Ambasaderi w’u Bugereki muri Brazil yishwe, birakekwa ko yagambaniwe n’umugore we

Yanditswe na Ishimwe Israel
Kuya 2 Mutarama 2017 saa 05:57
Yasuwe : XX
0

Ambasaderi w’u Bugereki muri Brazil, Kyriakos Amiridis yishwe n’umupolisi ukundana n’umugore we, bikekwa ko ari nawe wamuhaye akazi ashaka kwikiza umugabo we bari bamaze iminsi batabanye neza.

Nyuma y’ urupfu rw’uyu mugabo, umugore we yahise atabwa muri yombi atangira gukorwaho iperereza nk’uko byatangajwe n’Ibiro Ntaramakuru byo muri Brazil, Agencia Brasil kuwa Gatandatu w’icyumweru gishize.

Umuyobozi wa Polisi ushinzwe iperereza muri Leta ya Baixada Fluminense, Evaristo Pontes, yatangaje ko Sergio Gomes Moreira Filho yiyemereye ko yishe Ambasaderi mu rwego rwo kwirwanaho.

Yakomeje atangaza ko Ambasaderi Kyriakos Amiridis w’imyaka 59, yaburiwe irengero kuva kuwa Mbere w’icyumweru gishize, umurambo we ugaragara kuwa Kane mu Mujyi wa Nova Iguaçu hafi ya Rio de Janeiro wazingiwe mu myenda uri mu modoka.

Ati “Moreira yavuze ko yarwanye na Ambasaderi, aza kubona nta yandi mahitamo afite aramwica. Yagize ibitekerezo byinshi nyuma yo kubona ibyari bibaye ahitamo kwitabaza mubyara we bajya kujugunya umurambo we.”

Pontes yatangaje ko n’ubwo iperereza rigikomeje bivugwa ko Francoise De Souza Oliveira ukomoka muri Brazil, umugore wa Ambasaderi yaba ariwe wategetse ko umugabo we yicwa ashaka ko we n’inshuti ye basigarana imitungo.

Bivugwa ko uyu mugore yatangiye gucura umugambi wo kwivugana umugabo we nyuma y’uko aba bombi bakimbiranye bikomeye mu minsi itatu mbere ya Noheli, amakuru nyir’ubwite yateye utwatsi.

Pontes akomeza atangaza ko Moreira yari yemereye mubyara we kumuha amadorali angana na 24,574 nyuma y’iminsi 30, bamaze gusinsibiranya ibimenyetso.

Ambasaderi Amiridis yabaye mu Murwa Mukuru wa Brasilia, kuva yahabwa izi nshingano muri Mutarama umwaka ushize, ariko yakundaga gukorera ibiruhuko hanze y’Umujyi wa Rio, aho yamaze igihe ahagarariye inyungu z’igihugu cye muri Brazil kuva mu 2001 kugeza 2004.

Ibiro by’Umukuru w’Igihugu muri Brazil byasohoye itangazo ryihanganisha u Bugereki nyuma y’urupfu rwe.

Ati “ Muri iki gihe cy’akababaro, mu izina ry’Abanya-Brazil bose turihanganisha Guverinoma y’u Bugereki n’abaturage bose, by’umwihariko imiryango n’abantu ba hafi ya Ambasaderi Amiridis.”

Iri tangazo rikomeza rivuga ko abayobozi ba Brazil bazakomeza gukorana n’u Bugereki mu iperereza ryimbitse kuri uru rupfu.

Polisi yataye muri yombi umugore wa Ambasaderi, Eduardo Moreira de Melo ukekwaho kumwivugana na mubyara we wamufashije kujugunya umurambo, bose bari gukorwaho iperereza.

Ambasaderi w’u Bugereki muri Brazil, Kyriakos Amiridis yari amaze iminsi yaraburiwe irengero
Umubiri we watoraguwe mu modoka watwitswe
Francoise Souza Oliveira w’imyaka 40 ajyanywe muri gereza iherereye Belford Roxo muri Brazil, nyuma y’urupfu rw’umugabo we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza