Amerika iri gushakira igisubizo iterabwoba rya Korea ya Ruguru

Yanditswe na IGIHE
Kuya 3 Ukuboza 2017 saa 02:44
Yasuwe :
0 0

Umujyanama mu by’Umutekano mu Biro bya Perezida wa Leta Zunze Ubumwe za Amerika, HR McMaster, yavuze ko icyo gihugu kiri gushyira ingufu mu gushakira igisubizo iterabwoba rya Korea ya Ruguru.

Yavuze ko isaha iyo ari yo yose intambara ishobora kurota hagati y’ibihugu byombi icyakora ngo si cyo gisubizo cyonyine.

McMaster avuze ibi nyuma y’iminsi mike Korea ya Ruguru igerageje ikindi gisasu kirimbuzi, cyaguye mu mazi y’u Buyapani.

Iki gisasu bivugwa ko ari cyo cyarashwe kure ugereranyije n’ibindi Korea ya Ruguru yagerageje mbere, kuko cyazamutse mu kirere ku butumburuke bwa kilometero 4 475, kigatambika ibilometero 950 mu minota 53.

Mu nama yiga ku by’umutekano yabereye muri Leta ya California kuri uyu wa Gatandatu, McMaster, yavuze ko hari ubundi buryo bwo gukemura ikibazo kiri hagati y’ibihugu byombi gusa ngo igihe gisa n’ikiri kubasiga.

Yagize ati “Hari uburyo bwo gukemura iki kibazo hatabayeho gukoresha ihangana ry’intwaro ariko ni nk’isiganwa kuko ari kudusatira cyane (Kim Jogn Un), nta gihe gisigaye.”

Yakomeje asaba u Bushinwa gufatira ibihano Korea ya Ruguru ikabafungira ibikomoka kuri peteroli ngo kuko batabasha kurasa batabifite nk’uko BBC yabitangaje.

Yagize ati “Turasaba u Bushinwa gukora mu nyungu zabwo nk’uko bikwiye kandi twizera ko uko byiyongera biri mu nyungu z’u Bushinwa gukora ibirenzeho. Ntiwarasa igisasu udafite ibikomoka kuri peteroli.”

Kuri iki cyumweru Reuters yatangaje ko Amerika iri gushaka kubaka ubwirinzi bw’ibisasu kirimbuzi (Terminal High Altitude Area Defense-THAAD) ku nkombe z’inyanja mu Burengerazuba bw’cyo gihugu, icyakora Ikigo gishinzwe iby’intwaro Kirimbuzi cyatangaje ko nta mabwiriza kirahabwa yo kubaka ubwo ubwirinzi.

Amerika isanzwe ifite ubwirinzi bw’ibisasu kirimbuzi muri Korea y’Epfo ndetse no ku Kirwa cya Guam.

Koreya ya Ruguru yashinje Amerika na Korea y’Epfo kuba gashozantambara kubera imyitozo y’ingabo zirwanira mu kirere izakorerwa muri Korea y’Epfo kuri uyu wa Mbere. Yavuze ko ari ubushotoranyi bushobora guteza intambara y’intwaro kirimbuzi.

Umujyanama wa Trump mu by'Umutekano, HR McMaster yakomoje ku gukemura ikibazo cy'iterabwoba rya Koreya ya Ruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza