Ambasaderi w’u Bwongereza muri EU yeguye mbere y’ibiganiro bya Brexit

Yanditswe na Jean Pierre Tuyisenge
Kuya 4 Mutarama 2017 saa 12:12
Yasuwe :
0 0

Ambasaderi w’u Bwongereza mu Muryango w’Ubumwe bw’Ibihugu by’i Burayi, EU, Ivan Rodgers, yeguye ku mirimo ye mbere y’uko Guverinoma y’u Bwongereza itangiza ibiganiro bya Brexit.

Ambasaderi Ivan Rodgers yeguye mu gihe haburaga ibyumweru umunani ngo igihe ntarengwa cyashyizweho na Minisitiri w’Intebe Theresa May, cyo gutangira ibiganiro by’imyaka ibiri bya Brexit biteganyijwe muri Werurwe kigere, icyemezo cyatunguye u Bwongereza n’u Bubiligi aho yakoreraga.

Uyu mugabo yateje urujijo mu mpera z’umwaka wa 2016, nyuma y’uko avugiye ko amasezerano y’ubucuruzi bwayo na EU ashobora kuzafata imyaka ikabakaba 10 kugira ngo agerweho bidasubirwaho, ndetse avuga ko abona ko hari ibihugu bimwe bitazayashyiraho umukono.

Ikinyamakuru The Financial Times cyanditse ko Ivan Rogers yatangaje icyemezo cye cyo kwegura mbere y’itariki yagombaga gusorezaho manda ye mu kwezi ku Ugushyingo.

Ivan yabwiye Abaminisitiri mu Ukwakira 2016, ko abandi banyamuryango ba EU batekereza ko amasezerano y’ubucuruzi n’u Bwongereza adashobora gutangira mbere ya 2020.

Yabatangarije kandi ko abayobozi b’u Burayi batekereza ko amasezerano y’ubucuruzi hagati y’u Bwongereza na EU akwiye kuba isoko ry’ubucuruzi ryigenga aho gukomeza gukorera ku isoko rimwe.

Ibyo yavuze ku ngengabihe y’amasezerano y’ubucuruzi ya Brexit byateje umwiryane muri guverinoma.

Uwagize uruhare runini mu gucengeza amatwara yo kuva muri EU k’u Bwongereza, Arron Banks yagize ati “Ni umuntu uvuga ko Brexit izafata imyaka 10.”

“Nta kwizera na guke afite, ndetse ni umuntu washyigikiye ishyirwaho rya EU kuva na kera, gusa yakoze ikintu cyiza cyo kwegura.Ni igihe rero cy’umuntu wizera ko ibintu bishoboka akarangaza imbere u Bwongereza bugasohoka muri EU, twavuze amagambo menshi, dukwiye gukomeza icyemezo cyo gusohoka.”

Uwahoze ari Minisitiri w’Ububanyi n’amahanga akaba yari na Perezida wa Komite ya Brexit, Hilary Benn yavuze ko kwegura “atari byo byiza.”

Ambasaderi Ivan Rodgers wari uhagarariye u Bwongereza muri EU yeguye nyuma y'imyaka itatu yari amaze ahawe inshingano n'Uwari Minisitiri w'Intebe, David Cameron

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244