Danemark: Urukiko rwakatiye gufungwa by’agateganyo Umunyarwanda ushinjwa uruhare muri Jenoside

Yanditswe na Jean Pierre Tuyisenge
Kuya 19 Gicurasi 2017 saa 10:47
Yasuwe :
0 0

Urukiko rwo muri Danemark rwategetse ko Umunyarwanda wahafatiwe muri iki cyumweru ashinjwa kugira uruhare muri Jenoside yakorewe abatutsi mu 1994, afungwa by’agateganyo kugeza ku wa 15 Kamena 2017.

Ubushinjacyaha bwa Danemark bushinja Wenceslas Twagirayezu uruhare mu bwicanyi bwakorewe mu Ntara y’Uburengerazuba bw’u Rwanda. Afatwa hatangajwe ko yagize uruhare mu iyicwa ry’Abatutsi bagera mu 1000 ku kiliziya no muri kaminuza bitatangajwe amazina.

The New Times yanditse ko ubwo yageraga imbere y’urukiko rwari ruhagarariwe n’umucamanza Jens Berg, ubushinjacyaha bwamureze ubwicanyi bwakorewe kuri Kiliziya ya Busasamana mu Karere ka Rubavu no kuri Kaminuza y’i Mudende ahaguye Abatutsi benshi barimo abanyeshuri, abarimu na bamwe mu bayobozi.

Kuri urwo rusengero haguye Abatutsi basaga 3000 bahashakaga ubuhungiro kandi ngo ababishe bari bayobowe n’uwo uregwa.

Nyuma yo kumva ibyo Twagirayezu wakoreraga ikigo gikora ibijyanye n’ikoranabuhanga mu Mujyi wa Copenhagen, Umucamanza Berg yategetse ko afungwa by’agateganyo kugira ngo atabangamira abatangabuhamya cyangwa akaba yatoroka igihugu.

Twagirayezu yageze muri Danmark mu 2001 ahabwa ubwenegihugu mu 2004. Mbere ya Jenoside yari umwarimu mu ishuri ribanza ryitwa Majyambere riherereye mu Murenge wa Busasamana, Akarere ka Rubavu.

Ubushinjacyaha buvuga ko uyu mugabo yari akuriye ishyaka rya CDR mu yari Segiteri Gacurabwenge, muri Rubavu y’ubu, akaba yari n’Umuyobozi w’Interahamwe muri ako gace mu gihe cya Jenoside.

Ubutabera bwo mu Rwanda bufite icyizere ko Danemark yazohereza uyu Munyarwanda kuburanira mu Rwanda, dore ko no mu 2014, Emmanuel Mbarushimana washinjwaga uruhare muri Jenoside nawe yoherejwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza