Amerika: Umudipolomate yibasiye Umunyamabanga wa leta mu ibaruwa isezera ku kazi

Yanditswe na Mukaneza M.Ange
Kuya 12 Ukuboza 2017 saa 09:31
Yasuwe :
0 0

Elizabeth Shackelford, wagiye ahagararira inyungu za Leta Zunze Ubumwe za Amerika mu bihugu bitandukanye, yibasiye Umunyabanga wa Leta ushinzwe Ububanyi n’Amahanga, Rex Tillerson, aho mu ibaruwa ye isezera yamubwiye ko ubuyobozi bwe nta gaciro bufite ndetse bibaye byiza nawe yamukurikira.

Shackelford wakoreye muri Sudani y’Epfo, Kenya na Pologne yandikiye Tillerson amubwira ko urwego ahagarariye rukomeje guteshwa agaciro, kuko Amerika ikomeje kwitabaza igisirikare mu gukemura ibibazo birebana na politiki mpuzamahanga.

Mu ibaruwa yanditse ku itariki ya 7 Ugushyingo 2017 CNN ifitiye kopi, uyu mugore yavuze ko niba uyu munyabanga wa leta adafite ubushobozi bwo kugaragaza ububasha mu kuyobora urwego ashinzwe, no guhangana n’ikibazo cy’abahagarariye inyungu za Amerika mu bihugu bitandukanye bakomeje gusezera, nawe yagakwiye gufata umwanzuro akava mu mirimo ye.

Ati “Tweguriye Minisiteri y’ingabo ububasha bwacu mu gushyira mu bikorwa politiki ya Amerika irebana n’ububanyi n’amahanga, ku itegeko ry’ibiro bya perezida (White House), ariko ibi bitugiraho ingaruka nk’igihugu.”

Aha yashakaga kugaruka ku buryo Perezida Donald Trump yashyize mu bajyanama be b’imena abasirikare bakuru barimo Umunyamabanga wa Leta ushinzwe Ingabo, James Mattis; Umujyanama mu bijyanye n’umutekano, H.R. McMaster na John Kelly, mu gihe bigaragara ko yatesheje agaciro imbaraga Tillerson yashyiraga mu gukemura ibibazo binyuze mu biganiro.

Shackelford, wari ushinzwe ibijyanye na politiki mu ngabo za Amerika ziri mu butumwa bw’amahoro muri Somalia yanenze kuba Ambasaderi weguye muri Nzeri atarigeze asimburwa, ndetse n’uburyo ingabo zemererwa guhura n’abayobozi muri iki gihugu mu gihe abadiplomate bimwa uburenganzira hashingiwe ku mpamvu z’umutekano muke.

Uyu mugore avuze ibi, mu gihe hakomeje kugaragara ikibazo gikomeye hagati ya Trump n’abahagarariye inyungu za Amerika mu bihugu bitandukanye bagenda basezera ku mirimo yabo, aho abantu batandukanye bashyira mu majwi kuba urwego babarizwamo rutacyubahwa ndetse ngo ruhabwe agaciro.

Kugeza Amerika ntifite abahagararira inyungu zayo mu bihugu birimo Kuwait, Turikiya, Arabia Saoudite, Jordan, Somalia n’ibindi.

Rex Tillerson yibasiwe n'uwari Ambasaderi wa Amerika mu ibaruwa ye isezera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza