu bijyanye n’inyubako zigezweho muri Manhattan ngo bari bafite gahunda yo kubona inyungu ingana na milioni 800 z’amadorali.

Iyi niyo mpamvu yatumye aba bagabo bombi baha umunyamerika witwa Malcolm Harris ruswa y’amadorali ibihumbi 500 ndetse banamwemerera izindi miliyoni ebyiri kugira ngo abafashe kugurisha iriya nyubako, bifashishije izina ry’umuryango wabo.

Ngo banagerageje kandi kugirana inama n’umuyobozi ukomeye mu gihugu cyo mu Burasirazuba bwo hagati bashaka kugurishaho iyi nyubako, ubwo yari yaje i New York mu nama rusange y’Umuryango w’Abibumbye.

Nyuma ariko Harris yaje kubatenguha ntiyabafasha kugurisha inyubako ndetse n’amafaranga bari bamuhaye arayatwara.

Umuvugizi wa Ban Ki-moon yabwiye Reuters ko atari azi ibijyanye na biriya byaha bishinjwa umuvandimwe n’umwishywa we.

Ban Ki-moon wayoboye Umuryango w’Abibumbye kuva mu 2007-2016, nyuma akaza gusimburwa n’umunya-Portugal Antonio Guterres; ni umwe mu bahabwa amahirwe yo kuba Perezida wa Koreya y’Epfo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE