Kwamamaza

Perezida wa Colombia yahisemo guha igihembo cya Nobel yahawe abashegeshwe n’intambara

Yanditswe kuya 11-10-2016 saa 09:24' na Niyonsenga Schadrack


Perezida wa Colombia, Juan Manuel Santos, yatangaje ko amafaranga y’igihembo cy’amahoro cyitiriwe Nobel aherutse guhabwa azayafashisha abaturage bagezweho n’ingaruka z’intambara y’abasivili yamaze imyaka 52 muri iki gihugu.

Perezida Santos yahawe iki gihembo gihabwa umuntu wakoze ibikorwa by’indashyikirwa, kubera uruhare yagize mu gushyira umukono ku masezerano y’amahoro hagati ya Leta n’inyeshyamba za FARC (Revolutionary Armed Forces of Colombia) mu kwezi gushize.

Intambara yamaze imyaka 52 ishyamiranyije impande zombi yatumye abanya-Colombia bagera ku bihumbi 260 bapfa naho abarenga miliyoni esheshatu bakurwa mu byabo.

Perezida Santos yagize ati "Mu ijoro ryacyeye nahuye n’abo mu muryango wanjye, twahisemo ko ariya madolari ya Amerika 925,000 tuzayaha abagezweho n’ingaruka z’intambara.”

Ibi yabitangaje ubwo yari mu gace ka Bojaya mu Majyaruguru ashyira Uburengerazuba bwa Choco mu masengesho yo kwifatanya na bamwe mu bangirijwe n’izo ntambara.

Ku wa Gatanu w’icyumweru gishize, Kaci Kullmann Five uyobora Komite ishinzwe gutanga igihembo cyitiriwe Nobel yatangaje ko bahisemo kugiha Perezida Santos kubera imbaraga yagaragaje mu guhagarika intambara yari imaze imyaka 52.

Ati "Iki gihembo gikwiye kugaragara nk’ishimwe ku banya-Colombia batahwemye kwirengagiza imvune n’imibabaro bakizera ko intambara izageraho ikarangira amahoro akaboneka. Iki gihembo kandi ni icy’amatsinda yose yafashije mu kugarura amahoro.”

Icyakora abatanze iki gihembo ntibigeze bazirikana uruhare rw’umuyobozi wa FARC, Timoleon Rodriguez uzwi ku izina rya Timochenko ku musanzu we mu guharanira ko amahoro yagaruka intambara igasozwa.

Timochenko yemeye ko amasezerano y’amahoro yasinywa nyuma y’imyaka ine bari mu biganiro byaberaga muri Cuba mu Murwa Mukuru Havana.

N’ubwo mu matora ya kamarampaka byagaragaye ko abanya-Colombia batoye “Oya” ku majwi angana na 50,2% mu matora yabaye kuya 2 Ukwakira, ubuyobozi bwatangaje ko aba baturage batanze amahoro ahubwo banze ibikubiye mu masezerano ubwayo.

Ibi kandi byagaragazaga ko gushakira ubutabera ndetse no kunga abagizweho ingaruka n’intambara byari kugorana.

BBC dukesha iyi nkuru itangaza ko abenshi mu baturage bateye utwatsi ibikubiye mu masezerano y’amahoro yari amaze kwemeranywaho binyuze mu matora ya kamarampaka yo kuwa 2 Ukwakira, bitaciye Perezida Santos intege zo gukomeza kugirana ibiganiro n’abatavuga rumwe n’ubutegetsi.

Kugeza ubu abahagararira Leta ya Colombia mu biganiro by’amahoro n’abayobozi ba FARC bamaze kugera muri Havana aho ibiganiro bisanzwe bibera, aho biteganyijwe ko bigomba gusubukurwa.

Ku rubuga rwe rwa Twitter, Timochenko uyobora FARC yagize ati “Nshimiye Perezida Juan Manuel Santos, Cuba ndetse na Norvège, bateye inkunga ibiganiro, na Venezuela na Chile babishyigikiye, iyo batahaba amahoro ntiyari gushoboka.”

Perezida Santos (ibumoso) asuhuzanya na Timochenko uyobora Umutwe w’inyeshyamba za FARC

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved