Albert II wabaye umwami w’u Bubiligi yemeye gutanga ibizamini bya ADN kubera umwana atemera

Yanditswe na Habimana James
Kuya 29 Gicurasi 2019 saa 05:44
Yasuwe :
0 0

Umwami w’u Bubiligi Albert II yemeye gutanga ibizamini by’isanomuzi bizwi nka ADN, ngo adacibwa amande kubera umwana ashinjwa kuba yarabyaye mu myaka ya 1960.

Uyu musaza w’imyaka 84 y’amavuko amaze imyaka irenga 10 ahanganye n’inkiko muri iki gihugu aho ashinjwa kuba yarabyaye uwitwa Delphine Boël ubu ufite imyaka 51 akamwihakana.

Kuri uyu wa Kabiri nibwo Albert II yemeye gutanga ikizamini cye cy’amacandwe ngo gikorerwe isuzumwa barebe niba hari isano afitanye na Boël.

Muri uku kwezi Urukiko rw’Ubujurire rw’u Bubiligi rwategetse ko uyu wahoze ari umwami agomba guhanwa niba akomeje kwanga gutanga ibizamini bye.

Albert II wabaye umwami w’u Bubuligi kuva mu 1993 kugeza mu 2013 yagiye ahakana ko atari we wabyaye uwo mwana.

Umwunganizi we mu mategeko Alain Berenboom, yagize ati “Urukiko rwafashe umwanzuro ko ibizamini bya Albert II bizakomeza kugirwa ibanga kugeza hafashwe ikindi cyemezo cy’Urukiko.”

Biteganyijwe ko imyanzuro y’urukiko hagendewe ku bizaba byagaragajwe n’ikizamini cya AND izatangazwa mu mpera z’uyu mwaka.

Muri Gashyantare uyu mwaka nibwo uyu wahoze ari umwami w’u Bubiligi yari yategetswe gutanga ibizamini mu gihe cy’amezi atatu, bitakorwa akitwa se wa Boël.

Amakuru y’uko uyu mwami yaba yarabyaye uyu mwana ku mugore utari we yasakaye mu 1999.

Mu 2005 nibwo Boël mu kiganiro yatanze mu bitangazamakuru, yavuze ko umwami Albert II ari we se w’ukuri.

Nyina wa Boël witwa Baroness Sybille de Selys Longchamps, yavuze ko hagati y’umwaka wa 1966 kugeza mu 1984 yagiranye ibihe byiza na Albert II.

Umwami Albert II w'u Bubiligi (iburyo) yavuye ku izima yemera gutanga ibizamini bya ADN ngo bapime niba ari we se wa Boël

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza