Carles Puigdemont wahoze ari Perezida wa Catalonia yishyikirije Polisi y’u Bubiligi

Yanditswe na IGIHE
Kuya 5 Ugushyingo 2017 saa 03:43
Yasuwe :
0 0

Uwahoze ari Perezida wa Catalonia, Carles Puigdemont n’abandi bantu bane bari mu bajyanama be bishyikirije Polisi y’u Bubiligi nk’uko byatangajwe n’Umushinjacyaha muri iki gihugu.

Uyu mushinjacyaha yatangaje ko kuri uyu wa Mbere ari bwo hazafatwa umwanzuro ku gushyira mu bikorwa iby’impapuro zo guta muri yombi Puigdemont z’Umuryango w’Ibihugu by’i Burayi zatanzwe na Espagne ku wa Gatanu w’iki cyumweru.

Puigdemont yahungiye mu Bubiligi nyuma y’aho Epagne itesheje agaciro ubwigenge bwa Catalonia yisubiza iyi ntara, isimbuza by’agateganyo abayobozi birukanwe, itegeka ko hazaba amatora yo kubasimbuza burundu mu minsi mike iri imbere.

Yari yatangaje ko atazasubira muri Espagne keretse mu gihe yaba yijejwe ubutabera butabogamye.

Inkuru ya BBC ivuga ko Puigdemont n’ibyegera bye bine bashakishwa kubera ibyaha birimo gukoresha nabi ibya rubanda,kurwanya ubutegetsi, ubugambanyi n’ibindi.

Puidgemont n’abagize Guverinoma ye bari batangaje ubwigenge bwa Catalonia. Urukiko rurengera itegeko nshinga rwa Espagne rwahise rutesha agaciro ubwo bwigenge, we n’abandi bayobozi ba Catalonia barirukanwa.

We n’abaminisitiri batanu bamugaragiye bagaragaye mu Bubiligi bivugwa ko bahunze, nyuma yaho gato Umushinjacyaha mukuru wa Espagne, José Manuel Maza, avuga ko bagomba gukurikiranwa.

Mu kiganiro n’abanyamakuru ku wa Kabiri w’iki cyumweru, Carles Puidgemont yavuze ko atahunze ahubwo ngo yagiye mu Bubiligi kugira ngo aze kubona uko avuga yisanzuye.

Carles Puigdemont wahoze Perezida wa Catalonia yishyikirije Polisi y’u Bubiligi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza