Amerika: Perezida Trump yabonanye na Angela Merkel batumva kimwe ikibazo cy’abimukira

Yanditswe na Jean Pierre Tuyisenge
Kuya 18 Werurwe 2017 saa 10:54
Yasuwe :
0 0

Perezida wa Leta Zunze Ubumwe za Amerika Donald Trump, yakiriye muri White House Chancelière w’u Budage, Angela Merkel bakunze kugaragaza kutumvikana by’umwihariko ku kibazo cy’abimukira, bagirana ikiganiro cya mbere imbonankubone.

Ikiganiro cyahuje aba bayobozi bombi cyabaye kuwa Gatanu, tariki ya 17 Werurwe, cyagarutse ku bikorwa byo kurwanya Umutwe w’iterabwoba wa IS, gutera ingabo mu bitugu Umuryango wo gutabarana w’ibihugu byo mu Burengerazuba bw’Isi wa NATO no gucyemura amakimbirane ari hagati y’u Burusiya na Ukraine.

Al Jazeera dukesha iyi nkuru ivuga ko Merkel agitangira ijambo rye yavuze ko ari “byiza ko baganira imbonankubone kurusha ko umwe yajya avuga undi.”

Ubwo yiyamamazaga, Perezida Trump yakunze kuvuga amagambo akakaye kuri Merkel ahanini ashingiye ku kuba yaremeye ko igihugu cye giha ikaze impunzi z’Abanya-Syria; icyo gihe Trump yabyise kwangiza igihugu.

Mu kiganiro n’abanyamakuru, Merkel yavuze ko yaganiriye na Trump ku byo batemeranyaho, ati “Mu by’ukuri ibi ni bimwe mu byo twunguranyeho ibitekerezo.”

Ku ruhande rwa Perezida Trump usanzwe urwanya ukwinjira kw’impunzi n’abimukira, yanashyizeho itegeko rikumira abantu bo mu bihugu by’abayisilamu by’agateganyo n’irihagarika impunzi muri Amerika.

Ryaje ari irya kabiri riterwa ishoti kandi n’irya mbere ryari ryamaganiwe kure n’urukiko muri Amerika. Trump yavuze ko ibihugu byombi bigomba gushyiraho ingamba zigamije kwirinda ibitero by’imitwe y’iterabwoba y’abayisilamu.

Perezida Trump we yavuze ko kwimuka ari ikintu ushobora guhabwa ariko si ukuvuga ko ari itegeko, bityo agashimangira ko umutekano w’abenegihugu ugomba kuza imbere.

Abasesenguzi bavuga ko umunsi w’ejo wabaye uwo gushyira hanze ibyo basaga n’aho batumvikanaho, dore ko umubano w’abo bombi wasaga n’aho utoroshye mu minsi ishize bitewe ahanini n’ibyo Trump yakunze gutangaza mu gihe yiyamamazaga.

Perezida wa Amerika Donald Trump yakiriye Chancelière w’u Budage, Angela Merkel bagirana ibiganiro byihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza