Australia yatuje mu ibanga Abanyarwanda babiri bashinjwe kwica ba mukerarugendo umunani

Yanditswe na HABIMANA James
Kuya 16 Gicurasi 2019 saa 09:27
Yasuwe :
0 0

Abanyarwanda babiri bashinjwe kwica ba mukerarugendo umunani b’Abanyaburayi mu 1999, byatangajwe ko umwaka ushize boherejwe gutuzwa muri muri Australia bavanwe muri leta Zunze Ubumwe za Amerika.

Aba bagabo bari bamaze imyaka 15 bafungiwe muri Leta Zunze Ubumwe za Amerika. Harimo umwe witwa Leonidas Bimenyimana na Gregoire Nyaminami.

Bashinjwe kugira uruhare mu kwica ba mukerarugendo umunani bakoresheje imihoro n’amashoka ubwo barimo basura Ingagi muri Uganda mu 1999.

Aba bamukerarugendo barimo babiri bo muri Leta Zunze Ubumwe za Amerika, babiri bo muri Nouvelle-Zélande n’abandi bane bo mu Bwongereza.

Babishe babavanye muri Parike ya Bwindi iri muri Uganda, babikora bagamije gutanga ubutumwa ku bihugu by’i Burayi ko batishimiye kuba ibi bihugu byari bishyigikiye icyo bitaga leta y’Abatutsi yari imaze kujyaho mu Rwanda.

Nyuma yo gutabwa muri yombi boherejwe muri Leta Zunze Ubumwe za Amerika kuburanishwa ariko mu 2006 iki kirego cyaje kuvanwaho nyuma y’aho umucamanza avuze ko bemejwe icyaha nyuma yo gukorerwa iyicarubozo.

Nyuma yo kugirwa abere bakomeje kuba muri Leta Zunze Ubumwe za Amerika kuko leta itashakaga kubarekura ariko nabo ntibashake kugaruka mu Rwanda kuko ngo batinyaga ko bashora gukurikiranwa n’inkiko.

Ibinyamakuru bitandukanye birimo The Guardian na 9News byavuze ko kubera amasezerano yasinywe hagati ya Malcolm Turnbull wabaye Minisitiri w’Intebe wa Australia kuva mu 2015-2018 na Barack Obama , byatumye aba bantu bajyanwa muri iki gihugu baguranywe n’abandi, gusa kugeza ubu umuntu wa gatatu muri aba banyarwanda aracyari muri muri Amerika.

Gusa ubwo Perezida Donald Trump yajyaga ku butegetsi yamaganye aya masezerano y’impunzi yasinywe hagati y’aba bayobozi babiri.

Minisitiri w’Intebe wa Australia, Scott Morrison, yanze kugira icyo avuga kuri iki kibazo.

Mu kiganiro yahaye itangazamakuru yagize ati “Buri muntu wese uje muri Australia kubera amasezerano ayo ariyo yose, abanza gukorerwa igenzura n’inzego z’umutekano hano mu gihugu ndetse n’urwego rw’abinjira n’abasohoka.”

Yavuze ko atifuza kugira icyo avuga kuri ibi birego ariko yizeza abaturage ba Australia ko abantu bose baza muri iki gihugu hari inzira binyuramo.

Umuvugizi wa Minisiteri y’Umutekano muri Australia we yavuze ko Iki gihugu gikorana n’ibihugu bitandukanye birimo na Leta Zunze Ubumwe za Amerika mu bijyanye n’impunzi n’ibindi bikorwa by’ubugiraneza.

Yavuze ko Australia itigeze kandi itazigera yakira umuntu utujuje ibisabwa n’inzego z’umutekano mu gihugu, hashingiwe kuri gahunda z’impunzi n’ibindi bikorwa by’ubugiraneza.

Imodoka aba ba mukerarugendo barimo yaratwitswe icyo gihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza