Kwamamaza

Brexit: Amabanki akomeye yatangiye kwitegura kuvana ibikorwa byayo mu Bwongereza

Yanditswe kuya 23-10-2016 saa 13:41' na Rabbi Malo Umucunguzi


Amabanki akomeye asanzwe akorera mu Bwongereza ari kwitegura guhindura ibibuga yakoreragamo mu mwaka utaha, ubwo igihugu kizaba kimaze kwivana byeruye mu Muryango w’Ubumwe bw’u Burayi, EU.

Umuyobozi w’ihuriro ry’Amabanki mu Bwongereza, Anthony Browne, yanditse mu kinyamakuru The Observer ko n’amabanki mato ashobora kwimura ibikorwa byayo bitarenze 2017 kubera impungenge zishingiye ku kwivana k’u Bwongereza mu isoko rigari ry’u Burayi.

Uru rwego rwashyigikiye cyane ko u Bwongereza bwaguma muri EU, ariko kuwa 23 Kamena ijwi ryabo ryaburijwe n’iry’abaturage benshi bemeje ko ubwami bw’u Bwongereza bwivana muri uwo muryango.

Browne yavuze ko ibiganiro biri gukorwa muri iki gihe haba muri rusange cyangwa mu rwego rwa politiki, biri kuganisha amabanki mu cyerekezo kibi, ndetse serivisi z’imari zishobora kugirwaho ingaruka na Brexit kurusha izindi nzego z’ubukungu.

Ati “Ku mabanki, Brexit ntabwo bivuze gusa igiciro cyo gukora ubucuruzi kiziyongera gusa, nk’uko bishobora no kuzaba ku zindi nzego. Ni ukwibaza niba azabona uburenganzira bw’amategeko mu gukomeza gutanga serivisi.’’

Ibihugu biri muri EU byahuriraga ku isoko rusange, ku buryo nk’ibyo mu Bwongereza cyangwa Norvege bitanga serivisi z’amabanki n’ubwishingizi, bishobora gucuruza serivisi zabo mu bindi bihugu biri muri icyo gice bitabasabye gushyirayo icyicaro cyangwa kwaka uburenganzira bwihariye muri buri gihugu.

Ni igikorwa gihuriweho mu gice cy’ubukungu mu Burayi, “European Economic Area (EEA) kizwi nka “Passporting’’, ndetse ubwo burenganzira bukanakoreshwa mu gutanga serivisi zambukiranya imipaka.

Iryo soko rusange muri EU risanganwe amabwiriza arimo urujya n’uruza rw’abantu, ibicuruzwa, serivisi n’imari, mu gihe Minisitiri w’Intebe w’u Bwongereza, Theresa May, aheruka gutangaza ko nyuma ya Brexit hazabaho ivugururwa ku rujya n’uruza rw’abantu, mu gihe hari ibihugu bivuga ko urwo rujya n’uruza rutagakwiriye kuba rugibwaho impaka.

Bivuze ko nyuma ya Brexit u Bwongereza buzava muri iryo soko, ibintu byahita bibangamira amabanki nubwo akomeje gusaba ko iyo mikorere itabangamirwa, nubwo bitaramenyekana niba bizakomeza.

Iyo ngo bidashobotse, Browne avuga ko byagira ingaruka ku bigo byari bikomeye ntibibashe gukomeza gushyira hamwe amafaranga yifashishwa mu ishoramari, bigahita bihungabanya ubukungu bw’igihugu.

Biteganyijwe ko bitarenze Werurwe 2017, u Bwongereza buzatangira ibiganiro byeruye bishyira mu bikorwa ukwivana muri EU nyuma y’ugushaka kw’abaturage.

Amabanki akomeye mu Bwongereza akomeje kugira impungenge

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved