Agahinda nyuma y’igitero cy’umunya-palestine wishe abasirikare ba Israel abagonze n’ikamyo (Amafoto)

Yanditswe na Philbert Girinema
Kuya 9 Mutarama 2017 saa 09:38
Yasuwe :
0 0

Umunya-Palestine wari utwaye ikamyo, kuri iki Cyumweru yagonze itsinda ry’abasirikare ba Israel bari i Yeruzalemu, bane bahita bitaha Imana abandi 17 barakomereka, iki kikaba aricyo gitero Israel ihuye nacyo nyuma y’icyabaye mu Ukwakira 2015.

Ibitero bikoreshejwe imodoka zinjira mu baturage giherutse kuba nanone mu mujyi wa Nice mu Bufaransa na Berlin mu Budage, Minisitiri w’Intebe wa Israel akaba yavuze ko cyagabwe n’umuntu ushyigikiye Islamic State witwa Fadi Qunbar wari ufite imyaka 28, akaba yahise araswa akagwa aho.

Minisiteri y’Ingabo ya Israel yatangaje ko abasirikare bagabweho igitero bari mu rugendo shuri, maze hitaba Imana Lieutenant Yael Yekutiel wari umukobwa w’imyaka 20, Sous-Lieutenant Shir Hajaj wari umukobwa w’imyaka 22, Sous-Lieutenant Erez Orbach wari umusore w’imyaka 20 na Sous-Lieutenant Shira Tzur, umukobwa w’imyaka 20.

Minisitiri w’Intebe Benyamin Netanyahu kimwe n’abandi bayobozi batandukanye muri Israel bashyize iki gitero mu myumvikanire rusange kimwe n’ibindi bibazo Isi ifite, kurusha kugishingira ku bushyamirane hagati ya Palestine na Israel.

Netanyahu yagize ati “Iki kirasa neza n’umugambi wa Islamic State wabanje mu Bufararansa, ukomereza mu Budage none ubu bigeze i Yeruzalemu.”

Yavuze ko iki ari ikibazo cy’Isi muri rusange ku buryo ibihugu bigomba guhangana nacyo bishyize hamwe.

Nyuma y’iki gitero inama ikomeye y’umutekano yahise iterana, hatorwa umwanzuro ko abarwanyi ba Islamic State bahigwa bukware, umurambo w’uwo mugabo wagabye igitero ntusubizwe umuryango we, inzu ye igasenywa ndetse umuryango we ukirukanwa i Yeruzalemu.

Minisitiri w'Intebe Netanyahu yari arinzwe bikomeye ubwo yageraga ahabereye icyo gitero
Amashusho yafashwe na camera yo ku muhanda yerekana ikamyo iri mu kaziga isatira ahari hakoraniye abasirikare
Abasirikare bahungabanye kubera ibyari bimaze kuba
Abandi basirikare bafatanye urunana bibuka bagenzi babo bari bamaze kugwa mu gitero
Minisiteri y'Ingabo yahise itangaza amazina y'abaguye mu gitero
Inzego z'umutekano zahise zitabara
Fadi Qunbar wagabye iki gitero
Umwe mu bakoraga iperereza yicaye mu ikamyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza