Dr Hawking wavumbuye byinshi byerekeranye n’isanzure yitabye Imana

Yanditswe na Mukaneza M.Ange
Kuya 14 Werurwe 2018 saa 09:54
Yasuwe :
0 0

Dr Stephen Hawking, umuhanga mu bumenyi bw’ikirere ukomoka mu Bwongereza wagiye avumbura byinshi byerekeranye n’isanzure, yapfuye afite imyaka 76.

Ku wa Gatatu nibwo inkuru y’urupfu rwa Hawking wigeze kuvuga ko asanga nyuma y’imyaka 1000 nta kiremwamuntu kizaba kikirangwa ku Isi, yamenyekanye ndetse yemezwa n’ubuyobozi bwa Kaminuza ya Cambridge yakoragamo.

Michio Kaku wigisha muri City University of New York yavuze ko nyuma ya Albert Einstein nta wundi muhanga wigeze agaragaza ibitekerezo ndetse ngo anavumbure ibintu byagiye bituma abatuye Isi barushaho kugira amatsiko.

The New York Times ivuga ko ibi Hawking wagenderaga mu igare kubera uburwayi bufata ubwonko bwari bwaratumye atabasha kwinyeganyeza (motor neurone disease), yabigezeho nyuma y’igitabo ““A Brief History of Time: From the Big Bang to Black Holes” yanditse mu 1988.

Film ku buzima bwe nayo yasohotse mu 2014 yaravuzwe cyane ndetse Eddie Redmayne wakinnye amugaragaraza yegukana igihembo cya Oscar nk’umukinnyi mwiza.

Mu bijyanye n’ubumenyi uyu mugabo wamenye ko afite uburwayi budakira mu 1964 ndetse akabwirwa ko asigaje imyaka yo kubaho itarenze itatu, azibukirwa ku bushakashatsi bwarushijeho gusobanura ibijyanye n’isanzure ndetse n’ibyo umuntu yagereranya n’ibyobo birebire kandi biteye ku buryo n’urumuri rudashobora kunyuramo.

Mu bushakashatsi bwimbitse yakoze, Hawking ngo yaje gusanga ibyo byobo atari umukara nk’uko byavugwaga, ndetse yemeza ko uko imyaka izagenda ishira bizagenda byinjirwamo n’imirasire ndetse igihe kikazagera bigashwanyagurika.

Ubu bushakashatsi bwakozwe na Hawking akoresheje imibare bwashimwe cyane n’abahanga mu bumenyi, bavuze ko bwabaye imbarutso yo kugerageza gusobanura ibijyanye n’Isi ndetse n’isanzure.

Mu 2002, uyu mugabo yavuze ko yifuza ko imibare igaragaza ukuri ku bijyanye na biriya byobo yiswe ‘Hawking radiation’, izandikwa ku mva ye.

Uretse ubu bushakashatsi no kwitabira inama zitandukanye zigaruka ku bumenyi, yagiye agaragara mu bindi bikorwa bitandukanye, birimo n’ibyashyiraga mu kaga ubuzima bwe, aho yagaragazaga ko abikora nk’inzira yo kwereka abafite ubumuga bw’umubiri ko badakwiye kwishyiriraho imipaka ngo bumve ko hari ibyo badashoboye.

Yaherukaga gutangaza ko icyizere cyo kubaho k’umuntu nyuma y’imyaka 1000 kidakwiriye kubakirwa ku Isi ahubwo hakwiye gushakishwa ahandi ho gutura, bitewe n’ibibazo bitandukanye birimo gukendera k’umutungo kamere, ubushyuhe bukabije, ibisasu by’ubumara, indwara z’ibyorezo ndetse n’iterambere ry’ikoranabuhanga.

Dr Stephen William Hawking yavukiye muri Oxford mu Bwongereza tariki ya 8 Mutarama 1942, muri kaminuza yize ibijyanye n’ubugenge ndetse arangiza ari mu banyeshuri bafite amanota ya mbere.

Dr Stephen Hawking wari umuhanga mu bijyanye n'isanzure yapfuye afite imyaka 76

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza