USA: Icyo wamenya ku gitero cyahitanye abantu 5 ku kibuga cy’indege cya Lauderdale

Yanditswe na Jean Pierre Tuyisenge
Kuya 7 Mutarama 2017 saa 04:52
Yasuwe :
0 0

Inzego z’umutekano muri Leta ya Florida muri Leta Zunze Ubumwe za Amerika, zatangaje ko abantu batanu bishwe barasiwe ku kibuga cy’Indege Mpuzamahanga cya Lauderdale, abandi umunani barakomereka mu gitero cyagabwe ku wa Gatanu, tariki ya 6 Mutarama 2017.

Biravugwa ko uwabarashe ubu ari mu maboko ya Polisi ndetse ko yamenyekanye ku izina rya Esteban Santiago ukomoka muri Alaska.

CNN yagiranye ikiganiro n’umwe mu bashinzwe umutekano mu gace ka Broward, Scott Israel watangaje ko uwarashe yaje mu ndege yagera muri Leta ya Florida avuye Alaska anyuze ahitwa Minnesota, aho yari atwaye imbunda ebyiri nto mu gakapu.

Avuga ko ageze ku kibuga cy’indege cya Fort Lauderdale, yateruye agakapu aho bashyira imizigo, akuramo imbunda atangira kurasa kandi yabikoraga wenyine.

Umwe mu bari aho yatangaje ko Santiago yagiye mu bwogero agakura imbunda mu ivarisi yari atwaye agahita atangira kurasa.

Ibiro bishinzwe Iperereza muri Leta Zunze Ubumwe za Amerika, FBI ntibiratangaza niba icyo ari igitero cy’iterabwoba, gusa ubu Santiago ari mu maboko ya Polisi biteganyijwe ko azagezwa mu rukiko ku wa Mbere.

Amakuru avuga ko Santiago w’imyaka 26, yaguze imbunda ebyiri imwe iri mu bwoko bwa GLOCK 9mm, n’iya Glock 40-caliber, gusa ntibizwi niba izo mbunda yarazikoresheje zombi.

Ibyangombwa bye bigaragaza ko yakoze mu rwego rw’umutekano muri Puerto Rico guhera ku wa 14 Ukuboza 2007, akora no mu gisirikare cya Alaska.

Bigaragaza kandi ko yoherejwe muri Iraq agenda muri rumwe mu nzego z’igihugu za Puerto Rico kuva ku wa 23 Mata 2010 kugeza ku wa 19 Gashyantare 2011.

FBI yarebye amateka ya Santiago mu gisirikare ariko ntiyigeze igaragaza ko yaba afite amatwara akaze y’ubwiyahuzi. Gusa yasabye inzego za polisi zo muri ako gace kumujyana kwa muganga ngo basuzume niba adafite ibibazo byo mu mutwe.

Santiago yabaga muri Alaska ndetse ngo yari afite akazi ko gucunga umutekano yahawe n’ikigo kiwucunga mu Mujyi wa Anchorage muri icyo gihugu.

Benshi bumvise urufaya rw'amasasu bahita bakwira imishwaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza